9
Daniyela I Awanun Yehoba elana
1 Dalaiyas Seksis natuna, Mediya gamagalina, i tabwa kin Babiloni ge ana abalogugui elana. 2 Yel 25:11; 29:10 Wana sauga logugui ana baliman houwan gamwanaa, nau Daniyela buki bwabwalena ya vavasili. Inoke Yehoba wana baaba toto palopita Yelemaiya i lelelian ya minuwanuwatu-an, toto i ba Yelusalema ni samwalekaleka hawawal ana yapu baliman sebenti (70).*Sauga Daniyela baaba ya i vasili ge i minuwanuwatu-an, he Babiloni Yelusalema iyaka hi pasamwalekaleka haba, ge ana hawawal ana yapu baliman sebenti kelaubwa ni mowasi. 3 Inoke o galebu ya palahikan, kaliko toto bwasumu pupunoliya elana hi ginoliya ya galoi, ge tuwau ya papakove. Yaka ya awaawanun nabinabi Babala Yabowaine elana.
4 Inoke alowau gamagalau wama gegi ya lopapit Yehoba no Yabowaine elana ya ba:
“O Babala, owa Yabowaine bwabwatana ge ha kite lovakunagiwa. Wam bateli u nuwahikan ge wam nunuwana u ginol hikahikani bolo hi nunuwana-agiwa ge wam logugui hi henapuan elal. 5 Ama iyaka ha gegi, ge pagan nanakina ha ginol. Ha towaagiwa, yaka wam logugui ge wam panpankiti ali en ha pek. 6 Wam totuwalali palopitau analiya nige ha hahago, bolo valila wam baaba hi wasaan wama kin ona, wama tohouwa, tubumeyau ge wama panuwa gamagaliliyau gegewel elal.
7 “Babala, owa tosapu, yaa ama puluwawi ha kalaopopwi ana siga lan ebe, ama Yelusalema, Yuda ge Isileli gegewema, bolo ha mikelaubwa ge bolo ama bwaga i yapu ha minaa panuwa ona elal, panuwa bolo u patunama ha mibwabwaliya kaiwena ha teli gegetoga nige ha miminaa elam. 8 O Yehoba, ama alomeyau ge wama kin ona, wama tohouwa ge tubumeyau puluwawi ha kalaopopwi kaiwena ha gegi eliyam. 9 Babala wama Yabowaine, owa toatilomwan ge gegi ana tonuwayoho. He ama ha towaagiwa, 10 owa Yehoba wama Yabowaine anam nige ha hahago, ge logugui bolo u pem wam totuwalali palopitau awaliyaa nige ha totoulil. 11 Ama Isileli gegewema wam logugui ha leke ge am en ha pewa nige anam ha hahago.
“Wama gegi kaiwena inoke apapanak ge lahi bolo wam totuwalali Mosese wana logugui i baunan iyaka u ginol elama. 12 Valila u ba alomeyau ge wama tologuguiyau nu lahema, inoke wam baaba o iyaka u patunahot ge u ba nak bwabwatana i nem eliyama. He panuwa gegewel panayawi pwatanaa nige etega u aapapanak-an i oola toto u ginola Yelusalema elana. 13 Nak gegewena o i masal eliyama i ola toto Mosese wana logugui i baunan. Yaa bwagana o, nige wama gegi ana en ha pepek ge wam baaba tutunahotina ha totoulil, inoke owa Yehoba wama Yabowaine atem ni laumwal ge nu yaliyaya kaiwema. 14 Yehoba wama Yabowaine, wam ginol gegewena i sapu, ge ama nige anam ha hahago, inoke nak toto u lovivina-an, he iyaka u ginol eliyama i ola to.
15 “O Babala wama Yabowaine, nimwam gasigasisena elana wam gamagalau u ahe tagilagima Itipita elana, ge alam u pawasawasa ana siga lan ebe. Yaa ama ha gegi, ge pagan nanakina ha ginol. 16 O Babala, owa pagan sasapona ana toginol, wam huga u ahek yoho wam panuwa Yelusalema elana, iya wam oya bwabwalena. He alomeyau ge tubumeyau wama gegi kaiwena, inoke boda gegewel bolo hi minaa gegelimeya Yelusalema ge ama wam gamagalau hi kite lowagima.
17 “O wama Yabowaine, nau wam totuwalali no awanun nu hago. O Babala, alam kaiwena wam Limi Bwabwalena toto valila hi apapanak-an u pavavaluna. 18 O Yabowaine, tanam ni nem elama ge wama awanun nu laeganan. Matam ni nem elama ge alam panuwana nakina nu kite. Ha awanun elam nige tage ama tosasapol, yaa kaiwena atilomwan u kalaopopwi. 19 O Babala, wama awanun nu hago. O Babala, wama gegi nu nuwayoho. O Babala, wama awanun nu laeganan ge nu ginol ola. O no Yabowaine, alam kaiwena bahi wama awanun lahena ni eesowal, kaiwena Yelusalema alam panuwana ge ama wam gamagalau.”
Yelemaiya wana Palopisai Gabeliyel I Pwamwananal
20 Nau iyoho no gegi ge no pan Isileli wali gegi ya lolopapit Yehoba no Yabowaine elana, ge ya awaawanun wana Limi Bwabwalena kaiwena. 21 Luke 1:19,26 Sauga nau iyoho no awanun gamwanaa, inoke anelose Gabeliyel, iya valila ya kite o pankite etegana elana, i you vin elau powon ana sauga kokoyaviya. 22 Inoke i ba pwamwananal eliyau i ba, “Daniyela, ya nem ge Yelemaiya wana palopisai gamwana ana sapu na talisian nu hago. 23 Sauga wam awanun u telipuna, Yehoba wam awanun lahena i baunan, yaka nau ya nem ge na wasaan elam, kaiwena i nunuwana-agiwa nabiyan. He nu laegan wam awanun lahena nu hago, ge hauna Yehoba nuwana ni pankitewa ana sapu nu atena.
24 “Yehoba logugui iyaka i ginol haba baliman seben nihi gan pasebenti wam gamagalau ge wam panuwa bwabwalena Yelusalema kaiweliya. Yaka baliman bolo o eliyalil, gamagalau wali ginol likalika ge wali gegi paganina ni pwamowasi, pagan nanakina ni yakil yoho, logugui sasapona ni pamilil ni mihot, palopitau ali pankite ni tabwa tunahot, ge Aban Bwabwalena Hot*Aban Bwabwalena Hot iya Limi Bwabwalena gamwana toto maleleya hot i minaa kaliko hi pakuki enaa. Totagil 26, Totagil 25:10-22 ge Hibilu 9:2-3 nu kite. ni pwabwabwalena al.
25 “He nuwam ni sapu baaba hiwe kaiwena: tologugui etega abwe ni ba Yelusalema nihi tal pasikal, yaka ni telipunaa sauga o ni na ana siga tohouwa toto Yehoba wana hilihili gamagalina ni nem, he baliman seben paseben ge baliman seben ali gewi sikisti tu (62) nihi mowasi ga.*Baliman seben paseben ge baliman seben ali gewi sikisti tu (62), he baliman ali gewi 69 taims 7, o ebo ta ba baliman 483. Ebo ta telipunaa Yelusalema ana tal pasikal ana sauga elana ge baliman 483 ta vasilel, he bosowaina ta vin Yeisu wana sauga elana. (He sauga Yelusalema nihi tal pasikal, ginebi ana kamwasa ona ge ana gana gasigasisena, yaa sauga o elana nasi ni pulowan hot Yehoba wana gamagalau elal.) 26 Baliman seben ali gewi sikisti tu (62) o nihi mowasi, yaka Yehoba wana hilihili gamagalina nihi lopaaliga, ana kite ni ola nige wana abalogugui i gagan. Yaka tohouwa etega ni masal inoke wana boda Yelusalema ge Limi Bwabwalena nihi apapanak-an. (Yaa iya abwe ni mowasi, wana mowasi nakina ni ola banata wana apapanak.) Yehoba logugui iyaka i ginol haba haveyan ge apapanak nihi gangan ni na ana siga abapwamowasiya. 27 Dan 11:31; 12:11; Mat 24:15; Mak 13:14 Tohouwa o alonau ge gamagalau nihi gewi nihi pebabateli-agil ge bateli o nihi pagasisi baliman seben*Baliman seben toto ya baliman seben pasebenti (puna 24) gamwana etegana. Puna 25 i liwan baliman seben ali gewi 69 kaiwena, inoke sebenti-ina liwanina te puna 27 elana. kaiwena. Yaa baliman seben o ali nuwanuwanaa, powon ge mulolu bolo hi giginol Yehoba elana ni lopwali ge ni paveyaho. Yaka Limi Bwabwalena pwatanaa toapapanak bwaibwaikikinina ni pamilil ge ni minaa o ana siga Yehoba tohouwa toto apapanak i giginol ni pwamowasi, ni ola te iyaka i logugui-an haba.”
9:2: Yel 25:11; 29:10
*9:2: Sauga Daniyela baaba ya i vasili ge i minuwanuwatu-an, he Babiloni Yelusalema iyaka hi pasamwalekaleka haba, ge ana hawawal ana yapu baliman sebenti kelaubwa ni mowasi.
*9:24: Aban Bwabwalena Hot iya Limi Bwabwalena gamwana toto maleleya hot i minaa kaliko hi pakuki enaa. Totagil 26, Totagil 25:10-22 ge Hibilu 9:2-3 nu kite.
*9:25: Baliman seben paseben ge baliman seben ali gewi sikisti tu (62), he baliman ali gewi 69 taims 7, o ebo ta ba baliman 483. Ebo ta telipunaa Yelusalema ana tal pasikal ana sauga elana ge baliman 483 ta vasilel, he bosowaina ta vin Yeisu wana sauga elana.
9:27: Dan 11:31; 12:11; Mat 24:15; Mak 13:14
*9:27: Baliman seben toto ya baliman seben pasebenti (puna 24) gamwana etegana. Puna 25 i liwan baliman seben ali gewi 69 kaiwena, inoke sebenti-ina liwanina te puna 27 elana.