27
1 Jop 41:1; Onger Akaba 74:14; 104:26Eghtɨ dughiar kamɨn, Ikiavɨra Itir God uan gavgavir bar ekiam akakagham.
A izɨ ongarimɨn itir kuruzir aser dafar kam Leviatan,
ivezir kuram isɨ a danɨngɨva a gasɨghasɨgham.
A uan mɨdorozir sabar ekiar gavgavir bar ghumizim inigh,
kuruzir bar puvɨra daghdagha tintinibar aragharuir kam atughtɨ
an aremegham.
2-3 Dughiar kamɨn, Ikiavɨra Itir God ighiatam kamaghɨn a bangam:
“E wainɨn azenir aghuimɨn ighiam damuam.
Kɨ, Ikiavɨra Itir God, kɨ bar deravɨram azenir kamɨn gari.
Egha kɨ zurara dɨpam a ganɨdi.
Gumazitaba ti izɨv a gasɨghasigham,
kamaghɨn amizɨ, kɨ dɨmagariba ko aruebar deravɨram an gari.
4 Kɨ datɨrɨghɨn uan wainɨn azenir kamɨn atarir puvatɨ.
Egh kɨ gantɨ, ogher ataghatariba itiba ko, ogher kurataba a bativightɨ,
kɨ, mati mɨdorozir gumazim uan apanibav sozi moghɨn,
kɨ dagh asɨghasɨgham.
Kɨ avim daborogh, ogher kaba bar dar aboroghtɨ
da isigham.
5 Egh apanir kaba, kɨ men gansɨ,
me na bagh izɨ na ko deragh ikɨsɨ, me
akar dɨkɨrɨzir tam damigham.”
6 Gɨn izamin dughiamɨn, Israelia, Jekopɨn ovavir boriba,
me wainɨn ikarɨzir akɨmariba itimɨn mɨn mɨtɨgh gavgavigh,
egh borir avɨriba batam, mati wainɨn ikarɨziba ovɨzir avɨriba ituigham.
Eghtɨ men otivir dagheba, bar avɨrasemegh,
mangɨ nguazimɨn danganiba bar dagh izɨvagham.*Vezɨn kamɨn Hibrun akamɨn mɨngarim deragha bigha mɨkemezir puvatɨ.
7 Ikiavɨra Itir God, Israelian apaniba puv me gamizɨ moghɨn,
Israelia gamizir puvatɨ.
Guizbangɨra, a igharaz darazigh amizɨ moghɨn,
Israelian gumazamizir avɨribav soghezɨ, me ariaghirezir puvatɨ.
8 Ikiavɨra Itir God uan gumazamiziba amadazɨ,
me kalabuziamɨn zuir dughiamɨn, a puv me gami.
A men anɨngaghegha uan amɨnir gavgavim amadazɨma,
a iza me avigha ghu,
mati amɨnir gavgavim aruem anadi naghɨn ikegha iza,
men biziba avigha ghu.
9 Egh Israelia guizbangɨra mɨkɨm suam,
Ikiavɨra Itir God men arazir kurabar osɨmtɨziba agɨvam,
eghtɨ me uan asebar ofa gamir dakoziba apɨrighɨva,
dar dagɨaba amsarɨraghitɨ da nguazir mɨnemniamɨn mɨn otogham.
Egh me temer guarir aser amizim Aseran nedazim itiba okɨrarɨgh.
Egh paura tuema a mughuriar aghuim zuir dakoziba,
bar dagh asɨghasɨkigh.
Tuavir kamɨn, Ikiavɨra Itir God men arazir kuraba gɨn amadagham.
10 Nguibar ekiar kam fomɨra dɨvazir bar gavgavim iti,
egha datɨrɨghɨn a bar ikuvigha iti.
A datɨrɨghɨn pura nguibar dadar kɨnim mɨn itima, gumazitaba uam an itir puvatɨ.
Egha bulmakaubar nguibamɨn mɨn otozɨ, da iza uari akuva ikia,
dadaba ko tevsevibar dafariba apava, kagh avughsa iti.
11 Ezɨ temer kabar aguaba mɨsigha gɨvazɨ, dar aguaba dɨpɨraghira nguazim girima,
amiziba avibar arɨghasa iza dagh eghufi.
Nguibar ekiar kamɨn itir gumazamiziba, me bar onganigha akaba baraghan aghua,
kamaghɨn, arazir kam me batifi.
Kamaghɨn amizɨ, God, a Godɨn men ingarizim,
a men apangkuvir puvatɨgha deragha me gamir puvatɨ.
12 Egh Ikiavɨra Itir God bizir kabar amuamin dughiamɨn, a uan gumazamizir tintinibar kantribar itiba iniam, Yufretisɨn Fanemɨn ikegh mangɨ Isipɨn kantrin tugham. A vaghvagh me iniam, mati gumazim witɨn ovɨziba rɨghɨrɨgha dar mɨseviba ategha, witɨn ovɨzir aghuibara isa itarim garɨsi. 13 Eghtɨ dughiar kamɨn sɨghamɨn ararem bar ekevegham. A Israelian dɨmam, men apaniba fomɨra me batoghezɨma, me ghua kantri Asiria ko, kantri Isipɨn ovegha ikiavɨra iti. Eghtɨ me uamategh Jerusalemɨn izɨ, Ikiavɨra Itir Godɨn mɨghsɨamram an ziam fam.