16
Te Devitgo asęani balia po me deli dao.
Bidigo konealubo po dąų olama, God dali gedu haluasa po wai
1 God, nago ena tonaluao.
Magi baso meni, eno te nago
ena bugagia tonalueibao homu eyu,
tama ena nage dologoba bidagasobo dao.
2 Eno Genuai Bidi Godibolo te po wai,
“Nage eno genuai bidi dao.
Tigidali dwagi yai nai eno tolalubo,
te nai nago naga mabo nai dao,” wali.
3 Augwaligo konealubo homu Godiba
naga dąų wali we bidi, augwali e tǫde bididubadi,
augwali te tedali gasagi yai we bidi hani dao.
Eno dwagi yai homu mu elama,
augwali dali bidaio homu ebo dao.
4 Tibo po wabo god pageba painogo udabo we bidi,
augwali sęgę hauwa saibao.
Ena augwali dali deliba sisinama,
te tibo godibolo nai ula mabo ofa sę egobeo,
tama eno augwaligo te tibo godiba lotu po wagobeo.
5 God, nage deli eno God mu,
tama eno gasa nai me menio.
Tama nago eno sǫą pali nai tigidali ena mawai.
Eno bidibo ula nago tolalubo dao.
6 Eno dwagi yai nai tigidali nage dali naga olo sai.
Mu tama, te nai dabe dwagi yai mu dao.
7 Eno Genuai Bidigo nogi ugwaba sobao, magi basowe,
agai ena bugagia dodolobo dao.
Tama hulide eno homu kolesagago
te dwagi yai tų enabolo ola mabo dao.
8 Sesemane sogo eno homugo konebo,
Genuai Bidi ena pąde bidibao, te eno dolo nogo badu,
tama magi nai mego ena me degelegobeo.
9 Tama tibaso, eno homu dwagi yai eyu,
tama eno po wabo mobo dwagi yai homu ebo dao.
Tama eno magi nai me dali wi ebo menio.
10 Magi baso meni, nago ena
te isai bidigo bulude bidimainu tagala palogobeo.
Tama nago naga tedali gasagi yai bidi
aga te gų pagede damua pomainao wagobeo.*Tpi 13:35
11 Nago digi ena te bidibo ula te tų ola mawai.
Nage ena dali pąde bidibaso, nago
te eno dwagi yai homu mu ebo dao.
Tama nago ena sesemane bidada pabo sogo tau sabo,
eno dwagi yai homu mu ebo dao. *Tpi 2:25-28