Abatelipuna
Baaba Houwan
Buki toto ya bugul hi gewi ali abatelipuna i liwanan, ololal panayawi ge gamagalau ali abatelipuna, gegi ge lomwan ali abatelipuna, ge Yehoba wana gamagalau Isileli wali abatelipuna. I pankitela Yehoba alona ge gamagal hi pebabateli-agil. Bwabwatana hot te wana bateli Abalahama elana.
Awalehina 1 ana siga 11:26 i liwanan Yehoba panayawi i ginol ge gamagalau houhouwel liwaniliya, ololal Adama ge Ive, Keni ge Eibol, ge Nowa alonau natunau. Awalehina 11:27 ana siga awalehina 50 Isileli tubutubuliyau houhouwel liwaniliya: Abalahama, Aisake, Yakobo (alana etegana al Isileli) ge Yakobo natunau ali gewi tuwel. Yakobo natunau gamwaliyaa Yosepa liwanina i bwata hot. I liwanan ga i ola ge Yosepa i houwa i na Itipita, yaka abwe tamana Yakobo alonau natunau enuna al hi nok to ge hi miminaa panuwa o elana.
Buki ya gamagalau tomaha tomaha liwaniliya, yaa i bosowaina hot ta ba gegewena Yabowaine liwanina. Iya gamagalau i ginolil, bolo hi gegi i lahel, alonau ge gamagalau hi pebabateli-agil, wana gamagalau i nulil ge i label, ge iya i logugui-an hauna i masal.
1
Abatelipuna elana Yabowaine Bugul Gegewena I Ginolil
Abatelipuna elana Yabowaine labulabum ge panayawi i ginolil. He panayawi i enonovan ya, ge nigeya ga ana awa i mamasal i oola te sauga ya. Gogou kubwa wewel limwalimwanina i yabom, ge Yabowaine Yayaluwana i nononawanawa wewel pwatanaa.
2Kol 4:6 Yaka Yabowaine i ba, “Mwananal ga ni gan,” inoke mwananal i gan. Inoke Yabowaine i kite mwananal i waisi. Mwananal ge gogou i teli walel, yaka mwananal alana i tun “lan” ge gogou alana i tun “bulin.” He bulin i mowasi ge lan i mowasi,* Sabwelu lobelobekina i na ana siga lan etega al sabwelu lobelobekina, he Isileli wali lan bwabwaligena to. lan houwan to.
2Pit 3:5 Yaka Yabowaine i ba, “Hawawal ga ni gan wewel ali luwaluwala ge wewel ni walel.” Yabowaine hawawal i ginol yaka wewel i wali eluwe, etega i minaa hawawal pwatanaa ge etega i minaa gabulanaa. Inoke i gan i ola to. Yaka Yabowaine hawawal alana i tun “labulabum.” He bulin i mowasi ge lan i mowasi, lan eluwana to.
Yaka Yabowaine i ba, “Wewel toto labulabum gabulanaa ni tub pahipahi, inoke bilibili kekevana ni masal.” Inoke i gan i ola to. 10 Yaka Yabowaine bilibili kekevana alana i tun “datu,” ge wewel i tub pahipahi alana i tun “hoga.” Inoke Yabowaine i kite i waisi.
11 Yaka Yabowaine i ba, “Bugul siusiunil ga nihi siun datuwa: mwawin bolo enowaliya pwatum ge ebwakil bolo enowaliya pwatumwina gaganina ali awa tomaha ge tomaha.” Inoke i gan i ola to. 12 Bugul siusiunil hi siun datuwa: mwawin ali awa tomaha tomaha ge ebwakil ali awa tomaha tomaha. Inoke Yabowaine i kite i waisi. 13 He bulin i mowasi ge lan i mowasi, lan etonina to.
14 Yaka Yabowaine i ba, “Mwananal ona ga nihi gan labulabumwa, heliya lan ge bulin nihi teli walel, nihi ola etotohi tal, lan, ge baliman kaiweliya, 15 ge nihi yana labulabumwa panayawi nihi yane.” Inoke i gan i ola to. 16 Yabowaine mwananal bwabwatal labui i ginolil, toto mwananalina bwabwatana lan ni logugui-an, ge toto mwananalina kekeisi bulin ni logugui-an. I ola al putum i ginolil. 17 Yabowaine i telel labulabumwa panayawi nihi yane, 18 lan ge bulin nihi logugui-an, ge mwananal ge gogou nihi teli walel. Inoke Yabowaine i kite i waisi. 19 He bulin i mowasi ge lan i mowasi, lan esopalena to.
20 Yaka Yabowaine i ba, “Bugul bolo yawaliliya gaganil hoga ga nihi pakalaopop, ge bwasumu ga nihi youyou hawawala panayawi pwatanaa.” 21 Yabowaine moti bwabwatal hot ge bugul yawaliliya gaganil bolo hi nawanawa hogaa ge hi pakalaopop, ali awa tomaha ge tomaha i ginolil. I ola al bwasumu bolo hi youyou ali awa tomaha ge tomaha i ginolil. Inoke Yabowaine i kite hi waisi. 22 Yaka Yabowaine i ba muloluagil i ba, “Moti, nuku talaabab ge nuku gewi, yaka nuku debalala hoga nuku pakalaopop. Bwasumu bolo ku youyou, nuku gewi yaka nuku debalala panayawi pwatanaa.” 23 He bulin i mowasi ge lan i mowasi, lan nimala panunana to.
24 Yaka Yabowaine i ba, “Bwasumu yawaliliya gaganil ali awa tomaha ge tomaha nihi masal datuwa: bolo totounuwal, bolo hi yawayawal bilibili pwatanaa, ge bolo bekikil, ali awa tomaha ge tomaha.” Inoke i gan i ola to. 25 Yabowaine bwasumu bekikil ali awa tomaha ge tomaha, bwasumu totounuwal ali awa tomaha ge tomaha, ge bugul bolo hi yawayawal bilibili pwatanaa ali awa tomaha ge tomaha i ginolil. Inoke Yabowaine i kite i waisi.
26  1Kol 11:7 Yaka Yabowaine i ba, “Gamagal ga ta ginol totola kanukanunula elana ge ni ola kila, yaka moti hogaa, bwasumu hawawala, bwasumu totounuwal, bwasumu bekikil ge bwasumu bolo hi yawayawal bilibili pwatanaa gegewel nihi logugui-agil.” 27  Mat 19:4; Mak 10:6 Aba 5:1-2 Yabowaine gamagal i ginol totona kanukanununa elana, he iya Yabowaine totona kanukanununa elana i ginolil; gamagalau i ginolil tau ge yova. 28 Yaka Yabowaine i ba muloluagil i ba, “Nuku talaabab ge nuku gewi, yaka nuku debalala panayawi nuku pakalaopop ge ni minaa wami logugui gabulanaa. Moti hogaa, bwasumu hawawala ge bugul gegewel yawaliliya gaganil bolo hi nawanawa bilibili pwatanaa nuku logugui-agil.”
29 Yaka Yabowaine i baek elal i ba, “Mwawin gegewel panayawi pwatanaa bolo enowaliya pwatum ge ebwakil gegewel bolo enowaliya pwatumwina gaganina ya pewa. He nuku ahel aanan kaiwena. 30 Ge bwasumu gegewel panayawiya, bwasumu gegewel hawawala, ge bwasumu gegewel bolo hi nawanawa bilibili pwatanaa—he bugul gegewel yawaliliya gaganil—mwawin ge ebwakil lamwaliya gegewel ya pek eliyalil aanan kaiwena.” Inoke i gan i ola to. 31 Inoke Yabowaine bugul gegewel i ginolil i kitel hi waisi hot. He bulin i mowasi ge lan i mowasi, lan sikis-ina to.

1:3: 2Kol 4:6

*1:5: Sabwelu lobelobekina i na ana siga lan etega al sabwelu lobelobekina, he Isileli wali lan bwabwaligena to.

1:6: 2Pit 3:5

1:26: 1Kol 11:7

1:27: Mat 19:4; Mak 10:6

1:27: Aba 5:1-2