19
Ikiavɨra Itir God Isipia gasɨghasɨgham
1 Jeremaia 46:2-26; Esekiel 29:1--32:32Isipia bar ikuvighasa, Ikiavɨra Itir God akar kam me bagha an anɨngi.
“Ia gan! Ikiavɨra Itir God ghuariam gisɨn aperaghav ikia,
ivegha akɨgha Isipɨn kantrin izi.
A izɨ otoghamin dughiamɨn, Isipian aseba, bar puvɨra nɨghtɨ,
Isipian gumazamiziba bar puvɨram atiatingɨva,
gavgaviba amɨragh magɨrɨgh bar gɨvagham.”
2 Egha Ikiavɨra Itir God kamaghɨn mɨgei,
“Kɨ Isipian navibagh inivtɨ, me uarira uariv sogham.
Aveghbuaba uarira uariv soghtɨma,
namakaba uarira uariv sogham.
Isipian nguibar ekiaba uarira uariv soghtɨma,
provinsba uaghan uarira uariv sogham.
3 Kɨ Isipia damightɨ men gavgavim gɨvaghtɨ,
me okam nɨghnɨghɨva,
bizir me damuasa nɨghnɨziba, me dar amuan kogham.
Egh me uan asebar azangtɨ, da ti men akurvagham.
Egh me mangɨ, gumazir oveaghuezibar duabar azangsɨgham,
me bizir manam damuam.
Me imezibagh amir gumaziba ko kukunir gumazibar nɨghnɨzibagh foghsɨ
men azangsɨgham.
4 Kɨ Isipia isɨva, atrivir kuratamɨn agharim datɨghtɨ,
a men ganam.
A gumazir bar anɨngaghezim,
a men gan, deragh me damuan kogham.
Kɨ Ekiam, kɨ Ikiavɨra Itir Godɨn Gavgaviba Bar Itim,
kɨ mɨkemegha gɨfa.”
5 Eghtɨ Nailɨn Fanem bar dakegh magɨrɨtɨ,
nguazim otogh bar mɨsɨngigham.
6 Daghurir dɨpar izava Nailɨn Fanem giniviziba,
aghumra daka uaghirima, mughuriar kuram otifi.
Eghtɨma ogheba ko ighurunir dɨpamɨn itiba bar mɨsɨngigham.
7 Eghtɨ me fanemɨn mɨriam ko an akamɨn boroghɨn oparizir dagheba mɨsɨngtɨ,
amɨnim vang bar da inigh mangɨgham.
8 Eghtɨ gumazir Nailɨn Fanemɨn osiriba isiba,
uam osiribar guan kogh, uan iver ekiaba akunɨva osiriba inian kogham.
Kamaghɨn amizɨ, men naviba bar osemeghtɨ,
me aziva arangam.
9 Eghtɨ korotiabar ingarir biziba
uam otivan kogham.
Eghtɨ gumazir iniba nuaviba ko amizir korotiaba isaiba,
me bar amɨragh, bar osemegh puvɨram aziam.
10 Eghtɨ Isipian gumazir dapaniba bar ikuvightɨ,
dagɨaba bagha ingarir gumazamiziba,
men navir averiaba bar me basemegham.*Hibrun akam deragha mɨgɨrɨgɨar kamɨn mɨngarim abɨghizir puvatɨ.
11 Soanɨn nguibamɨn gumazir ekiaba, me gumazir onganiba.
Ezɨ gumazir nɨghnɨzir aghuiba Isipɨn atrivim ganɨdiba, me mɨgɨrɨgɨar kuraba a ganɨdi.
Fofozir gumazir kaba vaghvagha atiatir puvatɨgha kamaghɨn Isipian atrivim gifara
uari fa mɨgɨa ghaze,
“Kɨ fofozir gumazibar gɨn zuir suren gumazibar mav.
Kɨ fomɨra itir atrivibar ovavir borimra!”
12 Egha me managh uan fofoziba moegha,
Ikiavɨra Itir Godɨn Gavgaviba Bar Itim, Isipia damuamin bizibar gun nɨ mɨkemezir puvatɨ?
Bar puvatɨ.
13 Soanɨn nguibam ko, Memfisɨn nguibar ekiam, aningɨn gumazir ekiaba,
me gumazir onganiba.
Ezɨ Isipian gumazamizibar gumazir dapanir ekiaba,
me uaghan deragha kantrin garir puvatɨ.
14 Guizbangɨra, Ikiavɨra Itir God, Isipian nɨghnɨzim gasɨghasigha gɨfa.
Bizir kam bangɨn, Isipia amir biziba, bar ikuvigha ghua,
mati wainɨn dɨpar onganim amezir gumazim uan mimizim dɨkaragha, atam irɨghai.
15 Gumazitam kantri Isipɨn akuraghtɨ, a deragh ikian kogham.
Gumazir ekiam o pura gumazir kɨnim,
a bizitam damuan kogham.
Ikiavɨra Itir God Isipia ivezir kuram me danɨngtɨ, me navibagh iragham
16 Gɨn izamin dughiamɨn, Isipia kamaghɨn osɨmtɨziba aterɨva, me Ikiavɨra Itir Godɨn Gavgaviba Bar Itimɨn gantɨ, a me mɨsoghsɨ uan agharim ghufeghtɨ, me amizibar mɨn bar atiatigh nɨgham. 17 Egh dughiar kamɨn, Isipian gumazamiziba oraghtɨ, me kantri Judan ziam dɨboroghtɨ, me Ikiavɨra Itir Godɨn Gavgaviba Bar Itim ko a damuamin bizibagh nɨghnɨgh, bar moghɨram an atiating nɨgham.
18 Dughiar kamɨn, Isipian gumazamizir an 5plan nguibar ekiabar itiba, me Hibrun akam mɨkɨmam. Egh nguibar ekiar kabar itir gumazamiziba, Ikiavɨra Itir Godɨn Gavgaviba Bar Itim baghvɨra ikɨ an apengan ikiam. Nguibar ekiar kabar mam, me ziar kam a darɨgham, “Aruemɨn Nguibar Ekiam.”†Akɨnafarir ghurir maba Hibrun akamɨn ziar kam iti, “Aruemɨn Nguibar Ekiam.” Ezɨ maba ziar kam iti, “Ikuvighamin Nguibar Ekiam.”
19 Eghtɨ dughiar kamɨn, Isipɨn kantrin tongɨn, Ikiavɨra Itir Godɨn ofa gamir dakozir tam ikiam. Eghtɨ me uaghan Isipɨn kantrin mɨtaghniamɨn, Ikiavɨra Itir God baghavɨra itir dagɨar dɨpenir akɨnir mam asaraghtɨ, a tughɨv ikiam. 20 Dagɨar dɨpenir akɨnir kam ko, ofa gamir dakozir kam, Isipɨn nguazimɨn ikɨtɨ, gumazamiziba aningɨn gan, Ikiavɨra Itir Godɨn Gavgaviba Bar Itim gɨnɨghnɨgham. Eghtɨ apaniba izɨ pazɨ me damuamin dughiamɨn, me Ikiavɨra Itir Godɨn dɨmtɨ, an Akurvazir Gumazitam amadaghtɨ, a izɨ men akuragh ua me iniam. 21 Eghtɨ Ikiavɨra Itir God uabɨ isɨ Isipian akaghtɨ, me a gɨfogh suam, a uabɨ Ikiavɨra Itir God. A kamaghɨn damightɨ, Isipia bar deragh a gɨfogh, an ziam fɨ, uan asɨziba tuer ofaba ko witɨn ovɨziba tuamin ofaba, da inigh a bagh mangam. Egh me akar dɨkɨrɨzibar a damuva, egh me damuasa mɨkemezir bizibar amuam. 22 Bar guizbangɨra, Ikiavɨra Itir God ivezir kuram Isipia danɨngam. Arazir an amir kamɨn, a men arazir kuraba akɨrmɨghasa. Eghtɨ gɨn me navibagh iragh uamategh Ikiavɨra Itir God bagh mangɨtɨ, a men azangsɨziba baragh, me damutɨ, me ghuamaghegh deravɨra ikiam.
23 Aisaia 27:13; 35:8; 62:10Dughiar kamɨn, tuavir ekiar mam Isipɨn kantri ko Asirian kantrin tongɨn ikiam. Eghtɨ Asiriaba daru Isipɨn kantrin mangɨtɨ, Isipia daru Asirian kantrin mangam. Eghtɨ kantrin kamningɨn gumazamiziba Ekiamɨn ziamra fam. 24 Eghtɨ dughiar kamɨn, kantri Israel, Isipɨn kantri ko Asirian kantri, me roroabar otogh uari inigh deraghvɨra ikiam. Eghtɨ God me bangɨn, nguazimɨn itir kantriba bar, dar gumazamiziba bar deragh me damuam. 25 Egh Ikiavɨra Itir Godɨn Gavgaviba Bar Itim, bizir aghuiba me danɨng kamaghɨn mɨkɨmam, “Isipia, kɨ deravɨra ia damuam, ia nan gumazamiziba. Egh ia Asiriaba, kɨ deravɨra ia damuam, ia gumazamizir kɨ uabɨ ingariziba. Egh ia Israelia, kɨ deravɨra ia damuam, ia gumazamizir kɨ ua bagha mɨseveziba.”