23
Ikiavɨra Itir God, Tairɨn nguibar ekiam gasɨghasigham
1 Esekiel 26:1--28:19; Joel 3:4-8; Amos 1:9-10; Sekaraia 9:1-4; Matyu 11:21-22; Luk 10:13-14Bizir Tairɨn nguibar ekiamɨn otivamiba, Ikiavɨra Itir God, dar akam anɨdi:
O ia gumazir kurir ekiabar ongarim garuiba, iavzika!
Ian nguibar ekiam Tair, a bar ikuvigha gɨfa,
ezɨ tam uam an itir puvatɨ.
Ia Tarsisɨn nguazimɨn ikegha, uamategha iza Saiprusɨn Arighatɨzim ategha, uan nguibam bagha izi,
egha dughiar kamɨn ia asɨghasɨghizir arazir kam baraki.
Kamaghɨn amizɨ, ia naviba ikuvigh aziv arang.
2 Ia ongarir mɨriamɨn itir darasi,
ia Saidonɨn nguibar ekiamɨn itir dagɨaba bagha ingarir gumaziba,
ian naviba osemegh, uan akaba dukuagh.
Ia Saidonɨn nguibar ekiamɨn gumaziba,
kuriba bizir avɨriba ia bagha da inigha izi.
3 Egha ia ongarir bar konim gisɨn arua, kantrin avɨribar ghua
biziba amaga, dagh ivezagha arua,
egha ia ziar ekiam isi.
Ian kuriba Isipɨn kantrin ghua,
Nailɨn Fanemɨn ghua, Sihorɨn Danganir Zarimɨn amadaghan ghua,
witɨn ovɨziba ko, biziba inigha ia bagha izi.
Ezɨ ia dar dagɨabar ingangaribagh amua,
dar dagɨaba isi.
4 Ia Saidonɨn nguibar ekiamɨn gumazamiziba, ian nguibar ekiar bar gavgavir ongarir mɨriamɨn itim,
a bar ikuvigha gɨfa.
Ongarim ti ian nguibam gɨnɨghnɨgha ghaze,
“Iavzika! Nan boriba bar moghɨram ovegha gɨfa.
Ezɨ kɨ mati, amizim borim batasa, mɨzazim barazir puvatɨzɨ moghɨn iti.
Egha kɨ mati, amizir gumazamizir igiar bar aghuiba bata, egha deragha dar gari puvatɨzim.”
Kamaghɨn amizɨ, ia bar aghumsɨgh!
5 Eghtɨ Isipia, Tairɨn nguibar ekiamɨn otivizir bizir kaba baregh,
bar atiating, egh men gavgaviba bar gɨvagham.
6 Ia gumazamizir ongarir mɨriamɨn itiba,
ia naviba ikuvigh, aziv arangɨva,
arɨ bar saghon Tarsisɨn nguazimɨn amadaghan mangɨ.
7 Tair nguibar ekiar bar gavgavir fomɨra itim,
a nguibar ekiar ia a bagha bar akongezim.
Fomɨra nguibar ekiamɨn itir gumazamiziba uan marazi amangizɨ,
me nguazir saghon itibar ghua, nguibar ekiar igiabar ingara da aghui.
Ezɨ tizim bagha, nguibar ekiar kam uabɨ ikuvigha iti?
8 Tinara mɨgɨava arazir kurar kam gamizɨma, a Tairɨn oto,
nguibar ekiar kam atriviba amɨsevezɨ, me nguibar ekiar igharazibagh ativagha dar gari?
Ezɨ a dagɨaba bagha, biziba amaga dagh ivezir ingarir gumaziba, atrivibar otaribar mɨn itima,
nguazir kamɨn itir gumazamiziba bar, ziar ekiam me ganɨdi.
9 Kar Ikiavɨra Itir Godɨn Gavgaviba Bar Itim mɨgeima, arazir kam oto.
Gumazir uan gavgaviba ko, uan ziar ekiaba fa bar akongeziba, Ikiavɨra Itir God me dɨkabɨnasa.
Egha a uaghan gumazir ziar ekiaba itibar ziaba dɨkabɨnasa, bizir kam gami.
10 Ia Tarsisɨn nguazimɨn itir gumazamiziba,
ia uan ifongiamɨn bizibar amu,
mati Nailɨn Fanemɨn aperiar dafam otogha afora pura tintinibar zui.
Ia fo, Tairɨn nguibar ekiamɨn itir gumazamiziba ua ikian kogh,
ian ifongiamɨn tuaviba apɨran kogham.*Hibrun akam vezɨn kamɨn deragha bigha mɨkemezir puvatɨ.
11 Ikiavɨra Itir God uan agharim ghufegha gɨfa, an ongarim gisɨn an amadagha,
kantrin ongarir mɨriamɨn itir kabagh asɨghasɨghasava ami.
Kamaghɨn amizɨ, kantrin kabar itir gumazamiziba atiatiava agoi.
A Kenanɨn nguazimɨn nguibar ekiar gavgavir kabagh asɨghasɨghasa akam anigha gɨfa.
12 A kamaghɨn mɨgei:
“O Saidonɨn nguibar ekiar dirim, gumaka!
Nɨ uabɨn akurvaghan kogham.
Nɨn bar akongezir arazim gɨvagh ua ikian kogham.
Nɨ bar ikuvigh, egh deravɨra ikian kogham.
Kamaghɨn amizɨ, ia Saidonian gumazamiziba, ia dɨkavigh arɨ Saiprusɨn Arighatɨzimɨn mangɨ.
Egh ia uaghan avughsamin danganiba puvatɨgham.”
13 Ia Kaldian nguazim deraghvɨram an gan.
Men kantri bar gɨvazɨ, gumazitam uam an itir puvatɨ.
Ia fo, Asiriaba men kantri gasɨghasɨki,
egha men nguazim gamima, a ruarimɨn itir asɨzir atiabar nguibam gava.
Asiriaba dakozibar ingarizɨma,
da Kaldiabar nguibar ekiamɨn dɨvazir gavgavim bar anevɨnizɨ, nguibar ekiam an aven iti.
Egha me dakozir kabagh isɨn tuivigha me mɨsosi.
Me nguibar ekiar kamɨn dɨvazir gavgavir kam akaragharɨki,
egha bar nguibar ekiabagh asɨghasɨki.†Vezɨn kamɨn, Hibrun akam deragha mɨkemezir puvatɨ.
14 O ia gumazir kurir ekiabar ongarim garuiba, iavzika!
Ia Tarsisɨn nguibamɨn ikegha iza garima,
ian nguibar ekiar gavgavim, a bar ikuvigha gɨfa.
Kamaghɨn amizɨ, ia naviba ikuvigh aziva arang.
15 Bizir kaba otivamin dughiamɨn, gumazamiziba 70plan azenibar, Tairɨn nguibar ekiam gɨnamadagham. Kar atrivim ikiamin azenibar dɨbobonim. 70plan azenir kaba gɨvaghtɨ, Tair tuavimɨn amizimɨn mɨn ikɨtɨ, gumaziba a dɨghor ighiam damuam. Ighiar kamɨn mɨgɨrɨgɨaba kamakɨn:
16 O tuavimɨn amizim, me nɨ gɨnamadagha gɨfa.
Kamaghɨn nɨ gita inigh nguibar ekiam daru.
Egh nɨ ighiabar amuva, onger akar bar aghuibar amu,
eghtɨ gumaziba ua nɨ gɨnɨghnɨgham.
17 Eghtɨ 70plan azeniba gɨvaghtɨ, Ikiavɨra Itir God, Tairɨn nguibar ekiam damightɨ, a uamategh nguibar gumazamiziba iza biziba amaga dagh ivezimɨn mɨn otogham. Egh Tairɨn nguibar ekiam, nguazir kamɨn itir kantrin igharaziba, bar me apezepertɨ, me izɨ a ko dagɨar ingangaribar amuam, mati tuavimɨn amizim, a gumaziba apezeperima, me a bagha izi. 18 Egh dagɨaba ko, bizir tizir Tair isiba, a ua baghvɨra da isɨ, dar pozim mɨkɨnan kogham. Puvatɨ. Da Ikiavɨra Itir Godɨn bizibar mɨn ikiam. Eghtɨ Tair inigha pozim mɨkɨnizir bizir kaba, Ikiavɨra Itir Godɨn damazimɨn ikiamin gumazamiziba bar da inigham, egh me damamin dagher bar avɨriba ko, korotiar aghuir daghuamin bar avɨriba ikiam.