51
Gumazamiziba nɨghnɨzir gavgavim Ikiavɨra Itir Godɨn gavgavimɨn ikɨ
1-2 Aisaia 51:7; Rom 9:30-32Ikiavɨra Itir God kamaghɨn mɨkeme:
“Ia arazir aghuimɨn gɨntɨghasa a bagha pamten ingara, Ikiavɨra Itir Godɨn ifongiam buria a baghavɨra itir darasi,
ia nan akam baragh!
Ia uan inazir afeziam Abraham ko amebam Sara gɨnɨghnɨgh.
Aning mati dagɨam, kɨ aning abigha ia ini.
Kɨ Abrahamɨn diazir dughiamɨn, a boriba puvatɨ.
Ezɨ kɨ deragha aning gamizɨma,
aningɨn ovavir borir bar avɨrim otifi.
3 “Kɨ Ikiavɨra Itir God, nguibar datɨrɨghɨn ikuvigha itir kam Saionɨn, kɨ bar an apangkufi.
Egh kɨ an osɨmtɨziba, bar dar amightɨ da gɨvagham.
A datɨrɨghɨn mati gigir kɨnimɨn mɨn iti,
eghtɨ, kɨ bizir avɨrir bar aghuibar amutɨ da a bativightɨ,
an azenir kɨ Idenɨn ingarizimɨn mɨn gan bar deragh gan ikiam.
Eghtɨ bar akongezir arazim bar a gizɨvaghtɨ,
an itir gumazamiziba zurara ighiar na mɨnabibar amu ikiam.
4 “Ia nan gumazamiziba, ia deraghvɨra nan akam baragh.
Kɨ dabirabir aghuimɨn arazim bagh gumazamiziba bar men sure damuam,
eghtɨ nan guizɨn arazim, angazangarimɨn mɨn kantriba bar dar ikiam.
5 Kɨ men akuragh ua me iniamin dughiam, a roghɨra izegha gɨfa.
Kɨ arazir aghuimɨn gɨn mangɨ, uan gavgavimra kantriba bar dar ganam.
Saghon itir arighatɨzibar gumazamiziba, nɨghnɨzir gavgavim nan gavgavimɨn ikɨ,
egh uarir akurvaghsɨ, na mɨzuam ikiam.
6 Onger Akaba 102:26; Matyu 24:35; 2 Pita 3:10Ia kogh pɨn overiamɨn ganɨva,
egh vɨn nguazimɨn gan!
Overiar kam, mɨgharimɨn mɨn mangɨgh gɨvagham,
eghtɨ nguazim, inimɨn mɨn bɨghiregh gɨvagham.
Eghtɨ gumazamiziba, itibar mɨn pura tintinibar bar arɨghiregham.
Ezɨ nan arazir gumazamizibar akurvagha ua me isim,
a zurara ikɨ gɨvaghan kogham.
7 “Ia arazir aghuim deragha a gɨfogha
uan navir averiabar aven nan akamɨn suiragha gavgavizir darasi,
ia gumazir ian atarava akar kurabar ia gamua, ia gasɨghasɨzibar atiatingan markɨ.
8 Barareba inim apa bar anegɨvazɨ moghɨn, me bar gɨvagham.
Eghtɨ nan arazir gumazamizibar akurvagha ua me isim, gɨvaghan kogham. Bar puvatɨ.
A zurara ikɨ mamaghɨra ikiam.”
9 O Ikiavɨra Itir God, nɨ osegh dɨkafigh!
Nɨ fomɨram amizɨ moghɨn, dɨkavigh uan gavgavir ekiam sara izɨ en akuragh.
Nɨrara, nɨ Rahap a bɨra, ongarimɨn itir kuruzir aser dafar kam,
egha nɨ bar aneghoragharɨghizɨ, a bar mɨzumzuiaribar ire.
10 Egha nɨrara, gumazamiziba fɨrighɨrɨgh daru mangasa ongarir konim gamizɨma,
a mɨsɨngizɨ tuavim oto.
11 Aisaia 35:10Kamaghɨra, gumazamizir Ikiavɨra Itir God akuragha ua iniziba, me uamategh izɨ,
Saionɨn Mɨghsɨamɨn boroghɨn izɨva, bar akongegh tiariba akarɨva tuavir kamɨn izɨva ongam.
Egh me dabirabir bar aghuim ikɨtɨ,
bar akongezir arazir kam, a men ikɨ me gizɨvagh kamaghɨra ikiam.
Eghtɨ mɨzaziba ko osɨmtɨziba me ategh ua men ikian kogham.
12 Ezɨ Ikiavɨra Itir God kamaghɨn uan gumazamiziba mɨgei,
“Kɨ uabɨ, kɨ gavgavim ian navibagh anɨga, ian osɨmtɨzibagh ami da gefi.
Kamaghɨn amizɨ, ia tizim bagha gumazamizir igharazibar atiati?
Me gavgaviba puvatɨ.
Gumazamiziba bar zuamɨra arɨmɨghiregh, mati ogheba zuamɨra mɨsɨngi.
13 Kɨ Ikiavɨra Itir God, ia ti na bakɨnɨghɨnigha gɨfa.
Kɨrara, kɨ ian ingari.
Kɨ overiam an danganimram anetɨgha,
nguazimɨn ingarigha, gavgavim an mɨngarim ganɨngi.
Ezɨ ia tizim bagha gumazir kurar ia dɨkabɨn ia gasɨghasɨghamibar atiati?
Gumazir kaba bizitamɨn ia damighan kogham.
Men anɨngazir kuram pura gɨvagham.
14 Kalabusɨn ikia osɨmtɨziba aterir darasi,
me mozimɨn aven kalabusɨn ikɨ arɨmɨghireghan kogham.
Puvatɨ.
Me zuamɨra kalabus ategh
azenan izegh pura ikiam.
Egh me damamin dagher avɨriba ikiam.
15 “Kɨ Ikiavɨra Itir God, ian Ekiam.
Kɨ ongarim gamima, ongarim dɨpɨra iza nɨgɨnir dafam gami.
Nan ziamra kara,
Ikiavɨra Itir Godɨn Gavgaviba Bar Itim.
16 Kɨ uan akaba ia ganɨngi, eghtɨ ia nan akaba bar deraghvɨra da akunam.
Egha kɨ bar deravɨra uan agharimɨn ia monge.
Kɨ Ikiavɨra Itir God, kɨ overiam ko nguazim isa aningɨn danganibaram arɨghizɨ,
aning bar gavgavighavɨra iti.
Ezɨ ia Saionɨn gumazamiziba, kɨ kamaghɨn ia mɨkeme,
‘Ia nan gumazamizibara.’ ”
Ekiam ua Jerusalemɨn anɨngazir puvatɨ
17 Akar Mogomem 14:10; 16:19O Jerusalemia, ia dɨkafigh.
Ia dɨkavigh uamategh tugh gavgafigh.
Ikiavɨra Itir Godɨn anɨngagharim, mati wainɨn kap a ia ganɨngi,
egha a ia gamizɨ, ia bar anepava anegɨvagha, bar ongani.
18 Jerusalemɨn nguibar ekiam,
nɨn borir tuavim nɨn akakagh, nɨn dafarimɨn suiragh mangamiba puvatɨ.
Boritam nɨn dafarimɨn suiragh, nɨ damutɨ, nɨ deragh daruan kogham.
19 Nɨ bar osɨmtɨzir dafam ateri,
ezɨ tina nɨn apangkuvigh nɨn navim damightɨ, a ua deragham?
Apaniba iza nɨ abɨgha, nɨ gasɨghasɨki.
Egha me uaghan nɨn gumazamizir avɨrim, mɨdorozir sababar me mɨsozima, me ariaghire.
Ezɨ mɨtiriaba azir dughiar ekiam nɨ bato.
Ezɨ nɨ ghaze, kɨ nɨn navir osɨmtɨzim agɨvsɨ, bizitamɨn nɨn akuragham? Bar puvatɨ.
20 Nɨn gumazamiziba gavgaviba puvatɨgha, men damaziba men sɨri,
me tuavir mɨriabar pura tintinibar irav iti.
Me mati asɨziba, azuaziba dar suighizɨ, da tintinibar ira iti.
Egh me bizitam damuan iburagham.
Ikiavɨra Itir God, ian God, uan anɨngagharim ko ivezir kuram me gingezɨ,
me bar ikuvigha iti.
21 Kamaghɨn amizɨ, Jerusalemia, ia oragh!
Ia osɨmtɨzir bar avɨriba atera, mati amizim bar puv ongananganigha iti.
Nɨ wainɨn dɨpam amegha onganizir pu. Puvatɨ.
Ekiamɨn anɨngagharimra nɨ gamima, nɨ bar ongani.
22 Ezɨ Ikiavɨra Itir God, nɨn God, a nɨn Ekiam,
a gumazir kotɨn aven nɨn akurvazima nɨ uan apaniba dɨkabɨrim, a kamaghɨn mɨgei,
“Nɨ ganigh! Nan anɨngagharimɨn aven itir itarir nɨn agharimɨn itir kam, kɨ anedangi,
kar itarir nɨ an apava onganigha pura tintinibar ingarizim.
Eghtɨ nɨ gɨn ua kavɨn kamɨn wainɨn dɨpam aman kogham.
23 Eghtɨ kɨ itarir kam isɨ
gumazir paza nɨ gamibar agharim datɨgham.
Me fomɨra akar gavgavim nɨ ganɨga ghaze,
nɨ nguazim girɨghɨv ikɨtɨ, me nɨ dɨkɨ, nɨn akɨragharim gisɨn daru,
mati me nguazir kɨnim gisɨn arui.”