35
God ua bizibagh amizɨ da deragha otifi
1 Aisaia 27:6; 27:10; 41:18-19; 55:12-13Gumazamiziba puvatɨzir danganiba, ko nguazir mɨsɨngiziba, da bar akuegham.
Akɨmarir aghuiba otivigh gumazamiziba puvatɨzir danganiba avaraghtɨ,
da bar akongegham.
2 Egh nguazir mɨdiarir kam, akɨmarir avɨriba an otogh oneghtɨ, an ganganim bar deraghtɨ,
a bar akuegh pamten dɨmɨva arangam.
Ikiavɨra Itir God dirir aghuim isɨ nguazir mɨdiarir kam danɨngtɨ, an ganganim bar deragham,
egh Lebanonɨn ruarir ekiam ko, Karmelɨn Mɨghsɨam ko,
Saronɨn Danganir Zarimɨn ganganir aghuimɨn mɨrara ganam.
Eghtɨ gumazamiziba Ikiavɨra Itir Godɨn angazangarim ko gavgavimɨn ganɨva, egh uaghan en Godɨn ziar ekiamɨn gantɨ,
an atrivimɨn kurkazir aghuimɨn mɨn ikiam.
3 Hibru 12:12Ia atiatim itir gumazamizibar amutɨ,
me atiatingan kogh tuivigh gavgavigh ikɨ.
Egh gavgaviba puvatɨzir gumazamiziba gavgavim me danɨng.
4 Aisaia 34:8; 61:2Ia gumazamizir atiatiba me mɨkɨm suam,
“Ia tuivigh gavgavigh, egh atiatingan markɨ.
Ian God izɨ ian akuragh,
egh ivezir kuram isɨ ian apanibar anɨngɨva bar me gasɨghasigham.”
5 Matyu 11:5; Luk 7:22Dughiar kamɨn, gumazir damazir okavɨrɨziba ua gantɨ,
gumazir biziba barazir puvatɨziba, uam oragham.
6 Luk 11:14; Jon 5:8-9; 7:38; Aposel 3:8Eghtɨ gumazir suer kuraba, uari akun mavanang izighiram,
mati ruarimɨn itir asɨzir mam, me dia a garɨsi.
Eghtɨ gumazir mɨgeir puvatɨziba,
me pamten dɨm, egh bar akuegham.
Eghtɨ dɨpaba otiv gumazamiziba puvatɨzir danganibar mangɨ,
egh nguazir mɨsɨngizibar itir fanebar ivemar magɨram.
7 Egh gigir mɨsɨngizim, dɨpar akaremɨn mɨn otogham.
Nguazir dɨpaba faragha puvatɨziba, nguazimɨn aven ivemarir dɨpar atuiba,
dar otivigh ivemar izighiram.
Afiar atiabara ikezir danganir mɨsɨngizir kam, dadar avɨriba ko ighuruniba an otivam.
8 Aisaia 11:16; Jeremaia 14:8; Matyu 7:13; 1 Pita 1:15-16Eghtɨ tuavir ekiam kagh ikɨtɨ, me kamaghɨn a dɨpon suam,
kar “God Ua Baghavɨra Inabazir Tuavim.”
Eghtɨ Godɨn damazimɨn arazir kurabagh amir gumazitam an daruan kogham,
kar Godɨn gumazamizibar tuavimra.
Eghtɨ gumazamizir nɨghnɨzir aghuiba itiba ko gumazamizir nɨghnɨzir aghuiba oteveziba,
me an atam akuighan kogham, me a gɨfogh an mangam.*Hibrun akam deragha vezɨn kamɨn mɨngarim abigha mɨgeir puvatɨ.
9 Aisaia 5:29; 13:22; 51:10; 62:12Laionɨn tam ko, asɨzir kurar mɨsozitam tuavir kamɨn mangan kogham.
Asɨzir anɨngazir taba tuavir ekiar kam daruan kogham.
Gumazamizir Ikiavɨra Itir God akuragha ua inizibara,
tuavir kamɨn daruam.
10 Aisaia 1:27; 65:19; Akar Mogomem 7:17; 21:4Gumazamizir Ikiavɨra Itir God men akuragha ua iniziba, me ua izɨ,
Saionɨn Mɨghsɨamɨn bagh izɨva, bar akongegh ongɨ, tiariba akarɨva tuavir kamɨn izam.
Egh me dabirabir bar aghuim ikɨtɨ,
bar akongezir arazir kam a men ikɨ me gizɨvagh kamaghɨra ikiam.
Eghtɨ mɨzaziba ko osɨmtɨziba me ategh, ua men ikian kogham.
35:1: Aisaia 27:6; 27:10; 41:18-19; 55:12-13
35:3: Hibru 12:12
35:4: Aisaia 34:8; 61:2
35:5: Matyu 11:5; Luk 7:22
35:6: Luk 11:14; Jon 5:8-9; 7:38; Aposel 3:8
35:8: Aisaia 11:16; Jeremaia 14:8; Matyu 7:13; 1 Pita 1:15-16
*35:8: Hibrun akam deragha vezɨn kamɨn mɨngarim abigha mɨgeir puvatɨ.
35:9: Aisaia 5:29; 13:22; 51:10; 62:12
35:10: Aisaia 1:27; 65:19; Akar Mogomem 7:17; 21:4