3
Ib bobol tem funino makob Klaiste bobol tem funino ulab aine!
Gode Klaiste imin dofaanea hana tlebuo, olo makob bainobo galin nakaia unanga ibsa yebbaka dohaanea imin hana tlibbua memalo ibo mema naka unang amblib kesoa ibo inamin namino dabalim ele bu olo bobolo mo wayemone! Ibo inamin namino abilim ut buo bobol ota wayemoko! Abilim uto Yesus Klaiste Gode kweile kweitale kikib ye toumbianea nakaia unanga isa eka inamin namin osa alukum kima biebe. Ibo inamin namino dabalim ele bu olo bobolo mo funimibe! Ibo inamin namino abilim ut buo bobol ota funine! Niminbabe, ib bobol tem funin ole dabalim olo bobol tem funinobe. Klaiste atdimo kaanea ib bobol tem funino sino wananea blimanobiobe. Ib bobol tem funino sin ole deiboniba ibtem Klaist etem naniba ib bobol temo makob aiba eka Klaist esa God etem naniba i bobol temo makob anaibbio kesoa e ib bobol temo kima biebe. Nibo nib bobol tem funino nibmalo mo kima biobbabe. Klaist eta kimabe bie kesoa sinanoa e imin tenea dabalim ele tlameo ibo teniba esu ye mieiba e titilo ayal inamin einobuo omyentlanea naka mak unang maki yatemomabiobe.
Ibo bobol tem misiamo funino deibueine!
Sinanomo Gode ibo e titilo ayal inamin einobuo omyamabe kesoa ibo dabalim olo inamin namin kukubo bobolo mo wayemone! Kukub olo inaminobe. Unang taman hengamin kukub osa eka taman bobol funin kukub osa eka unang maki yatenoba taman deib dleb denobtabo ge funin kukub osa eka inamin namino bobolo wayemin kukub osa ibo mo namibe! Nakaia unangai inamin namino bobolo wayemo mole inamin namin olota i godu benoa i God motone deibanomabiobe. Nakaia unangai kukub misiam olo wafu blibi Gode wengo omdibihabib kesoa e i alo tliaubanoa i kukub misiam olo nabibo molo yang kenea enino omyamabebe. Ibo sino Yesus Klaiste mo bainobo geim blim binibbio dimo ibsa kukub misiam olo wafu binibbiobe.
Ina otane memalo ibo Yesus Klaiste bainobo gabib kesoa ibo naka mak unang maki dosuanin kukub osa atliyemin kukub osa eka funyatememin kukub osa eka weng dobo weng omin kukub osa eka weng misiam omin kukub osa alukum deibueine! 9-10 Ibo ib sinwalo maki dimo mo baabesese nimibe! Memalo ibo bobol tem misiamo sino fumbinibbuo deiboniba ib bobol tem funino mema kukub ota wafu blib kesoa ibo kukub misiam olo mo wafu nimibe! Gode ibo klanebio nakae bobol tem funino memao ibo omyenea daaye bianea am obba ye bomanomo bomanomo yo dimo Klaiste kukubo ibo amitie aleyebe kesoa ibo makob Gode ele ulab bianiba e bobol tem funino tekein kebiobe. 11 Inamin kesoa Yesus Klaiste bainobo galin nakaia unanga nibo makobobe. Nibo obianoba ibo Yudabo gese eka Ibo Yudababo gese nin kukub osa eka mak ibo aalo waketoubiobo gese eka mak ibo aalo mo waketoubibbabo gesenin kukub osa eka mak ibo weng afetobo gese eka mak ibo sesa nakabo gese nin kukub osa eka mak ibo okok nakabo gese eka mak ibo kimanin nakabo gese nin kukub osa mo wafunomobe! Niminbabe, Yesus Klaiste nakaia unanga nib bobol temo alukum bibe bie kesoa nibte ete nanoba nib bobol temo makob ambiobobe.
12 Gode ibo dlakanea Nemiobo genebio kesoa ibo emibe. E ibo kla gobe bie kesoa ibsa inaniba naka mak unang maki dohalim bianiba daaye bianiba weng fiab omkaye bianibte! Ibo ilib tako mo ngam bianibta Ni niniin sumobo galaibe! Eka kukub misiamo ib dimo tam tlamo osa ibo alo mo tliaubenomone! 13 Ib isak temo nakae waneta naka make e dimo kukub misiamo nabane mole e mo yang kenemene! E deibanea e neke kukub olo nabaneo bobolo funino dokobanoa deibaneko! Sum esa inanea nibo kukub misiamo nabobo bobolo funino dokobanoa deibenebio kesoa ibsa inaniba naka mak unang maki hengmino bobolo funino dokobenoa deibueine! 14 Ibo kukub ayam olo alukum nabianiba naka mak unang mak isa kla gobe bianiba daayemine! Naka mak unang maki gobesesenin kukub olo dot ayamobe. Kukub olo kukub afeto gaisonobiobe. Ibo naka mak unang maki kla gobe nib mole ib sinwal ib bobol temo makob anomabiobe. Ibo inaib mole ib sinwalo mo dosuanasese nomabibbabe. 15 Klaiste ibo bobol tem fiab omkayebe kesoa ibo Klaiste bobol tem fiab omkayebe olo deibueiba ibo kimanoko! Niminbabe, Gode ibo dlakanea baabenea Ibo nemi kesoa ne bobol tem fiab omyamabibo, ibo bobol tem fiab bianiba ib sinwalo mo dosuanasese nimibe, ib bobol tem funino makob aine genebio kesoa ibo e weng olo wente bianiba Gode gangobo ge ohamine! 16 Ibo Klaiste wengo kla wente bianiba ib bobol tem daako omabba bianiba fumbianibte! Ibo inamib mole e wengo kla tekein keniba ib sinwalo alebesese bianiba dlo klasese nomabiobe. Ibo e wengo kla fumbianiba Gode gangobo gabianiba komok sume Debite Gode buk temo anso dolanebu osa eka lotu kemin ans osa eka Gode Hobe anso ibo omkayebe osa ngambiam nine! 17 Ibo ilib bobol tem funino mo wafu bianibta okok osa weng osa ilib bobol temo mo namibe! Ibo weng osa okok osa namibo ibo Yesus Sume bobolo fumbianibta namine! Yesuse ibo daabenebio kesoa ibo ib Aye Gode baabaniba Kobo gang nanebta Yesuse dobyebta atdimo kaaneta ni daabenebiobo ge ohamine!
Awok aaleb kamwal isa eka i meme isa i wengobe.
18 Alelwal ibo nib Sume Yesus Klaiste bainobo geibbio kesoa ibo ib imakwali wengo kla wenteye bianiba ili weng baanimib iwat namine! Ibo inamibo Sume kin dimo ib kukub olo nabibo ayamobe. 19 Eka imakwal ibsak ib alelwali dleb wengo mo oye bianibta dosuanimibe! Kla gobe bianiba kima nine!
20 Meme ibsa ibo Yesus Klaiste bainobo gabib kesoa ibo ib biem ay kamwali wengo kla wenteye bianiba ili weng baanimib iwat namine! Ibo inamib mole Sume ib kukubo yatenea seinyemabebe. 21 Aaleb kamwal ibo ib memei mo dolbianibta dosuan bianibta atliyemino mo omkayemibe! Ibo inayemib mole i bobol tem abilo wafu bianiba i kukub ayamo mo wafunomabibbabe.
Okok naka isa i kimanin naka isa i wengobe.
22 Eka okok naka ibo ib kimanin nakai wengo kla wenteye bianiba ili weng baanimib iwat nabianiba okoko sbalma okok kemine! Ibo okoko tengo mo yebota fumbianibta Ni kimanin nakai kin dimo sbalma okok keboba i ni seinyemine gabianiba okok kebiba kimanin nakai deibe haanimibo okoko deiboniba besa bliba kimanin nakai imin tesiba yateniba yota okok kebuobo galin kukubo mo wafu nimibe! Ibo Sume Yesus Klaiste kla goba bianiba ib kimanin nakai okoko sbalma okok kemine! Ibo inamib mole Sume ib kukub olo watenea seinyemabebe. 23 Ibo inamin namin okoko okok kemibo ibo mo funanibta Ni okok olo naboba naka mak unang maki ni yateniba seinyemine galin bobol temo mo funimibe! Ib bobol tem ole Sume ni okoko watenea seinyemeko galin bobol tem ota fumbianiba ib bobol temo klayam bianiba okoko sbalma okok kemine! 24 Ibo Sume Yesus Klaiste bobolo fumbianiba okok kebib kesoa ibo tekein kebiobe, sino e baanea Sinanomo ne inamin namin ayamo ne bainobo galin nakaia unangai doyamabibo genebio kesoa e bain inanea ibo okoko ayam okok kebinib biamo molo yang kenea doyamabebe. 25 Eka nakaia unangai kukub misiamo nabib ile Gode i kukub misiamo yang kenea enin kino omyamabebe. Gode nib kukubo klanang gameo e mo funaneta Ne kimanin naka ele e kukub misiamo molo yang kenamino deibania okok naka eta e kukub misiamo molo yang kenano ge funanemebabe. E funanea I makob kesoa ne i kukub misiamo molo makob yang kenano ge funanamabebe.