Profet Sekaraiago Po Asęai Buku
Hasia nedabo po
Profet Sekaraia aga te profet Hagai dali deli sę ebo bidi dao. Agai bomai homugo me te Juda we bidigo te Godigo tempel be ma sęnama tama doloba pai kolesaga yai we bidi ma pedalomainu homu yalio. Sekaraiago me augwali dali Godigo wiegi yai kolesaga yaibao po augwalibolo pusa mani, te wiegi yai sogo pedelaibao po pusali
Te profet po dago te Dąį 1-8de te elalubo po te buku Esekiel me Danielde suali po tiwai si dao. Sekaraia agai nade subo sę dabe tiwai suali, tama haniani po page begelama pusai po dabe tede elaluali.
Te Dąį 9-14 tede te nosali pedalabo nai dabe po elalubo. Teda te Godigo tigidali we bidigo kolesaga osola subo sogo tiaibao, me Godigo agai sę emainu bidi me tagala palobode. Te meba po begelama wali po te nosali Jisasgo yali sę dabe po dolo si kadu walio.
Sekaraia agai nade subo nai dabe tiwai suali
1
(Dąį 1–6)
Genuai Bidigo te po wali, aga we bidi augwali agaba ma asomainao po wali
1 Te king Darius aga kantri Persiade king bidali sogo, te aga king bidibadi kibu be namba 2 wabode, te 8 poluade, God Genuai Bidigo e po te profet Sekaraiabolo mani. Te Sekaraia aga te Berekiago ogwa dao, te Berekia te Idogo ogwa dao. *Esr 4:24–5:1; 6:14
2 Genuai Bidi Aga Tigidali Bomo Elalubo Bidigo Sekaraiabolo aga we bidibolo e tama po pusao po wali, “Ena Genuai Bidi, polobadu eno dagego wąį dabe dali sębę mu yai dao. 3 Tiali goli megi da, eno dagebolo e tama po e walobao, dage enaba geasa ma asiąo, tama eno dage tau sagasaibao. 4 Dagego duga wąį dabego yali sę tiwai igimio. Te eno poloba profet dabego augwalibolo te dwai kolesagaba tudi ola mao po obadi, augwaligo te dwai kolesagaba tudi ola mawai menio. Tiali goli augwaligo eno po odai menio. 5 Megi da, dagego wąį dabe polo isila pai dao, tama te profet dabe augwali me isai dao. 6 Tiali goli eno po te profet sibi dabego pedauwalidu eno pedelaibao wali te sę dabe duga wąį dabeba polo pedelai dao. Augwaligo eno augwalibolo mani te po wali pai menio. Tama tialigo augwali te dolali dao. Tama nosali augwali homu begelama augwaligo e tama po wai dao, ‘God, Tigidali Bomo Elalubo Genuai Bidi, agai dabolo wali gilama tama agai dabolo dene mawai dao. Te dena dagede tama dao,’ augwaligo te po wali,” God Genuai Bidigo te po wai.
Profetgo hos dabe te na subo nai tiwai suali
7 Te Darius aga king bidibadi namba 2 kibu be wabode, te namba 11 poluago namba 24 deide, te polua augwaligo polua nogi Sebat wabo poluade, Genuai Bidigo po enabolo mani. 8 Te hulide eno nai me nade subo nai tiwai me suali. Tama eno Genuai Bidigo ensel bidi kaneme hosde dualasa asobo suali. Te hos te bulu odogo mede ni tomode dolalubo suali. Tama meba hos dabe aga tudi badu dolalubo suali. Te hos dabe meba te kaneme hos, meba te nala hos, meba hos dabe te popoi pai hos dabe suali. Tama te ensel dabe te hos dabede dualalubo suali. *Ped 6:2, 4 9 Tialima eno te namba wan enselbolo e tama po hanalu wali, “Te nai page mena tama dawe?” po hanalu wali. Tama ensel bidigo e tama po wali, “Eno nagebolo te na yali po page pusaibao.” 10 Tama enselgo po genina ma weyu e tama po wali, “Genuai Bidigo te ensel dabe taga pelama, te tigidali tǫ dabe bugagia susa biligi pomainu taga palai dao,” wali.
11 Tama te ensel dabego te namba wan enselbolo e tama po walali, “Da tigidali tǫde bilalio. Tama dago tigidali we bidi augwali sęgę menia suali, tama augwali bugagia naga bidibo suali,” wali. 12 Tialima te polalubo enselgo te po wali, “Tigidali Bomo Elalubo Genuai Bidi, nago te kibu be 70 usu nama nago te Jerusalem we bidi dali me te Juda hanigo taunde bidibo we bidi dabe dali sębę yai dao. Nisu mu nago augwali dali homu dene eyu tau ma saibawe?” tama wali.
13 Tama Genuai Bidigo wiegi yai po te ensel bidigo homu nagame elama dua bidabo po wei ponani. 14 Tama te ensel bidigo enabolo Tigidali Bomo Elalubo Genuai Bidigo po te pusa mao po wali. Godigo te po wali, “Eno genuai homu dene mu te Jerusalem we bidi dabeba ebao, te eno genuai taun dao, tama eno augwaliba homu kone kone hauwa mu ebao. 15 Polobadu ena we bidi dali sębę dwasianu yai dao, tama gasa hani bidi dabebolo augwali dene magasao po wai dao. Tialima augwali aselama, tama augwaligo eno we bidi dwasianu gana me dolobeo. Menio. Augwaligo te magi edelama, tama augwali mu tama mu dolama tagalalio. Tama tede megi te kantri dabe augwali bugagia bidiyu augwali sęgę meni yai goli, eno augwali dali sębę dwai mu ebao. 16 Tialima, eno megi Jerusalemba ma aselama, tama eno agai we bidi dabe dali hobede homu ma yainu ebao. Tama augwaligo eno be ma sę eyu, me augwaligo taun Jerusalem ma dodoliyu yaibao,” te Tigidali Bomo Elalubo Genuai Bidigo te po wali.
17 Tama ensel bidigo enabolo gasa me po me e tama pusao po walali, “Tigidali Bomo Elalubo Genuai Bidigo te po wali, te tigidali nai dabe agai taunde pągąna yaibao po wali, tama te we bidi wiagila mu bidimainu yaibao po wali. Tama agai Jerusalem aga taun mu tiwai ma magi ilaibao po wali. Tama agai te Jerusalem we bidi homu tegaluama bugagia bidimainu ilaibao,” wali.
Sekaraiago kau kibugo tobolu gąų suali
18 Eno nade subo nai tiwai ma suali, tama eno kau kibugo tobolu gąų me si me si elalubo suali. 19 Tama te ensel ena dali po wali bidi asobo si, eno agabolo e tama po hanalu wali, “Eno te suali nai page mena tama nai dawe?” wali. Tama agai te po wei ponoyu, te po wali, “Te gąų dabe te Juda me Israel me Jerusalem dolali te kantri dabe te magi iyu te yali dao,” tama wali.
20 Tama Genuai Bidigo enabolo me si me si sę bidi hama tolalubadi asobo ola mani. 21 Tama eno agabolo hanalu wali, “Te bidi dabe augwali te magi yabo bidi dawe?” Tama agai te po wali, “Augwali te asobo da, te Juda dabe dolama gasa kantri dabeba besela sąyani, te kantri dabe wi ilama tama augwaligo bomo tamunabo bidi te asobao,” wali.