16
Aanan Manna ge Bwasumu Kuweli
1 Isileli ali boda Ilima hi tataluwai, inoke waikena eluwana ana lan piptin-ina hi na hi vin Sini Ulaina elana, Ilima ge Sainai ali luwaluwala. 2 He Isileli ali boda heliya iyoho to ula kekevana elana, yaka Mosese ge Eloni hi lovehawol-agil 3 hi ba, “Binimala Yehoba ni lolima Itipita. Valila ama lolan i bwaya ge aanan nige bosowaima naha an haba. Yaa komiu ku ahema ha nem ula kekevana ya elana inoke galebu kaiwena gegewema naha aliga.”
4 Diyo 6:31 Yaka Yehoba i baek Mosese elana i ba, “Sauga ya aanan na ligin paloem labulabumwa kaiwemiu. Lan maisena maisena gamagalau nihi tagilan lan maisena ana luvi nihi ahe. Inoke eliyana na labosel ebo no logugui nihi henapuan o ebo nigeya. 5 Lan sikis-ina elana lan labui ana luvi nihi ahe ge nihi lovivina-an.”
6 Inoke Mosese ge Eloni hi baek Isileli gegewel elal hi ola, “Nasi kokoyavi nuku atena te Yehoba heiya te i ahemiu ku tagilem Itipita. 7 I ola al, mweluluga Yehoba mwananalina namanamalina nuku kite, kaiwena wami lovehawol iya eliyana iyaka i hago. He ama wana totuwalali ya, inoke nige ku lolovehawal eliyama.” 8 Yaka Mosese i ba vevehe al i ba, “Yehoba iya kokoyavi ami lolan ni pewa ge mweluluga aanan ni bwata ni pewa, kaiwena wami lovehawol iya eliyana iyaka i hago. Ama nige ku lovehawol-agima, Yehoba te ku lovehawol-an.”
9 Yaka Mosese i baek Eloni elana i ba, “U ba Isileli ali boda elal nihi nem nihi talmilila Yehoba awonaa, kaiwena wali hawohawol iyaka i hago.” 10 He Eloni iyoho i baaba Isileli ali boda elal, yaka mataliya hi lipwatanik ula kekevana elana ge Yehoba mwananalina namanamalina hi kite i masala yaluyaluwa.
11 Yaka Yehoba i baek Mosese elana i ba, 12 “Isileli wali hawohawol iyaka ya hago. He nu baek elal nu ba, ‘Vekokoyavi lolan nuku an ge mweluluga aanan ni bwata nuku an. Inoke nuku atena te nau Yehoba wami Yabowaine.’ ”
13 Kokoyaviya bwasumu kuweli* Kuweli wali pagan i ola kulihi, bosowailiya nihi you, yaa nige toyouyou hot i oola. ali yawi bwabwatana hi you vin abaholavi hi pakalaopop. Mweluluga bekubeku hunhunina abaholavi i yao painan bilibili pwatanaa. 14 Sauga bekubeku hunhunina i kevakeva, yaka bugul etega i masal bilibili pwatanaa, i alalavi ge i lokekeisi. 15 1Kol 10:3 Sauga Isileli hi kite, yaka hi penelnel-agil hi ba, “Hauna gun e?” kaiwena nige hi atena hauna eba o.
Yaa Mosese i baek elal i ola, “Aanan toto Yehoba i pewa amiu, heiya te. 16 Yehoba wana logugui i ola hiwe, ‘Ami luvi toto bosowaimiu te nuku ahe. Wami limi ana heniheni gamagal maisena maisena ana luvi kom eit* Pana Hibilu i ba, “omel maisena.” Omel heliya wali eluviluvi, ana bwata i ola lita labui (2 litres). nuku ahe.’ ”
17 Yaka Isileli hi na hi ahe i ola to. Enuna i bwata hi ahe ge enuna nige i bwabwata hi ahe. 18 2Kol 8:15 Yaa sauga eluviluvi elana hi luvi, gegewel hi ahe bubun. Bolo i bwata hi ahe ali luvi nige i lilika, ge bolo nige i bwabwata hi ahe ali luvi nige i lalau. Gegewel hi ahe paolaolaek wali limi ana heniheni ana luvi.
19 Yaka Mosese i baek elal i ba, “Bahi etega nuku aan teli bwaligumwa kaiwena.” 20 Yaa enuna Mosese anana nige hi hahago, yaka awalehina hi an teli. Lan i gan iyaka i kinol ge i bweyan, inoke Mosese i huga eliyalil.
21 Mweluluga gegewena gamagal maisena ge maisena i ahe paolaolaek wana limi ana heniheni ana luvi. Sauga sabwelu iyaka i kalakalas, toto nige hi aahe i wayui. 22 Lan sikis-ina elana lan labui ana luvi hi ahe, gamagal maisena ge maisena ana luvi kom sikistin (16) hi ahe. Yaka boda wali tohouwa hi nem Mosese wana wasa hi pek. 23 Tota 20:8-11 Inoke i baek elal i ba, “Yehoba wana logugui i ola hiwe, ‘Bwaligumwa Sabwata lan veyaho, i bwabwalena Yehoba elana. Toto ku uumun, nuku umun, ge toto ku liliga, nuku liga. He toto nuku an teli, nuku teli bwaligumwa kaiwena.’ ”
24 Inoke hi ginol ola Mosese wana baaba. Enuna hi teli ana siga mweluluga, yaa nige i kikinol ge nige i bwebweyan. 25 Yaka Mosese i baek elal i ba, “Lan ebe aanan ya nuku an, kaiwena Sabwata veyaho ana lan te, i bwabwalena Yehoba elana. Lan ya nige aanan etega nuku pwapwawa bilibili pwatanaa. 26 Lan sikis amiu nuku ahiahi, yaa lan seben-ina elana, lan Sabwata, nige aanan etega nuku pwapwawa.”
27 Yaa lan seben-ina elana gamagal enuna hi tagil hi na tage aliya nihi ahi, yaa nige etega hi pwapwawa. 28 Inoke Yehoba i baek Mosese elana i ba, “Hauna sauga abwe no logugui nuku henapuan? 29 Nuku nuwahikan nau Yehoba lan veyaho ya pewa, inoke lan sikis-ina elana amiu na pewa lan eluwa ana luvi. Lan seben-ina elana maisena maisena ni minaa abanaa, bahi etega ni tatagil.” 30 Inoke lan seben-ina elana gamagalau hi veyaho. 31 AlGe 11:7-8 He Isileli aanan alana hi tun manna.* Pana Hibilu elana, vilan “manna” ana sapu te “Hauna gun e?” Sauga Isileli hi kite, yaka hi penelnel-agil hi ba, “Hauna gun e?” (puna 15) Ana awa i ola pwatum yayanana etega, ge amnana i ola bisket alona luvi hi vikuhu.
32 Mosese i ba, “Yehoba wana logugui i ola hiwe, ‘Manna kom eit nuku teli hikan ha mul kaiweliya. Inoke aanan nihi kite, toto ya pewa ku anana uleya sauga ya ahe tagilagimiu Itipita.’ ”
33 Hib 9:4 Inoke Mosese i baek Eloni elana i ba, “Manna kom eit nu wage, nu usan ulugomwa gamwanaa, inoke nu teliya Yehoba matanaa ha mul kaiweliya.” 34 Inoke Eloni i ginol ola Yehoba wana baaba Mosese elana. Manna i usan ulugomwa gamwanaa ge sauga mulaa i teli Bateli ana Dedewaga gamwanaa pat mamanana sasapona labui awoliyaa, bolo logugui ana leleli i gana tuwaliyaa. 35 Yos 5:12 Isileli manna hi anan uleya baliman ana gewi poti (40) ana siga hi vin labi Kenani.
36 (He wali eluviluvi ipah* Ipah (ephah) Hibilu wali eluviluvi bwabwatana ana bwata i ola 20 lita (20 litres). Isileli manna hi ahe ana bwata omel maisena o ebo ta ba kom eit wali limi ana heniheni ana gamagal maisena ge maisena kaiwena. (puna 16) gamwanaa, omel ali gewi elulutega.)
*16:13: Kuweli wali pagan i ola kulihi, bosowailiya nihi you, yaa nige toyouyou hot i oola.
*16:16: Pana Hibilu i ba, “omel maisena.” Omel heliya wali eluviluvi, ana bwata i ola lita labui (2 litres).
16:31: AlGe 11:7-8
*16:31: Pana Hibilu elana, vilan “manna” ana sapu te “Hauna gun e?” Sauga Isileli hi kite, yaka hi penelnel-agil hi ba, “Hauna gun e?” (puna 15)
*16:36: Ipah (ephah) Hibilu wali eluviluvi bwabwatana ana bwata i ola 20 lita (20 litres). Isileli manna hi ahe ana bwata omel maisena o ebo ta ba kom eit wali limi ana heniheni ana gamagal maisena ge maisena kaiwena. (puna 16)