30
Ikiavɨra Itir God kamaghɨn mɨgei, Isipia Judabar akurvaghan kogham
1 Ikiavɨra Itir God kamaghɨn mɨgei,
“Judan adarasi, me nan boriba me bar ikuvigham, me bar orazir puvatɨzir darazi.
Me nan nɨghnɨzimɨn gɨntɨzir puvatɨ.
Me uan nɨghnɨzibar gɨntɨgha ghua
kantrin igharazim ko roroam gami.
Egha tuavir kamɨn, me arazir kurar bar avɨrim,
uan arazir kurar faragha amizibagh siriabagh arɨsi.
Mevzika.
Kamaghɨn amizɨ, me bar ikuvigham.
2 Josua 9:14; 1 Atriviba 22:7; Jeremaia 21:2Me Isipia ko akam akɨrasa nan nɨghnɨzim bagha nan azarazir puvatɨ,
eghtɨ Isipian atrivim men akuragh men gantɨ,
apaniba me gasɨghasighan kogham.
3 Eghtɨ men nɨghnɨzim deragh ingaran koghtɨ me bar aghumsigham.
Osɨmtɨzir me bativamin kam,
Isipɨn atrivim men akuragh me apazaghan kogham.
4 E fo, Judan atrivim Soanɨn nguibar ekiam ko Hanesɨn nguibar ekiamɨn, Isipɨn abuir gumaziba batoghasa,
uan abuir gumaziba ko ingangarir gumazir faragha zuiba amadazɨ, me ghua otivigha gɨfa.
5 Eghtɨ Isipia men akurvaghsɨ bizitam damighan kogham. Bar puvatɨgham.
Kamaghɨn amizɨ, Judaba aghumsigh bar uarir apangkuvigham.
Me aghumsɨzir bar ekiamra Judabar anɨngam.”
6 Ekiam, a Negevɨn danganimɨn, sautɨn amadaghan itir gumazamiziba puvatɨzir danganimɨn itir asɨzir atiaba, akar kam me ganɨngi. A kamaghɨn mɨgei:
“Judan gumazir aruaba sautɨn amadaghan itir gumazamiziba puvatɨzir danganir kam garui.
Kar gumazamiziba osɨmtɨziba bativamin danganir kurar mam.
Laionɨn amebaba ko apuriba ko, kuruzir gumazamizibagh iviba ko, kuruzir kurar mɨghegha zuiba ko,
asɨzir atiar kuraba danganir kamɨn iti.
Ezɨ gumazir aruar kaba ingangarir dafam gamua, bizir bar aghuir ivezim bar pɨn koziba isa,
donkiba ko kamelbagh isɨn arigha ghua,
kantrin men akurvaghan koghamiba bagha da atera zui.
7 Isipɨn kantri, kantrin igharazibar akurvaghasa mɨgɨava,
a men akurvazir puvatɨ.
Kamaghɨn amizɨ, kɨ datɨrɨghɨn ziar igiar kam a gatɨ,
‘Maburan Kuruzir Aser Puram Aperaghav Itim.’ ”
Gumazamiziba Godɨn akam baraghan aghua
8 Ikiavɨra Itir God gumazamizibar damazimɨn, me amir arazibar eghaghanibar akaba, dagɨamɨn da osirigh da aghorasa na mɨkeme.
Egh uaghan eghaghanir kam akɨnafarir rɨghizimɨn da osirigh.
Eghtɨ mɨgɨrɨgɨar kam zurara ikɨ gumazamizibar akakagh suam,
9 me gumazamizir bar puvɨram akaba barazir puvatɨziba.
Me zurara Ikiavɨra Itir Godɨn akaba batosi, a men Afeziam.
Egha me zurara ifarava, an suren akaba baraghan aghua.
10 Egha me kamaghɨn Godɨn ganganir gumaziba ko an irebamɨn mɨn garir bizibar garir gumazibav gei,
“Ia ua irebamɨn mɨn garir bizibar ganan markɨ.
Egh ia uan akabar kumigh.
Ia uam arazir aghuiba ko arazir zuezibar gɨn mangɨsɨ e mɨkɨman markɨ.
E oraghasa ifongezir akar e apezeperibaram e mɨkɨm,
kar bizir aghuir otivan koghamiba.
11 Ia ingangarir kam atakigh, egh bar saghon ikɨva, en tuavim apɨran markɨ.
E Israelian Godɨn Bar Zuezimɨn akaba baraghan aghua.”
12 Ezɨ Israelian Godɨn Bar Zuezim, a kamaghɨn mɨgei,
“Ia nan Akar Gavgavim munasava akɨrim ragha na gasara.
Egha ia kamaghɨn nɨghnɨzir gavgavim ikia ghaze,
Ifavarir arazim ko igharaz darazi dɨkabɨrir araziba ian akuragham.
13 Kamaghɨn amizɨ, ia arazir kuram gamigha gɨfa,
ezɨ arazir kurar kam bar ia gasɨghasigham,
mati bɨbɨzir muziarim dɨvazir ruarimɨn ghuamɨn ikia bar ekefi,
egha kɨran oveghangɨn dɨpɨrasava ami.
Egh dɨvazim dɨpɨrigh zuamɨra irɨgham.
14 Bar guizbangɨra, ia bar ikuvigham,
mati nguazir mɨnem bigha akuar bar mɨzumzuiaribar ire,
ezɨ akuar ekiatam itir puvatɨ,
me akua tam isɨ avim isir danganimɨn mangɨ avir mɨkɨam tuighan kogham.
O akua tam inigh mangɨ
mozir dɨpamɨn an dɨpaba tuan iburagham.”
15 Ikiavɨra Itir God, nan Ekiam, a Israelian Godɨn Bar Zuezim, a kamaghɨn mɨgei,
“Tuavir ia deravɨra ikiamim, a kamakɨn.
Ia uamategh na bagh izɨ, egh avughsɨ ikɨtɨ,
kɨ ian akurvagham.
Eghtɨ ia navir amɨrizimɨn ikɨ nɨghnɨzir gavgavim narara ikɨva, ia gavgavigh ikiam.”
God kamaghɨn mɨkeme, ezɨ ia an akar kamɨn gɨn mangan bar aghua.
16 Egha ia ghaze, “Puvatɨ! E hoziabar apiagh puv arɨ mangam.”
Ezɨ God ghaze, “Guizbangɨra, ia arɨ mangɨ!”
Ia ghaze, “En hoziaba puvɨra ivemaram.”
Ezɨ God ghaze, “Ian apanibar hoziaba bar puvɨra ivemar ian gɨntɨgham.”
17 Ian apanibar mɨdorozir gumazir vamɨra izɨ mɨsoghsɨ dɨmtɨ,
ian 1,000plan mɨdorozir gumaziba puv aregham.
Egh men mɨdorozir gumazir 5plara izɨ ian dɨmtɨ,
ia bar moghɨra dɨkavigh nguibar ekiam ategh aregham, eghtɨ gumazitam ua ikian kogham.
Eghtɨ ian gumazir ikiavɨra itir varazira bar uarira ikiam,
mati me inir avɨzim guasa temer vamɨra mɨghsɨar itimɨn a kuasa.
18 Onger Akaba 2:12; Aghuzir Akaba 16:20; Jeremaia 17:7Guizbangɨra, Ikiavɨra Itir God, a Godɨn guizɨn arazibagh amim.
Kamaghɨn amizɨ, a ian apangkuvighasa ifongiar bar ekiam iti.
A uan apangkuvim ian akakaghasa ia mɨzua iti.
Gumazamizir nɨghnɨzir gavgavim an ikiava, uarir akurvaghasa a mɨzua itiba,
me bar akuegham.
Ikiavɨra Itir God, deravɨra
uan gumazamizibar amuam
uan gumazamizibar amuam
19 Ia Jerusalemia, ia Saionɨn Mɨghsɨamɨn iti, ia ua kuarkuv aziv arangan kogham. Ezɨ Ikiavɨra Itir God datɨrɨghɨn ian apangkuvigha, deravɨra ia damuasa gara iti. Egh ia uari bagh an azangsɨgh an dɨmtɨ, a zuamɨra ian dɨmdiam baregh ian akuragham. 20 Guizbangɨra, Ekiam ia gamizɨ, ia osɨmtɨzir dafam ateri, egha ia mati gumazim daghebar otevezɨ moghɨn iti. Ezɨ a ia ko ikia ian sure gami. Eghtɨ gɨn ia uam a burian kogham. Ia uari uan damazibar an ganam.*Vezɨn kam, Hibrun akam deragha akamɨn mɨngarim bigha mɨkemezir puvatɨ. 21 Egh ia daruamin dughiamɨn tuavimɨn atamakuigh, ia ti tuavir agharir guvimɨn amadaghan itimɨn mangam, o agharir kɨriamɨn amadaghan itimɨn mangam, eghtɨ a ian gɨn ikɨ ia mangamin tuavim ia mɨkɨmam. 22 Egh ia uan asebar marvir guaba, ia fomɨra dar ingarigha silva ko golɨn da noke. Egh ia marvir guar kaba batogh dar gantɨ da mati bizir kuriba, egh ia kamaghɨn me mɨkɨmam, “Ia kamatɨgh. E ua ia gifongezir puvatɨ.”
23 Eghtɨ Ekiam ia oparizɨ dagher ovɨziba bagh amozim amadaghtɨ, a izighirɨ da ruam, eghtɨ da deravɨra nguazir kamɨn otivam. Eghtɨ ia dagher avɨriba ikiam. Eghtɨ ian bulmakauba uaghan damamin grazir avɨriba ikiam. 24 Egh ia uaghan uan azenibar dagher aghuiba inigh izɨ, egh bar deravɨra da akuvagh, uan bulmakauba ko donkin ian nguazim abɨgha ingariziba bagh, fogh ko sped isɨ dagh iniv da aghamsigh me danɨngam. 25 Dughiar Ekiam mɨsevezimɨn, dughiar bar kuram ian apaniba batoghtɨma, me pura tintinibar arɨmɨghiregham, eghtɨ men dɨvazir gavgavir kaba bar ikuvigham. Eghtɨ dughiar kamɨn, dɨpaba mɨghsɨaba bar dar otiv ivemar izighirɨtɨ, ia dɨpatamɨn oteveghan kogham. 26 Eghtɨ dughiar kamɨn, iakɨnimɨn angazangarim aruemɨn angazangarimɨn mɨn siragham. Eghtɨ aruem isiragh gavgavightɨ an angazangarim bar ekevegh, a fomɨra garir angazangarim gafiragham. Mati nɨ 7plan aruebar aruer angazangariba inigha aruer vamɨra gisafura. Ikiavɨra Itir God uamategh uan gumazamiziba deravɨra me damu men mɨzaziba ko osɨmtɨziba adeghtɨ me ghuamagheghamin dughiamɨn, bizir kaba otivam.
Ikiavɨra Itir God ivezir kuram isɨ Asiriaba danɨngam
27 Ia gan! Ikiavɨra Itir God nguibar saghon itimɨn ikia dɨkavigha uan gavgavir ekiam sara izi.
A bar puvɨrama atarima, avim ko avir mɨturim an anɨngagharim akakasi.
A mɨgeir dughiamɨn,
avir biziba bar da isiamim an akatorimɨn otifi.
28 An anɨngagharim biziba bar dagh asɨghasɨsi,
mati aperiam otogha ivemara biziba bar da ava ghua, gumazimɨn fɨragharimɨn tu.
Ikiavɨra Itir God kantriba bar uan agharimɨn men suigha,
me ikuvasa a pura tintinibar me kavkɨri.
Egha a men nɨghnɨzibagh amima, da deragha ingari puvatɨzɨ,
a me inigha danganir me mangan ifongezir puvatɨzibar zui,
mati gumazim hoziamɨn daroribar an aku mangasa,
ainɨn otevim an akam garu.
29 Godɨn Araziba 32:4Eghtɨ ia Ikiavɨra Itir Godɨn gumazamiziba, ia bizir kabar gantɨ da otivtɨ,
ia Godɨn ziam fer arazim bagha isar ekiaba dɨmagaribar dagh ami moghɨn,
ia bar akongezir ighiabar amuam.
Gumazamiziba Ikiavɨra Itir Godɨn mɨghsɨamɨn mavanang bar akuegh uan itabagh ivi ighiabar amuam,
kamaghɨra ia men mɨn bar akuegham.
Ikiavɨra Itir God a mati dagɨar gavgavim,
egha a uabɨ Israelian mogomer danganim.
30 Ikiavɨra Itir God gumazamizibar amutɨ, me an dɨmdɨar gavgavim baragham,
egh me an anɨngagharimɨn mɨzazim baragham.
An avir gavgavir biziba bar da isiamim sara izam,
egh uaghan amɨnir gavgavim ko amozim ko maburan amozir ofɨzir dagɨabar mɨn gariba, sara izam.
Eghtɨ arariba dagarvaghtɨ,
gumazamiziba an anɨngagharimɨn ganam.
31 Ikiavɨra Itir Godɨn dɨmdiam kantri Asiria damutɨ, a bar atiatigham.
Eghtɨ a uan aghorimɨn suiragh Asiriaba mɨsogh mamaghɨra ikiam.
32 Ikiavɨra Itir God, Asiriabav sozir dughiamɨn, Godɨn gumazamiziba bar akueghɨva,
gitaba ko buar guar avɨriba mɨsoghɨva,
Ekiam me mɨsozir aghorimɨn tɨngagharim gɨrara mangam.
33 Me Asirian atrivimɨn kuam tuasa avim arɨghasa mozir mam gɨkuigha gɨfa.
Egha me mozir kam gɨtuima a bar vɨn mar iraghugha bar aroke,
ezɨ me dazir avɨribar kuegha dar pozim mɨkɨni.
Eghtɨ Ikiavɨra Itir God, an anɨngagharim pamtem otogh,
mati amɨnim pamtemɨn avim giveraghtɨ, a bar puvɨra isigham.