115
God deli naga te God mu dao
1 Genuai Bidi, sesemane sogo nago da wei
mu ebo da, tama nago da me
tagalubo menio.
Tama tialima, dago nago genuai nogi
naga ugwaba saibao.
Dago digi dena nogi ugwaba me sogobeo.
2 Magi baso te gasa hani dabego dabolo
te tiwai po hanalu obawe,
“Te duga God menade bidibawe?”
3 Dago God te dagalude bidibao.
Te agai magi sę me deli yabo homu ebaso da,
teda agai te sę eyu naga ebo dao.
4 Te gasa hani dabego te augwa tibo god dabe
te gol me silvago nigali.
Te bidi dabego naga te augwali nigibo dao.
5 Te tibo god dabe pedauwali elalubao,
tiali goli augwaligo po obaso, usu me egobeo.
Augwaligo gedu elalubo,
tiali goli augwa tonono bilibaso, usu me egobeo.
6 Augwa olo elalubao, tiali goli augwa po me odogobeo.
Augwa guni elalubo, tiali goli augwa
te nai denami odogobeo.
7 Augwa nogo elalubao, tiali goli augwa
te nai me tola sogobeo.
Tama augwa sągą me elalubo,
tiali goli augwali me biligobeo.
Tama augwaligo te i me deli weyu,
ma gela deli me wagobeo.
8 Eno homugo te bidi dabego te tibo god nigibaso,
augwali te augwa tibo god tobage tiwai nigali god
dabe pedelaibao. *Tib 135:15-18; Ped 9:20
Tama te tibo god dabeba homu kęą pabo we bidi dabe,
augwali me te tiwai pedelaibao.
9 Dage Israel we bidi, dagego konealubo homu
te duga Genuai Bidiba muiąo.
Agai dage tau siyu, tama dage tonalubo dao.
10 Dage te Godigo pris te Arongo hani,
dagego homu te Genuai Bidiba kęą pao.
Agai dage tau siyu, tama dage tonalubo dao.
11 Dage te Genuai Bidide wi ebo
we bidi, dagego konealubo homu agaba dąų wao.
Agaduba deligo naga dage tau selama,
tama dage tonalubo dao.
12 Genuai Bidigo te sesemane sogo
dade homu kone paliyu,
tama agai da wiegi yai bugagia ilaibao.
Agai te Israel dabe bugagia wiegi yai ilama, tama
te Godigo pris haniba tama tiaibao.
13 Genuai Bidigo te agade wi ebo we
bidi bugagia wiegi yai ilaibao,
te nogi yai we bidi, me te nogi
meni yai we bidi dabeba,
te tama tiwai sę yaibao. *Ped 11:18; 19:5
14 Eno homugo te Genuai Bidigo
dageba te wai hauwa momainu homu yai,
tama te duga wąį nǫų nosali pedalubo haniba me,
te tama temainu yaibao.
15 Genuai Bidigo te dagalu de tǫ si pedalumainu ilali,
tama eno homugo agai te wiegi yai sę ebo kolesaga
dageba emainao.
16 Dagalu te Godigo pesage naga elalubao,
tama agai te tǫ da we bidiba mawai dao.
17 Te isibo bidi dabe
te augwa isali bidi dabego pesageba pobao,
augwaligo te Genuai Bidigo nogi
ugwaba me sogobeo.
18 Tiali goli, da bidibo bagego digi,
teda te Genuai Bidiba usu da po wabo,
te megi me nosali waiyąo.
Te Genuai Bidigo nogi ugwaba sao.