5
Wainɨn azenimɨn ighiam
1 Ia oraghtɨ, kɨ uan namakar kɨ ifongezim bagh onger akar kam bangam.
Nan onger akar kam, kɨ uan namakamɨn wainɨn azenim geghari.
Nan namakam, mɨghsɨam gisɨn itir nguazir mam iti, dagheba an deragha aghui,
ezɨ a nguazir kamɨn wainɨn azenimɨn ingari.
2 A nguazim abɨagharigha, dagɨaba amɨsevegha,
wainɨn ikarɨzir agharir bar aghuiba amɨsevegha da isa da opari.
Egha wainɨn azenir kamɨn torimɨn, a dɨpenir bar pɨn itimɨn ingari,
an an aven ikɨva wainɨn azenimɨn ganam.
A dɨpenir kamɨn aven, wainɨn ovɨziba dɨkɨ da rɨghɨrɨghasa, dagɨar mozir mam gɨkui.
Ingangariba bar gɨvazɨma, a datɨrɨghɨn wainɨn ovɨzibar ganasa mɨzua ghaze,
“Da ti deravɨram otivightɨ dar daghem isɨngigham.”
Ezɨ puvatɨ. Ikarɨziba deragha ber puvatɨgha,
ovɨziba bar suvigha akam mɨsosi.
3 Ezɨ nan namakam kamaghɨn mɨgɨa ghaze:
“Ia Judan kantrin itir gumazamiziba ko Jerusalemia,
ia datɨrɨghɨn na ko nan wainɨn azenim tuisɨgh ga mɨkɨm,
Tina osɨmtɨzim iti?
Nan osɨmtɨzim, o nan wainɨn azenimɨn osɨmtɨzim?
4 Kɨ fo, wainɨn azenim deraghvɨra bɨva ovɨzir aghuiba ikiasa,
kɨ ingangarir aghuim gami.
Ezɨ manmaghɨn amizɨ wainɨn ovɨziba bar suvigha akam mɨsosi?
Bizir kɨ ua damuamin tam ti iti, ezɨ kɨ a gamizir puvatɨ?
5 Kɨ datɨrɨghɨn uan wainɨn azenim damuamin arazimɨn gun ia mɨkɨmam.
Kɨ azenim avɨnizir dɨvazim akarigh a gasɨghasigham.
Egh kɨ wainɨn azenim avɨnizir dɨvazim akarightɨ a irɨgham.
Eghtɨ asɨzir atiaba wainɨn azenimɨn aven mangɨ azenim dɨkabɨn wainɨn ikarɨzibar amɨva, dagh asɨghasigham.
6 Kɨ nguazim damightɨ ruarim a batoghtɨ
dɨkoniba itir ikarɨziba azenir kamɨn avegham.
Kɨ wainɨn azenimɨn ogher kuraba asian kogh, egh ikarɨzibar aghariba aghoran kogham.
Kɨ uaghan ghuariabav kemeghtɨ,
da amozimɨn tɨvaghtɨ a wainɨn azenir kam gizan kogham.”
7 Ikiavɨra Itir Godɨn Gavgaviba Bar Itimɨn wainɨn azenim, a Israelian gumazamiziba.
Bar guizbangɨra, Judan gumazamiziba, an oparizir wainɨn agharir aghuir a bar ifongeziba.
Me guizɨn arazir aghuibara damu ikiasa a ifonge, ezɨ puvatɨ. Me gumazibav sozi me ariaghiri.
Me arazir aghuibar igharaz darazir amuasa a ifonge, ezɨ puvatɨ.
Ararer kuram men danganibar otiva ghuavɨra iti.
Gumazamizir arazir kurabagh amiba, me bar ikuvigham
8 Iavzika, ia dɨpenir avɨriba ko nguazibagh iveza egha uari baghavɨra dar poziba mɨkɨri darasi, ia bar ikuvigham.
Kɨran oveghangɨn ia nguaziba ko biziba bar da inightɨ, igharaz darazi dapiamin danganibagh asagham.
Eghtɨ ia uarira nguazir kamɨn ikiam.
9 Kɨ orazi, Ikiavɨra Itir Godɨn Gavgaviba Bar Itim kamaghɨn mɨgei:
“Bar guizbangɨra, dɨpenir bar dirir dafar kabanagh, da ikuvigham,
eghtɨ gumazitaba dar ikian kogham.
10 Me wainɨn azenir ekiam oparigham,
eghtɨ wainɨn ikarɨziba wainɨn ovɨzir avɨriba dar ituighan kogham,
egh da wainɨn dɨpar bar muziarimra otogham.
Egh me 10plan witɨn ovɨziba itir mɨtariba oparigh,
egha dagh eghuvamin dughiamɨn, me mɨtarir vamɨra daghuigham.”
11 Aghuzir Akaba 23:29-30; Fofozir Gumazim 10:16Iavzika! Ia gumazir bar mɨzarazibara dɨkavava wain ko, dɨpar onganir igharagha garir avɨrir gavgaviba apiba,
ia bar ikuvigham!
Ia da apava onganigha ikia ghua dɨmagariba aghori.
Ia bar ikuvigham.
12 Ia isabagh amua, wain apava,
gitaba ko buabav sogha, marvibagh ivia, ighiar guar avɨribagh ami.
Egha ia arazir kaba bar dagh fo.
Egha Ikiavɨra Itir God amir biziba, ia fofozim dar itir puvatɨ.
13 Kamaghɨn amizɨ, Ikiavɨra Itir God ghaze,
“Bar guizbangɨra nan gumazamiziba, ia na gɨfoghan aghua,
kamaghɨn ian apaniba ia inigh mangɨ
nguibar igharazimɨn ia isɨ kalabuziam darɨgham.
Ian gumazir aruaba ko gumazamiziba, me dɨpaba ko dagheba puvatɨgham,
egh me bar ikuvigham.
14 Jerusalemɨn itir darasi, ia datɨrɨghɨn isabagh amua bar akuegha iti,
ezɨ bar guizbangɨra, Gumazamizir Oveaghuezibar Nguibamɨn, uan akam bar anekarigha, gumazir aruaba ko gumazamiziba tuasa me mɨzua iti.
Iavzika, ia bar ikuvigham.”
15 Gumazamiziba bar, me bar aghumsigham.
Gumazamizir uarira uan ziaba feba,
God me dɨkabɨragham,
eghtɨ me ua ziaba puvatɨgham.
16 Ikiavɨra Itir Godɨn Gavgaviba Bar Itim uan arazir aghuimɨn gumazamiziba akɨr men akagham,
egh a uabɨ ziar ekiam iniam.
Egh a uabɨ gumazamizibar akagh suam,
a Godɨn arazir aghuiba ko arazir zuruzibaram amim.
17 Nguibar ekiaba bar ikuvightɨ, ogheba aghung bar nguibaba avaragham.
Eghtɨ sipsipɨn nguziba ko memeba izɨ danganir kamɨn oghebar amam.
18 Iavzika, ia gumazir igharazibagh ifarasa bar ifuegha arazir kurabagh amiba,
ia bar ikuvigham.
Ian arazir kurar kaba ian poghezɨ,
ia da ataghɨraghan iburagham.
19 Ia kamaghɨn mɨgɨa ghaze,
“E kamaghɨn orasi, Israelian Godɨn Bar Zuezim,
a bizitamɨn e damusɨ egh a zuamɨram a damuam.
Egh e kamaghɨn ganigh, an nɨghnɨzim gɨfogham.”
20 Iavzika, ia bar ikuvigham.
Ia ghaze, arazir kuram a dera, ezɨ arazir aghuim a ikufi.
Egha ia ghaze, mɨtarmem an angazangarim, ezɨ angazangarim a mɨtarmem.
Egha ia ghaze bizir akatorimɨn ikia mɨsozim a isɨngi,
ezɨ bizir akatorimɨn ikia isɨngizim, a mɨsosi.
Ia bar ikuvigham.
21 Iavzika, ia ghaze, ia nɨghnɨzir bar aghuiba ikiava ian fofozim, igharaz darazir fofozibagh afira.
Ezɨ puvatɨ.
Ia bar ikuvigham.
22 Iavzika! Ia gumazir dɨpar onganim apava, egha bizir kam bagha ia ziar ekiam isi.
Ezɨ ia bar ikuvigham.
Ian gavgaviba ko fofoziba, da dɨpar onganim ververamin fofozimra iti.
Iavzika! Ia bar ikuvigham.
23 Iavzika! Ia kotɨn aven akaba tuisɨghamin dughiamɨn, gumazir arazir kurabagh amiba uan osɨmtɨziba akɨrasa, ia apezepera dagɨaba ia ganɨdima,
ia me ataghɨrazima me zui.
Egha ia gumazir osɨmtɨziba puvatɨzibar akaba deragha da tuisɨzir puvatɨ.
24 Ia Ikiavɨra Itir Godɨn Gavgaviba Bar Itimɨn akaba baraghan aghua.
Ia akɨrim ragha Israelian Godɨn Bar Zuezimɨn Akar Gavgavibagh asaragha gɨfa.
Kamaghɨn amizɨ, ia dadar mɨsɨngizibar mɨn ikuvigham,
mati dar biba kurigha gɨvazɨ,
dar akɨmariba asiaghira nguazim gɨra, mɨnezibar mɨn mɨgha ghue.
Osɨmtɨzir kam bar zuamɨram ia batogham,
mati avim isia ghua dadar mɨsɨngizibagh irɨgha zuamɨra isigha gɨfa.
25 Aisaia 9:12; 9:17; 9:21; 10:4Ikiavɨra Itir God uan gumazamizibar anɨngaghe.
Egha datɨrɨghɨn uan agharim ghufegha me gasɨghasɨghasa gara iti.
A dughiar vamɨran agharim akunightɨ, mɨkɨmkɨzim otoghtɨ,
mɨghsɨaba ivazvaghtɨ, gumazamizir bar avɨrim arɨghiregham.
Eghtɨ men kuaba nguibar ekiamɨn tuavibar buarir pozibar mɨn
pura tintinibar ireghɨv ikiam.
Ikiavɨra Itir God kamaghɨn damuam, eghtɨ bizir kam an anɨngagharim agɨvaghan kogham.
Puvatɨ. A ivezir kuram isɨ me danɨngvɨra ikiam.
26 Egh Ikiavɨra Itir God kantrin bar saghon itimɨn mɨdorozir gumaziba bagh dɨmdɨar ababanitam damightɨ,
me izɨ an gumazamizibagh asɨghasɨgham.
Ia gan!
Mɨdorozir gumazir kaba bar puvɨra ivemar akɨzɨrɨgh izam.
27 Mɨdorozir gumazir kaba, me bar gumazir gavgavibara.
Men tav, an suem a gamima, a irasa amir puvatɨ.
Men tav, an damazim akuir puvatɨ.
Men tav, uan mɨtem bar deravɨram an amɨghɨnizɨ a fɨriaghɨrɨzir puvatɨ.
Men tav, dagarir asuar bar gavgavimning aruzɨ aningɨn beniba dɨghoraghirezir puvatɨ.
28 Men bariba bar ghumizɨ,
me pibar afegha, egha asasavɨra gara iti.
Men hoziaba bar gavgafi,
ezɨ men hoziabar dagarir puziba mati dagɨar bar gavgaviba egh bɨghiran kogham.
Men karisba bar puvɨram akɨzɨrɨsi,
ezɨ dar wilba amɨnir ekiamɨn mɨn ivemari.
29 Mɨdorozir gumazibar dɨmdɨar ararem,
mati laion asɨzimɨn gɨntɨgha ghuav an suiragha, a dazeri moghɨn me diava arai.
Mɨdorozir gumaziba mati laion uan asɨzim mɨsuegha a inigha zui moghɨn,
me uan apanibar suigha me atera zui.
Eghtɨ gumazitam uam me inian iburagham.
30 Eghtɨ dughiar kamɨn, mɨdorozir gumaziba izɨ Judan kantri gasɨghasɨgham,
egh me bar pamtemɨn dɨm nɨgɨnir dafam damuam,
mati ongarim dɨpɨra iza ongarir dadarim gɨra tɨngazi.
Eghtɨ gumazitam ian kantrin kamɨn gantɨ,
a bar ikuvightɨ,
ghuariar pɨziba aruemɨn angazangarim apazaghtɨ,
kantrin kamɨn danganiba bar mɨtarmegham.*Hibrun akam deragha mɨgɨrɨgɨar kamɨn mɨngarim abɨghizir puvatɨ.