8
Wali Nawa Sikal Yelusalema Liwanina
Tini ona wali tohouwa avaliyau wali gamagalau, alowau ha egona Babiloni naha nok Yelusalema. (puna 1-14)
Gamagalau bolo o ya pamigogoil wewel bebenaa, toto i sasani noek panuwa Ahava ge ha holaviya ga o lan eton. Ya kite te gamagalau ge topowon heliya iyoho, yaa un Libai nige etega ya pwapwawaa to. Inoke gamagalau enuna ya patunal hi na Ido elana, iya un Libai panuwa Kasipiya wali tohouwa. Ya ba nihi ba Ido ge alonau elal Libai enuna nihi patunam bosowaina abwe nihi totuwalali Yabowaine wana Limi eliyana. Wama Yabowaine i minaa eliyama ge i muloluagima, yaka un Libai enuna hi patunal eliyama. (puna 15-20)
21 Inoke wewel Ahava bebenaa ya ba gegewema ama galebu naha palahikan, inoke naha pahanalowagima wama Yabowaine matanaa ge naha awanun elana ni matahikagima, yaka ama ge natumeyau ginebi wama gogomwau wama nawanawa ni waisi. 22 He ya puluwawi te na awanun kin elana tolohaveyan ge bolo hi heya hosi pwataliyaa nihi matahikagima topihigelgel elal kamwasaa, kaiwena iyaka kin wana wasa ha pek ha ba, “Gamagal gegewel bolo mataliya ni noek Yehoba elana, iya ni muloluagil, yaa bolo ana en nihi pek gegewel wana huga bwabwatana nihi pwawa.” 23 Inoke galebu ha palahikan ge ha awaawanun wama Yabowaine elana nuwatu o kaiwena, yaka wama awanun i lahe.
Inoke topowon ali gewi elulutega eluwa ya hilel. Yaka silba, gold ge bugubugul bolo kin alonau wana totuwalali ge Isileli gamagaliliyau hi guyauan Yabowaine wana Limi kaiwena ya pek elal, ge nihi matahikan ana siga naha vin Yelusalema. (puna 24-30)
31 Weikena houwan ana lan tuwel-ina*Kila wala kalenda elana 19 Eipul baliman 458 M.K te hi egona wewel Ahava. te ha egona wewel Ahava naha nok Yelusalema. Wama Yabowaine i minaa eliyama ge i muloluagima, inoke i matahikagima topihigelgel ge toginol naknak eliyalil kamwasaa. 32 Inoke ha vin Yelusalema ge lan eton ha veyahoan.
Lan esopalena elana ha na Yabowaine wana Limiya yaka silba, gold ge bugubugul ha pek topowon Melemot elana. Yaka bwasumu hi gewi ha powon pwabwaligel Yehoba elana. (puna 33-36)