Godɨn Eghaghanim: Akar Gavgavir Dɨkɨrɨzir Ghurim ko Igiam 1 Korin 10

Ia uaribagh gan, ia ifavariba ko osɨmtɨziba bangɨn iran markɨ

1 Nan adarasi, ia kamaghɨn foghasa kɨ ifonge. Mosesɨn dughiamɨn, en ovaviba bar ghuariar God tuavimɨn men akakazimɨn apengan iti. Ezɨ me bar deravɨra Ongarir Aghevim abigha ghue. 2 Egha me bar ghuariam ko ongarimɨn rurim ini, ezɨ rurir kam me gamizɨma, me Mosesɨn gɨn aruir gumazamizibar otifi. 3 Egha me bar moghɨra dagher God me ganɨngiziba ame. 4 Egha me bar moghɨra dɨpar God me ganɨngiziba ame. God dagɨar me ko aruim gamizɨma, dɨpam an ikegha otivaghirima, me aneme. Ezɨ dagɨar kam, a Krais uabɨ.* 5 Ezɨ God gumazamizir kabar avɨriba, men arazibagh ifongezir puvatɨ. Kamaghɨn, God me mɨsuagharigha, men kuaba tintinimɨn danganir dɨpaba puvatɨzimɨn pura da kavamangi.

6 Ezɨ arazir me amizir kaba, da mati ababaniba, e dar ganigh ua men mɨn bizir kuraba bagh naviba dɨkavan kogham. 7 Mati me marazi amizɨ moghɨn, ia marvir guabar ziaba fan markɨ. Godɨn Akɨnafarim kamaghɨn mɨgei, “Me apiagha dagheba ko dɨpaba amegha, gɨn dɨkavigha ghua ighiar kurabagh ami.” 8 Mati men marazi amizɨ moghɨn, e gumazamiziba uari bakɨava akuir arazim damuan kogham. Ia fo, dughiar vamɨran, men 23,000pla gumazamiziba ariaghire. 9 Mati men marazi amizɨ, kuruzir kuraba me givima me ariaghirezɨ moghɨn, e Krais bizitam damusɨ a gakaghonan kogham. 10 Mati men marazi amizɨ, Ovevemɨn Ensel iza me mɨsoghezɨ me ariaghirezɨ moghɨn, Ia God gimoman markɨ.

11 Bizir me batozir kabanang, da mati ababaniba, eghtɨ gumazir igharaziba dar ganam. God kamaghɨn ifonge, da nɨghnɨzim e datɨrɨghɨn itir gumazamizibar anightɨ, e deraghvɨra uari bagh ganam. Kamaghɨn, gumazamiziba fomɨra eghaghanir kaba Godɨn Akɨnafarimɨn e bagha da osiri. Dughiar e itir kam, kar nguazim gɨvamim dughiar abuananam.

12 Kamaghɨn, gumazitam o amizitam suam, kɨ tugha gavgafi, a deragh gan, egh iran markɨ. 13 Osɨmtɨzir ia bativiba, da osɨmtɨzir kabanangɨra, gumazamiziba bar me batifi. Ezɨ God uan akar dɨkɨrɨzimɨn gɨn ghua, osɨmtɨzir ian gavgavibagh afirazɨ tam ateghtɨ, a ia batoghan kogham. Osɨmtɨziba ia bativtɨ, God ian akuraghsɨ tuavim damigham. Tuavir kam kamakɨn: a ia damightɨ, ia tuivigh gavgavigham, eghtɨ osɨmtɨzir kam ia abɨraghan kogham.

E God ko marvir guam vɨrara aningɨn ziaba fan kogham

14 Kamaghɨn, nan namakaba, ia marvir guabar ziaba fer arazimɨn saghon ikɨ. 15 Ia fofoziba iti, kamaghɨn kɨ ia mɨgei. Ia uari nan akaba tuisɨgh. 16 Kavɨn kam Godɨn bizir aghuiba an itima, e a bagha God mɨnabi. E an wainɨn dɨpam apir dughiamɨn an e gamima, e bar moghɨra uari inigha Kraisɨn ghuzimɨn posi. Ezɨ bretɨn e bɨzir kam, e anepir dughiamɨn, an e gamima, e bar moghɨra uari inigha Kraisɨn inivafɨzimɨn posi. 17 Bretɨn rubuzir vamɨra iti, ezɨ e bar moghɨra uari inigha bretɨn rubuzir kamnaghɨram apa, kamaghɨn e gumazamizir avɨriba, e inivafɨzir vamɨra iti.

18 Ia Israelian arazim gɨnɨghnɨgh. Me ofa gamir dakozim gisɨn tuezir asɨziba apir dughiamɨn, me uari inigha ofa God ganɨdi.†

19-20 Kɨ kamaghɨn mɨgeir puvatɨ, asɨzir me isa ofan mɨn marvir guabagh anɨdiba, da bizir ekiam, o marvir guaba da bizir ekiaba. Puvatɨ, da pura biziba. Guizbangɨra, kɨ kamaghɨn mɨgei, Godɨn ziam fer puvatɨzir darazi ofa gamir biziba, me da isa asebagh anɨdi. Me God bagha ofa gamir puvatɨ. Egh ia uari inigh aseba ko poghan, kɨ aghua. 21 Ia Ekiamɨn kap ko asebar kap vɨraram aningɨn daman markɨ. Egh ia Ekiamɨn dagher dakozim ko asebar dagher dakozim vɨraram aningɨn daman markɨ.

22 E ti Ekiam damightɨ, an navim ikuvigham o? En gavgavim ekevegha, Ekiamɨn gavgavim gafiras? Bar puvatɨ!

E zurara Godɨn ziam fam

23 Marazi ghaze, “God en amamangarɨgha ghaze, e biziba bar dar amuam.” Ezɨ e amir bizir maba deravɨra en akurvazir puvatɨ. Marazi ghaze, “God en amamangarɨgha ghaze, e biziba bar dar amuam.” Ezɨ e amir bizir maba, e Kraisɨn adarasi, da gavgavim e ganɨdir puvatɨ. 24 E uarira uarir akurvaghsɨ, nɨghnɨghan kogham. Puvatɨ, e igharaz darazir akurvaghsɨ nɨghnɨgham.

25 Asɨzir me maketɨn amadiba, ia dar amɨ. Egh navir averiamɨn nɨghnɨzir avɨribar amu, tintinimɨn azangsɨghan markɨ suam, a dera o a ikufi. Puvatɨ.‡ 26 E fo, Godɨn Akɨnafarim ghaze, “Nguazir kam ko an itir biziba bar, da bar moghɨra Ekiamɨn biziba.”

27 Eghtɨ gumazamizir nɨghnɨzir gavgavim Iesusɨn itir puvatɨzitaba, ia ko damɨsɨ ia mɨkɨmtɨ, ia ifongegh, me ko mangɨ. Dagher manam me ia danightɨ, ia pura aneremɨ. Nɨ navir averiamɨn nɨghnɨzir avɨribar amu, pura tintinimɨn azangsɨghan markɨ suam, dagher kam deras, o a ikufi. 28 Eghtɨ tav ia mɨkɨm suam, “Dagher kaba, me da isa, marvir guabar ofa gami.” Eghtɨ ia gumazim o amizir ia mɨkemezim bagh nɨghnigh, daman markɨ. Ia pazɨ damuan markɨ. 29 Ia paza uarir amuasa, kɨ ia mɨgeir puvatɨ. Kɨ gumazir igharazir kamɨn mɨgei, a ua suam, ia pazav ami.

Eghtɨ tav kamaghɨn azangsɨgham, tizim bagh kɨ gumazamizir igharazibar nɨghnɨzimɨn gɨn mangɨva, bizir kɨ damuamim, kɨ a damuan kogham?§ 30 Kɨ God mɨnabagh damɨtɨ, gumazamizir igharaziba tizim bagh mɨgɨrɨgɨar kurabar nan dagher kɨ God mɨnabazir kabav kɨmam?

31 Kamaghɨn, ia dagheba api, o ia dɨpaba api, o ia bizir igharazibagh ami, ia ziar ekiam God danɨngɨsɨ, bizir kaba bar dar amu. 32 Ia Judaba ko Kantrin Igharazibar Gumazamiziba ko Kraisɨn adarazigh nɨghnɨghɨva, egh me damutɨ, me arazir kuramɨn iran markɨ. 33 Egh kɨ amir arazibara, ia dar gɨn mangɨ. Kɨ kamagh sua, God gumazamiziba bar men akurvaghasa. Kamaghɨn, kɨ amir araziba bar, me damightɨ, me dagh ifuegham. Kɨ uabɨ uabɨn akurvaghasa amir puvatɨ, kɨ gumazamizir igharazibar akurvaghasava ami.

10:1: Kis 13:21-22, 14:22-29, Nam 9:18, Neh 9:12, Sng 78:13

10:1: Ua Me Ini 13:21-22; 14:22-29; Dɨboboniba 9:18; Nehemia 9:12; Onger Akaba 78:13

10:3: Kis 16:35, Neh 9:15, 9:20, Sng 78:24

10:3: Ua Me Ini 16:35; Nehemia 9:15; 9:20; Onger Akaba 78:24

10:4: Sng 78:15

10:4: Onger Akaba 78:15

*10:4: Akɨnafarir Mosesɨn ingangarimɨn gun mɨgeiba, da mɨgɨrɨgɨar otevir pumuning iti, aning Israelia dɨpam dagɨamɨn a inizir arazim geghari. Mam, Ua Me Ini 17:1-7ɨn iti, ezɨ mam Dɨboboniba 21:1-13ɨn iti. Judabar marazi ghaze, mɨgɨrɨgɨar otevir kamning dagɨar vamɨram eghari. Dagɨar kam Israelian gɨn danganir me aruiba bar dagh arui.

10:5: Nam 14:16, 14:29-30, Sng 106:26, Hi 3:17, Ju 5

10:5: Dɨboboniba 14:16; 14:29-30; Onger Akaba 106:26; Hibru 3:17; Jut 1:5

10:6: Nam 11:4, 11:34, Sng 106:14, 1 Ko 10:11

10:6: Dɨboboniba 11:4; 11:34; Onger Akaba 106:14; 1 Korin 10:11

10:7: Kis 32:6, 1 Ko 10:14

10:7: Ua Me Ini 32:6; 1 Korin 10:14

10:8: Nam 25:1-18, Sng 106:29, MAA 2:14

10:8: Dɨboboniba 25:1-18; Onger Akaba 106:29; Akar Mogomem 2:14

10:9: Kis 17:2, 17:7, Nam 21:5-6, Lo 6:16

10:9: Ua Me Ini 17:2; 17:7; Dɨboboniba 21:5-6; Godɨn Araziba 6:16

10:10: Kis 16:2, Nam 14:2, 14:29, 14:37, 16:41-49, 1 Sto 21:15, Hi 3:11, 3:17

10:10: Ua Me Ini 16:2; Dɨboboniba 14:2; 14:29; 14:37; 16:41-49; 1 Eghaghaniba 21:15; Hibru 3:11; 3:17

10:11: Ro 15:4, 1 Ko 10:6, Fl 4:5, Hi 10:25, 10:37, 1 Pi 4:7, 1 Jo 2:18

10:11: Rom 15:4; 1 Korin 10:6; Filipai 4:5; Hibru 10:25; 10:37; 1 Pita 4:7; 1 Jon 2:18

10:13: Jer 29:11, 1 Ko 1:9, 2 Pi 2:9

10:13: Jeremaia 29:11; 1 Korin 1:9; 2 Pita 2:9

10:14: 2 Ko 6:17, 1 Jo 5:21

10:14: 2 Korin 6:17; 1 Jon 5:21

10:16: Mt 26:26-28, Mk 14:22-24, Lu 22:19-20, Ap 2:42, 2:46

10:16: Matyu 26:26-28; Mak 14:22-24; Luk 22:19-20; Aposel 2:42; 2:46

10:17: Ro 12:5, 1 Ko 12:27, Ef 4:16

10:17: Rom 12:5; 1 Korin 12:27; Efesus 4:16

10:18: Wkp 7:6, 7:15

10:18: Ofa Gami 7:6; 7:15

†10:18: Grighɨn akamɨn, vezɨn kam deragha mɨgɨrɨgɨam a bɨghizir puvatɨ.

10:19-20: Godɨn Araziba 32:17; Onger Akaba 106:37; 1 Korin 8:4; Akar Mogomem 9:20

10:21: Lo 32:38, 2 Ko 6:15-16

10:21: Godɨn Araziba 32:38; 2 Korin 6:15-16

10:22: Lo 32:21, Ese 22:14

10:22: Godɨn Araziba 32:21; Esekiel 22:14

10:23: 1 Ko 6:12

10:23: 1 Korin 6:12

10:24: Ro 15:1-2, 1 Ko 13:5, Fl 2:4, 2:21

10:24: Rom 15:1-2; 1 Korin 13:5; Filipai 2:4; 2:21

‡10:25: Dughiar mabar me asɨziba marvir guabar ofa gamua, egha gɨn da isa ghua maketɨn da amadi. Ezɨ Pol kamaghɨn mɨgei, Kraisɨn adarazi maketɨn ivezir asɨzibagh nɨghnɨgh osɨman markɨ, egh suam, me dar amegh, paza damigham. Puvatɨ. Me dar amam.

10:26: Kis 19:5, Lo 10:14, Sng 24:1

10:26: Ua Me Ini 19:5; Godɨn Araziba 10:14; Onger Akaba 24:1

10:27: Lu 10:8

10:27: Luk 10:8

10:28: 1 Ko 8:7

10:28: 1 Korin 8:7

10:29: Ro 14:16

10:29: Rom 14:16

§10:29: Grighɨn akam vezɨn kamɨn mɨgɨrɨgɨam deravɨra anebɨghizir puvatɨ.

10:30: Ro 14:6, 1 Ti 4:3-4

10:30: Rom 14:6; 1 Timoti 4:3-4

10:31: Kl 3:17, 1 Pi 4:11

10:31: Kolosi 3:17; 1 Pita 4:11

10:32: Ro 14:13, 1 Ko 8:13, 2 Ko 6:3, 1 Ti 3:5

10:32: Rom 14:13; 1 Korin 8:13; 2 Korin 6:3; 1 Timoti 3:5

10:33: Ro 15:2, 1 Ko 9:20-22, 10:24

10:33: Rom 15:2; 1 Korin 9:20-22; 10:24