18
1 Deibid wana tolohaveyan gegewel i pamigogoil, yaka wali tohouwa enuna i hilel inoke i telel boda tomaha ona, enuna tausan ali tohouwa ge enuna handeled ali tohouwa. 2 Yaka i walel boda eton, etega Yowab i nulil, eluwana Abisai iya Yowab talina hinaliya alana Seluwaiya i nulil ge etonina Itai, gagama Gat i nulil. Inoke i baek elal i ba, “Nau al ge na nowa alowau komiu.”
3 Yaa wana tolohaveyan hi baek elana hi ba, “Bahi nu nenem aloma owa. Ebo nihi takela ta lou, nasi nige nihi nuwanuwatu kaiwema. Bwagana ebo naha gewi nabi naha aliga, yaa nige nihi nuwanuwatu kaiwema. He owa te nasi am lau nihi lau, inoke owa am nuwatu i ola te ama gewi ten tausan (10,000). He i waisi te nu misikal, yaka ama labe nu papatuna eliyama.”
4 Analiya kin Deibid i lahe i ba, “Hauna ku nuwatuan kaiweu i waisi, yaka na ginol ola.”
Inoke i talmilil panuwa ana abauluulutuk bebenaa, yaka wana tolohaveyan ali boda tausan ge handeled ona hi nawa tagil. 5 He kin iyaka logugui i baunan Yowab, Abisai ge Itai elal i ba, “Nau kaiweu, nuku hehegan bubun heval Absalom elana.” Inoke sauga i baaba tohouwa elal Absalom kaiwena, tolohaveyan gegewel hi hago.
6 Yaka tolohaveyan panuwa hi eguluwan hi na ula etega alana Ula Ipileimi,*Ula Ipileimi iya ula etega alana, yaa nige tage i miminaa un Ipileimi wali labiya. Ula ya iyoho labi Giliyad, wewel Yolidani labena leunati, elana te haveyan i gana. inoke avaliyau Isileli hi petupatupa-agil ge hi lohaveyan. 7 Deibid wana tolohaveyan Isileli hi pakokovel, yaka lan o nak bwabwatana hot hi pwawa ge ali gewi tuwenti tausan (20,000) hi aliga. 8 He haveyan i nem nowa labi gegewena o elana, inoke hi gewi ula ana nak ona hi pwawa ge hi aliga, yaa bolo hi gopaaligal nige hi gegewi.
9 Heliya iyoho hi lohalohaveyan, he Absalom i heya wana miul*Ebo donki tauina alona hosi yovana hi palagolagon-agil, natuliya alana ta ba miul. Ana awa kekeisi i olak hosi ge kekeisi i olak donki. pwatanaa yaka Deibid wana tolohaveyan enuna i lilipwawal. Nuwana ni lou, yaa sauga i sola abwakil ouk bwabwatana lalana babalona gabulanaa, yaka kokowana i pano. Inoke i havakuki hawawala, yaa wana miul iyoho i mimi patapatalelu.
10 He tolohaveyan etega i kite pwawa, yaka i na i baek Yowab elana i ba, “Absalom ya kite i kukuki abwakil ouk elana.”
11 Inoke anana Yowab i lahe i ba, “Ine? Age u kite yaka nige u lolopaaliga? Binimala nu lopaaliga, he nasi na yaliyaya hot inoke silba ana gewi elulutega ge toasiyala wali wasikewa na pewa molam.”
12 Yaa anana tau o i lahe i ba, “Bwagana ebo silba ana gewi tausan maisena nu pem, yaa nige bosowaiu nimwau ni tal kin natuna elana ge na lolopaaliga. Ama gegewema ha hago kin i baewa alomwau Abisai ge Itai eliyamiu i ba, ‘Nau kaiweu bahi nak etega nuku giginol heval Absalom elana.’ 13 He binimala ebo kin natuna yawalina na apanak, tunahot wasau kin ni hago, kaiwena nige bugul etega i mimisumi elana tage nige ni aatena. Yaka owa am bwaga ni gan elau nige nu babaa labeyau.”
14 Inoke Yowab i ba, “Nige al na matamatan alou owa ta liwaliwan.” Yaka gau eton i ahel i na Absalom i howaa babagalinaa, sauga toto yawalina iyoho ya ge i kukuki abwakil elana. 15 Yaka tolohaveyan bolo Yowab wana elohaveyan ana tokaval ali gewi elulutega hi na Absalom hi mipainan inoke hi gopaaliga.
16 Yaka Yowab bwagigi i yu tolohaveyan ni pabakuhol, inoke hi veyaho petaki Isileli eliyaa. 17 He Absalom bwaliwawagana hi ahe yaka hi alipalo gol bwabwatana elana bilibili gamwanaa, inoke pat ana pwahin bwabwatana hi pahe pwatanaa. Yaa Isileli wali tolohaveyan hi lou hi na tomaha ona wali panuwaa.
18 Absalom yawalina miminana, pat mamanana etega i pamilila panuwa etega alana Kin Abwabwina elana iyoho Yelusalema bebenaa, totona alana ana abanuwahikan. I ginol ola o, kaiwena i nuwatu i ba, “Nau nige natuwau bolau hi gagan ge alau nihi pakalapapanet-an o tini elana.” Inoke totona alana i tun pwatanek pat o elana, ge gamagalau alana hi babaa ola “Absalom ana Abanuwahikan” ana siga te lan ebe.
Deibid I Lonuwanak Natuna kaiwena
19 Inoke Ahimas Seidok natuna i baek Yowab elana i ba, “Na patalelu wasa na pwatanik kin elana te Yehoba iyaka i pwamwalem ana topihigelgel nimaliyaa.”
20 Yaka Yowab i ba, “Bahiwa, lan ebe bahi owa nu nana nu wawasa. Sauga etega al abwe wasa getoga etega nu pwatanik, yaa lan ya bahiwa, kaiwena kin natuna iyaka i aliga.”
21 Inoke i baek gagama Itiyopiya*Labi Itiyopiya alana etegana al Buki Bwabwalena elana te Kus (Cush). Labi Itipita i minaa Hoga Mediteleiniya labenaa, yaa ebo ta tukik uleya abwe ta vin Itiyopiya. Gamagaliliyau tuwaliya i biki. Labi toto Buki Bwabwalena elana alana Itiyopiya, lan ebe kantri Sudan i minaa, iyoho Africa gamwanaa. etega elana i ba, “U nok u na hauna gun iyaka u kite u wasaan kin elana.” Yaka Yowab ana awatauwan kaiwena i kululu lau, inoke i patalelu egon.
22 Yaka Ahimas i ba lawalawakik Yowab elana i ba, “Bwagana hauna ebo ni gan, yaa na patalelu gagama Itiyopiya enaa.”
Inoke Yowab i baek elana i ba, “Natu, hauna kaiwena nuwam nu nok? Nige wasa waiwaisana i gagan elam ge tage kin molam ni pewa wasa o kaiwena.”
23 Yaka Ahimas i ba, “Bwagana hauna ebo ni gan, yaa nuwau na patalelu nok.”
Inoke Yowab i ba, “He nu nok.” Yaka Ahimas i patalelu egon i noek abwab elana ge gagama Itiyopiya i patalelu luwai i na i vin houwa Mahanaim.
24 He Deibid i misiyowa panuwa ana abauluulutuk ana nog toto noleleya ge toto maleleya*Panuwa ana gana pat elana hi taliya i magaga. I ola al, sauga enuna abauluulutuk ana limi i gan. Inoke nog etega i minaa noleleiya ta tuk limi gamwanaa, ge nog etega i minaa maleleya abwe ta tuk panuwa hot elana. Deibid i matamatana te, kaiwena nuwana etimwawa haveyan wasana ni hago. ali luwaluwala. Tolohaveyan etega wana tuwalali te ni kenan, yaka i na i ha gana ana abaulululutuk pwatanaa. Matana i lipwapwati, yaka tau etega i kite maisena ya i papatalelu nem. 25 Inoke i yoga lau kin wana wasa i pek.
Yaka kin i ba, “Ebo maisena ya, he wasa waiwaisana te i pwapwatanim ei.” Inoke tau toto i patalelu iyaka i tatakelakelaubwa.
26 Yaka tokenan tau etega al i kite i papatalelu nem. Yaka i yoga lau nog ana tomatahikan elana i ba, “Tau etega al to, maisena ya i papatalelu nem.”
Yaka kin i ba, “Iya al wasa waiwaisana i pwapwatanim.”
27 Inoke tokenan i ba, “Tau toto houwan wana patapatalelu ya kite i ola te Ahimas, Seidok natuna.”
Yaka kin i ba, “Iya tau waiwaisana. He wasa waiwaisana te i pwapwatanim ei.”
28 Sauga Ahimas i vin, inoke i yoga kin elana i ba, “Bugul gegewena i waisi.” Yaka maninina i pahanalowanek bilibiliya kin awonaa ge i ba, “Yehoba wam Yabowaine ta tobalan! Bolo hi awatautau owa no babala ge no kin elam, Yehoba iyaka i telel nimalaa ge ta pakokovel.”
29 Inoke kin i nel i ba, “Yaa heval Absalom i molu ya?”
Anana Ahimas i lahe i ba, “Tonowak, sauga Yowab nau ge gagama Itiyopiya toto i totuwalali elam i patunama ha nem, he samwayagayaga bwabwatana ya kite, yaa nige ya aatena hauna i gan.”
30 Inoke kin i baek elana i ba, “U talmilila ga huwo ge u matamatan.” Yaka i ginol ola wana baaba.
31 Inoke gagama Itiyopiya i vin ge i ba, “No babala ge no kin, wasa waiwaisana nu hago! Lan ebe Yehoba i pwamwaliwaem bolo hi pihigelgel elam nimaliyaa.”
32 Yaka kin i nel i ba, “Yaa heval Absalom i molu ya?”
Anana i lahe i ba, “No babala ge no kin, binimala am topihigelgel ge bolo hi awatautau elam gegewel nihi ola to heval o.”
33 He kin nuwana i nak nabi. Yaka alona wana kahin i na i ha lum toto abauluulutuk pwatanaa, i nonokahikahin i ba, “O natu Absalom! Natu, natu Absalom! Binimala nau te na aliga, owa bahiwa! O Absalom, natu, natu!”
*18:6: Ula Ipileimi iya ula etega alana, yaa nige tage i miminaa un Ipileimi wali labiya. Ula ya iyoho labi Giliyad, wewel Yolidani labena leunati, elana te haveyan i gana.
*18:9: Ebo donki tauina alona hosi yovana hi palagolagon-agil, natuliya alana ta ba miul. Ana awa kekeisi i olak hosi ge kekeisi i olak donki.
*18:21: Labi Itiyopiya alana etegana al Buki Bwabwalena elana te Kus (Cush). Labi Itipita i minaa Hoga Mediteleiniya labenaa, yaa ebo ta tukik uleya abwe ta vin Itiyopiya. Gamagaliliyau tuwaliya i biki. Labi toto Buki Bwabwalena elana alana Itiyopiya, lan ebe kantri Sudan i minaa, iyoho Africa gamwanaa.
*18:24: Panuwa ana gana pat elana hi taliya i magaga. I ola al, sauga enuna abauluulutuk ana limi i gan. Inoke nog etega i minaa noleleiya ta tuk limi gamwanaa, ge nog etega i minaa maleleya abwe ta tuk panuwa hot elana. Deibid i matamatana te, kaiwena nuwana etimwawa haveyan wasana ni hago.