Jop Bildatɨn akam ikara
26
(Sapta 26--31)
Godɨn gavgavim bar en fofozim ko nɨghnɨzim gafira
1 Jop kamaghɨn Bildatɨn akam ikara:
2 “Nɨ ti ghaze, nɨ gumazir gavgaviba puvatɨzir kamɨn akurvasi.
Egha nɨghnɨzir aghuiba ko gavgaviba puvatɨzir gumazamizibar akurvazir gumazim.
Bar puvatɨ. Nɨ tong nan akurvazir puvatɨ.
3 Nɨ ghaze, nɨ nɨghnɨzir aghuim fofoziba puvatɨzir gumazamizibagh anɨdir gumazim.
Egha nɨ ghaze, nɨ nɨghnɨzir aghuiba puvatɨzir gumazamiziba, nɨ men sure damuam.
4 Tinara nɨghnɨzim nɨ ganɨngizɨ, nɨ kamaghɨn bizibav gei?
Tinan duam fofozir aghuim nɨ ganɨngizɨ, nɨ kamaghɨn bizibar gun mɨgei?
5-6 “Gumazamiziba ovea ghua ongarimɨn apengan itir Oveaghuezibar Nguibamɨn iti, egha me Godɨn mongezir puvatɨ.
Me Godɨn damazimɨn azenara iti.
A men garima, me atiatia nɨsi.
7 God overiamɨn ingarigha pura pɨn anetɨzɨ, a danganir bizitam faragha itir puvatɨzimɨn iti.
Egha nguazim atɨzɨ a pura iti, bizitam an suirazir puvatɨ.
8 God amozim isa uan ghuariabar anetɨzɨ, da amozimɨn suirazɨ, a iti.
Dɨpar kam bar osemegha, an osɨmtɨzim ghuariaba abɨzir puvatɨ.
9 God ghuariabagh amizɨ,
da iza iakɨnir ekiam avaragha Godɨn atrivir dabirabim modo.
10 An ongarim gisɨn, gumazimɨn damazim gan mangɨ gɨvaghamin mɨtaghniam, iver agharimɨn mɨn, a gighua an osiri.
Mɨtaghniar kam, aruem ko dɨmagarim abɨsi.
11 God atarir dughiamɨn, mɨghsɨaba ko overiam
dɨgavir kuram gamua agoa nɨsi.
12 God uan gavgavir ekiamɨn ongarim gamizɨ, a pura nɨmɨra iti.
A uan nɨghnɨzir aghuimɨn, ongarimɨn itir kuruzir aser ekiam Rahapɨn gavgavim dɨkabɨra.
13 God uabɨ amɨnir ekiam amadazɨ a iza ghuariabagh ivarazɨ,
overiam uam angazangari.
Egha a uan dafarimɨn kuruzir aser ekiar kam bɨrazɨma,
an areme.
14 Bizir an amizɨ otivizir kaba, da an gavgavir ekiamɨn pura bizir muziariba,
e da baragha dar gari.
Eghtɨ God bar uan gavgavim en akaghtɨ,
e akatam bar a mɨkɨman iburagham. Bar puvatɨgham.
Godɨn gavgavim bar ekefe.”