10
1-2 Iavzika! Ia gumazamizir kamagh amiba, ia bar ikuvigham.
Ia gumazir onganarazibagh amibagh ifar men biziba iniasa
arazir igiar igharagha garir avɨriba arigha, da osirigha me gasɨghasɨsi.
Ia arazir kurar kaba arigha dar gɨn zuima,
nan gumazamizir onganaraziba kotɨn aven, uan biziba bagha mɨkɨmasa izima,
ia guizɨn araziba ategha arazir kurar ia arɨzir kabar, me dɨkabɨrima,
me bizir me iniamba isir puvatɨ.
Egha arazir kamra, ia amizir paba oveaghuezibar biziba okɨava,
borir ameboghfeziaba oveaghuezibar biziba saram okei.
3 God ian arazir kurar ia amir kaba ikarvagh, ia gasɨghasightɨ, ia manmaghɨn damuam?
Dughiar kam, a kantrin saghon itimɨn gumaziba inigh izɨtɨ,
me amɨnir gavgavimɨn mɨn izɨ ian bizibagh asɨghasɨghtɨ, ia manmaghɨn damuam?
Ia ti ivegh mangɨ tina dama akurvazim iniam?
Ian ziar ekiam ko bizir avɨrir ia iniziba, ia ti managh dar arɨghtɨ, da deraghvɨra ikiam?
Bar puvatɨgham!
4 Ia bizitam damuva avegham. Bar puvatɨgham.
Ian tarazi mɨdorozimɨn arɨmɨghiregham.
Me ian tarazir suigh mangɨtɨ, ia kalabuziabar tongɨn bar atiatigh teviba apɨrigh mamaghɨra ikiam.
Ia osɨmtɨzir bar kurar kam gitaghan kogham.
Ikiavɨra Itir God bizir kabar amutɨ, da ia bativam,
eghtɨ bizir kam an anɨngagharim agɨvaghan kogham.
Puvatɨ. A tɨghar ivezir kuram isɨ me danɨngvɨra ikiam.
Asirian kantri ikuvigham
5 Aisaia 14:24-27; Nahum 1:1--3:19; Sefanaia 2:13-15Egha Ikiavɨra Itir God kamaghɨn mɨgei:
Asirian kantrin gumazamiziba, mevzika! Me bar ikuvigham.
Kɨ uan gumazamiziba puvɨra men atari.
Kamaghɨn kɨ datɨrɨghɨn ingangarim isɨ Asirian kantrin gumazamizibar anɨngtɨ,
me nan aghorimɨn mɨn otoghtɨ,
gumazamizir nan navim gamima a ikuviziba,
me ivezir kuram me danɨngɨva me gasɨghasigham.
6 Nan gumazamizir kaba na ategha uamategha nguazir kamɨn bizibagh amua, na gamizɨ
kɨ bar men anɨngaghe.
Kamaghɨn amizɨ, kɨ Asiriaba amadaghtɨ,
me mangɨ gumazamizir kɨ anɨngaghavɨra itir kabagh asɨghasɨgh,
egh me dɨkɨtɨ me mati gumazim tuavir beghneazim dɨti moghɨn me magɨram.
Egh me uan ifongiabar gɨn mangɨ men bizir aghuiba me dama da mɨkegh,
da inigh uan kantrin mangam.
7 Ezɨ Asirian atrivimɨn nɨghnɨzim, nan nɨghnɨzim ko voroghɨra ghuzir puvatɨ.
A ghaze, a kantrin avɨrir igharaziba uaghan bar dagh asɨghasɨgh,
da agɨvasa nɨghnɨsi.
8 A uabɨ fa kamaghɨn mɨgɨa ghaze,
“Kɨ ghaze, kɨ kantrin avɨribar atriviba abɨnigha men nguibar ekiaba ini.
Ezɨ atrivir kɨ abɨraziba,
me nan mɨdorozir gumazibar, gumazir dapanibar iti.
9 Kɨ mɨsogha nguibar ekiar kaba ini:
Kalno, Karkemis, Hamat,
Arpat, Samaria, ko Damaskus.
10 Kɨ kantrin avɨriba abɨragha fo,
men asebar marvir guar avɨriba men iti.
Ezɨ men aser kaba, da tong men akurvazir puvatɨ.
Kɨ ghaze, marvir guar kaba, Jerusalem ko Samarian marvir guabagh afira.
11 Kɨ Samaria ko an aseba ko marvir guabagh asɨghasigha gɨfa.
Egh arazir kamra, kɨ Jerusalem ko an aseba ko marvir guabar amuam.”
12 Asirian atrivim ghaze, a bar pɨn mar ikia bar gavgafi, egha a uabɨra uan ziam fe. Eghtɨ gɨn nan Ekiam, a faragha mɨkemezɨ moghɨn, a Saionɨn Mɨghsɨamɨn ikɨ, a Jerusalemɨn nguibar ekiam, a uan ingangariba bar dar amigh gɨvaghtɨ, a gɨn uamategh mangɨ ivezir kuram Asirian atrivim danɨngam. 13 Ekiam orasi, Asirian atrivim uabɨra uabɨ fa, kamaghɨn mɨgei:
“Kɨ bizibar amuamin nɨghnɨzir bar aghuim iti.
Kamaghɨn amizɨ, nan gavgavim ko fofozimɨn, kɨ bizir kabagh ami.
Kɨ kantribar mɨtaghniaba akaragharigha gɨfa, ezɨ da bar nan apengan iti.
Egha bizir bar aghuir me akumakua arɨghiziba, kɨ da ini.
Kɨ bar gumazir gavgavim, kamaghɨn kɨ kantrin kabar atrivibagh afiragha, me dɨkabɨni,
mati bulmakaun apurir ekiam mɨsosi.
14 Nguazir kamɨn itir kantriba bar, mati kuarazir mɨkonir mam,
kɨ, men bizir aghuiba, mati kuarazir mɨkonimɨn, gumazim kuarazir aroriaba isi moghɨn, nɨmɨra bar da ini.
Kuarazir amebaba ikia, nan gari puvatɨ.
Mevzika! Kuarazir amebatam uan aroriaba bagha ara nan agɨntɨghɨzir puvatɨ.
Kɨ pura men biziba okemegha da inigha ghu.”
15 Atrivim uabɨ uan ziam fe, ezɨ Ekiam kamaghɨn azaragha ghaze,
Sobiatam ti uabɨ fɨ kamaghɨn mɨkɨm suam,
a uabɨ gavgaviba iti, ezɨ an gavgavim gumazir an suirazimɨn gavgavim gafira, a?
Puvatɨ, nɨghnɨzir kam ongani.
Eghtɨ son tam ti uabɨ fɨ suam,
a uabɨ gavgaviba iti, ezɨ an gavgavim gumazir an suiragha temem pungizim gafira, a?
Puvatɨ, nɨghnɨzir kam ongani.
Eghtɨ itazitam ti uabɨ fɨ suam,
a uabɨ gumazitamɨn suiragh, a inigh mɨsoghsɨ mangam, a?
Puvatɨ. Nɨghnɨzir kaba, bar ongani.
16 Ezɨ Ekiam, a Ikiavɨra Itir Godɨn Gavgaviba Bar Itim,
a ziar ekiam ko gavgavir ekiam iti.
Egh a datɨrɨghɨn arɨmariar bar kuratam amadaghtɨ,
an Asiriabar mɨdorozir gumazibar amu, men gavgavir ekiam agɨvagham.
Egh a uaghan avim damightɨ,
a dɨkavigh isi mangɨ men biziba bar da agɨvagham.
17 Ekiam, a Israelian Godɨn Bar Zuezim,
a Israelian gumazamizibar angazangarimɨn mɨn iti.
Egh Asiriaba, an avir bar dafamɨn mɨn otogh,
men kantri daboroghtɨ, a isigham.
Egh dughiar vamɨran, a Asirian oghevsevir kurabar apueghtɨ,
da bar isigham.
18 Egh afiragh mangɨ temer ekiaba ko nguazir aghuir azenibar ingaramim sara daboroghtɨ,
da bar isigham.
Ikiavɨra Itir God, Asiriabagh asɨghasigh, bar men duaba ko mɨkarziba agɨvagham,
mati arɨmariam gumazim puv a gamizɨ, an gavgavim bar magɨrɨ ameregh gɨvagham.
19 Eghtɨ Asirian kantrin temer vaghvazibara mɨtɨvighɨv ikɨtɨ,
borir iririvitam uaghan da mengan fogham.
Gumazamizir ikiavɨra itir varazira, uamategham
20 Jekopɨn ovavir boriba, datɨrɨghɨn uan apanibar atrivir me mɨsogha itim, me an atiatighava, an apengan ikia uarir akurvaghasa an dia. Eghtɨ gɨn izamin dughiam otoghtɨ, Israelian ikiavɨra itir varazira, apanir kam bagh gan uarir akurvaghsɨ nɨghnɨzir gavgavim an ikian kogham. Puvatɨ. Dughiar izamimɨn, me Ikiavɨra Itir God baghvɨra ikɨ nɨghnɨzir gavgavim an ikiam. A Israelian Godɨn Bar Zuezim, eghtɨ me guizɨn an akamɨn gɨn mangɨ uarir akurvaghsɨ, anarɨra mɨzuamam. 21 Gɨn, Jekopɨn ovavir boribar gumazamizir ikiavɨra itir varazira, me uamategh Godɨn Gavgavir Ekiam Itim bagh izam.*Hibrun akamɨn akar kam, “Gumazamizir varazira uamategh izam,” a mati Aisaian otarir mamɨn ziam. Nɨ Aisaia 7:3ɨn gan. 22 Rom 9:27Fomɨra, Israelian gumazamiziba, mati ongarimɨn itir gigimɨn mɨn, bar avɨraseme. Ezɨ God ghaze, me bar ikuvigham. God uan arazir aghuimɨn gɨn mangɨva ivezir kurar kam me danɨngam. Eghtɨ gɨn men gumazamizir ikiavɨra itir varazira uamategh uan nguibabar izam. 23 Ekiam, a Ikiavɨra Itir Godɨn Gavgaviba Bar Itim, a nguazir kamɨn kantriba bar, a ivezir kuram isɨ me danɨngasa mɨkemegha gɨfa, egh a bar me gasɨghasɨgham.
24 Nan Ekiam, a Ikiavɨra Itir Godɨn Gavgaviba Bar Itim kamaghɨn mɨgei, “Ia nan gumazamizir Saionɨn nguibar ekiamɨn itiba, ia Asiriabar atiatingan markɨ. Me, Isipia fomɨra uan itaziba isa ia mɨsogha, paza ia gamizɨ moghɨn, me ia damuam, eghtɨ ia men atiatingan markɨ. 25 Nan navim ia bagha ikuvighavɨra iti, kamaghɨn, kɨ Asiriaba ataghizɨ me ia gasɨghasɨsi. Eghtɨ kɨ, kɨran oveghangɨn, uan adarir ian itim agɨvagh, egh raghɨrɨgh Asiriabagh asɨghasɨgham. 26 Kɨ, Ikiavɨra Itir Godɨn Gavgaviba Bar Itim, kɨ me mɨsogham, mati kɨ fomɨra Midiania, Orepɨn Dagɨamɨn boroghɨn benim isa me fozorogha me mɨsoke. Egha mati, kɨ fomɨram Isipɨn kantrin, uan asadivir aghorim ghufegha ongarim gisɨn amadazɨ, apaniba ongarir torimɨn bar ikufi.†Nɨ Gumazir Dapaniba 7:23-25ɨn gan. 27 Asiriaba datɨrɨghɨn ia gativagha ia gasɨghasɨsi, mati gumazim ter otevim, bulmakaun fɨrim gatɨgha, an abɨrima, a ingangarim gami. Datɨrɨghɨn Asiriaba bar deraghavɨram apiazɨ, ia paza iti. Ezɨ men arazir kam na gamima, nan navim puvɨra nan isi. Kamaghɨn, kɨ gɨn izamin dughiar kamɨn, kɨ Asiriabar gavgavim agɨvaghtɨ, me uam osɨmtɨziba ia danɨngan kogham.”‡Hibrun akam deragha mɨgɨrɨgɨar kamɨn mɨngarim abɨghizir puvatɨ.
Apaniba Jerusalemia mɨsoghasa izi
28 Apaniba Ain nguibar ekiam boroghɨn iza a gitagha, Mikronɨn nguibar ekiamɨn otivigha gɨfa.
Me uan dagheba ko biziba isa Mikmasɨn nguibar ekiamɨn da arɨki.§Nguibar ekiar igharazir kaba da notɨn amadaghan Jerusalem boroghɨn iti, kamagh amizɨ, notɨn amadaghan itir apaniba Jerusalem gasɨghasɨghsɨ izɨva, me faragh Ain nguibar ekiam ko nguibar ekiar kaba batogham, dar ziaba ves 28-32ɨn iti.
29 Me uaghira daghurir dɨpamɨn faghafiagha, bɨnigha ghuanaga,
dɨmangan Geban nguibar ekiamɨn akui.
Raman nguibar ekiamɨn itir gumazamiziba bar atiatingi.
Ezɨ, Gibean nguibar ekiamɨn itir gumazamiziba, kar Atrivim Solɨn nguibar ekiam,
me anetegha are.
30 O Galimɨn nguibar ekiamɨn itir gumazamiziba, ia pamtemɨn dɨm.
Ia Laisan nguibar ekiamɨn itir gumazamiziba,
ia kuariba arɨghɨva oragh.
Ia Anatotɨn nguibar ekiamɨn itir gumazamiziba, iavzika!
Ia ti akabagh asa.
31 Matmenan nguibam ko Gebimɨn nguibamɨn itir gumazamiziba,
me uari mongasa danganiba buriava, aregha gɨfa.
32 Apaniba datɨrɨghɨn Nopɨn nguibar ekiamɨn otivigha gɨfa.
Egha Saionɨn Mɨghsɨamɨn amadaghan gara, uan dafariba apɨra,
uan gavgaviba akakagha ghaze,
me Jerusalemɨn nguibar ekiam gasɨghasɨghasa uari baraki.
33 Ia oragh!
Ekiam a Ikiavɨra Itir Godɨn Gavgaviba Bar Itim,
a gumazir ziar ekiam ko gavgavim itiba dɨkabɨragham.
Me datɨrɨghɨn temer ekiar ruaribar mɨn iti,
eghtɨ a me okɨtɨ me iregham.
34 Me mati Lebanonɨn temer aghuibar mɨn mɨtivigha gavgavigha iti,
egha mati temer dafar ruarir bar ruarir pɨzimɨn itibar mɨn iti.
Egh a me gasɨghasigham,
mati gumazim sobiam inigha temer ekiar kaba okɨtɨ da iregham.
10:5: Aisaia 14:24-27; Nahum 1:1--3:19; Sefanaia 2:13-15
*10:21: Hibrun akamɨn akar kam, “Gumazamizir varazira uamategh izam,” a mati Aisaian otarir mamɨn ziam. Nɨ Aisaia 7:3ɨn gan.
10:22: Rom 9:27
†10:26: Nɨ Gumazir Dapaniba 7:23-25ɨn gan.
‡10:27: Hibrun akam deragha mɨgɨrɨgɨar kamɨn mɨngarim abɨghizir puvatɨ.
§10:28: Nguibar ekiar igharazir kaba da notɨn amadaghan Jerusalem boroghɨn iti, kamagh amizɨ, notɨn amadaghan itir apaniba Jerusalem gasɨghasɨghsɨ izɨva, me faragh Ain nguibar ekiam ko nguibar ekiar kaba batogham, dar ziaba ves 28-32ɨn iti.