Godɨn Eghaghanim: Akar Gavgavir Dɨkɨrɨzir Ghurim ko Igiam Matyu 4

Satan Iesus gifarasa a gakaghori

(Mak 1:12-13; Luk 4:1-13)

1 Dughiar kamɨn Godɨn Duam Iesus inigha ghua Satan a gifarasa gumazamiziba puvatɨzir danganimɨn ghu. 2 Ezɨ Iesus 40plan arueba ko dɨmagaribar daghetam inizir puvatɨ. Ezɨ mɨtiriam an azi. 3 Ezɨ gumazir ifavaribagh amim Satan iza a batogha kamaghɨn a mɨgei, “Nɨ guizbangɨra Godɨn Otarim, nɨ dagɨar kaba akar gavgavim dav kemeghtɨ da bretɨn rubuzibar mɨn otifigh.”

4 Ezɨ Iesus Satan ikaragha ghaze, “Godɨn Akɨnafarim kamaghɨn mɨgei, ‘Gumazamiziba daghebara damɨva dar gavgavimɨn ikian kogham. Puvatɨ. Me God mɨgeir mɨgɨrɨgɨaba bar dar gɨn mangɨva me ikɨrɨmɨrir aghuim iniam.’ ”

5 Ezɨ Satan Iesus inigha Jerusalemɨn ghugha a isa Godɨn Dɨpenim pɨn mar anefa. 6 Egha kamaghɨn a mɨgei, “Nɨ oragh, Godɨn Akɨnafarim kamaghɨn mɨgei, ‘A nɨ bagh uan enselba akar gavgavim me mɨkɨmtɨma me deraghvɨra nɨn ganam. Egh me uan dafaribar nɨ fueghtɨ, nɨ uan dagarim dagɨatamɨn aneseghan kogham!’ Kamaghɨn amizɨ, nɨ guizbangɨra Godɨn Otarim, nɨ kagh ikɨ uabɨ ekunigh.”

7 Ezɨ Iesus an akam ikaragha ghaze, “Godɨn Akɨnafarim uaghan kamaghɨn mɨgɨa ghaze, ‘Nɨ uan Ekiam Godɨn Araziba tuisɨgh a gɨfoghsɨ an gavgavim bagh azangan markɨ.’ ”

8 Ezɨ Satan ua Iesus inigha ghua mɨghsɨar bar pɨn itir mamɨn ghuavanabogha nguazir kamɨn kantriba bar, ko dar bizir aghuiba an akakagha ghaze, 9 “Nɨ tevimning apɨrigh nan ziam feghtɨ, bizir kaba kɨ bar da nɨ danɨngam.”

10 Ezɨ Iesus a mɨgɨa ghaze, “Satan nɨ na gitagh! Godɨn Akɨnafarim kamaghɨn mɨgei, ‘Nɨ uan Ekiam God, nɨ an apengara ikɨ an ziamra fam.’ ”

11 Ezɨ Satan Iesus ataghizɨma, Godɨn enselba an garava an akurvasi.

Iesus Galilin Distrighɨn ingari

(Mak 1:14-15; Luk 4:14-15)

12 Iesus orazima me Jon, Gumazamiziba Ruer Gumazim a isa kalabus gatɨ, ezɨ a uamategha Galilin Distrighɨn ghu. 13 Egha a Nasaretɨn nguibam ategha ghua Kaperneamɨn nguibamɨn iti. Nguibar kam, Galilin Dɨpar Akaremɨn dadarimɨn Sebulun ko Naptalin nguazir asɨzimɨn iti.* 14 Arazir kabanagh otiva fomɨra Godɨn akam inigha izir gumazim Aisaia mɨkemezɨ moghɨn otifi. A ghaze, 15 “Ia gumazamizir Sebulunɨn nguazim ko Naptalin nguazimɨn itiba, nguazir kam a tuavir ongarimɨn zuimɨn boroghɨra itir danganim ko Jordanɨn Fanemɨn dadarir vongɨn itir danganim, a Galilin Distrighɨn nguazim. Danganir kam Kantrin Igharazibar Gumazamizir avɨriba uaghan an aven iti. 16 Gumazamizir arazir kurabar mɨtatemɨn aven aruiba, me datɨrɨghɨn angazangarir ekiamɨn gari. Me danganir mɨtatemɨn apiaghav ikiava aremeghasava ami, ezɨ datɨrɨghɨn amɨnim tirazɨ angazangarim me gisira.”

Iesus Akar Aghuim akuri

(Sapta 4:17--9:34)

Iesus suren gumazir 4plan diazɨ,
me an gɨn zui

(Mak 1:16-20; Luk 5:1-11)

17 Dughiar kamɨn Iesus ingangarim foregha akam akura gumazamizibav gɨa ghaze, “God Bizibagh Ativamin Dughiam a roghɨra ize. Kamaghɨn amizɨ, ia navibagh iragh!”

18 Ezɨ Iesus Galilin Dɨpar Akaremɨn dadarimɨn ghua gari aveghbuar mamning iti. Saimon, me “Pita,” a garɨsi. A uan dozim Andru ko, aning iver ekiaba dɨpamɨn da kuri. Aning osiriba isa dagɨaba bagha da amadir gumazimning. 19 Ezɨ Iesus aning mɨgɨa ghaze, “Gua nan gɨn izɨtɨma kɨ guan akakaghtɨma, gua osiriba isi moghɨn gumazamiziba iniam.” 20 Ezɨ aning an akam baraghavɨra, uan iveba ategha an gɨn zui.

21 Ezɨ Iesus mong sɨvagha ghua aveghbuar mamningɨn api. Jems, a Sebedin otarim, a uan dozim Jon ko iti. Aning uan afeziam Sebedi ko me botɨn mamɨn iti. Men iveba dɨghoraghirezi, me dar toribar kɨri. Ezɨ Iesus aning diazɨma, 22 aning maghɨra uan afeziam ko bot ategha Iesusɨn gɨn zui.

Iesus akam akura arɨmariabar kɨri

(Luk 6:17-19)

23 Iesus Galilin Distrik bar a garua me God ko mɨgeir dɨpenibar aven men sure gami. Egha a God Bizibagh Ativamin Dughiamɨn akam me mɨgɨa men arɨmariaba ko osɨmtɨzir men namnabar itiba bar da gefi. 24 Ezɨ an biarim Sirian Provins bar an ghu. Ezɨ gumazamizir arɨmariaba itiba, me bar me isa a bagha izi. Gumazir aria mɨzazir kuraba baraziba, ko duar kuraba apazaziba, ko gumazir arɨmariar inɨrɨzibagh amiba, ko gumazir agharapaniba ariaghireziba, me bar me inigha a bagha izi. Ezɨ Iesus men arɨmariaba bar da gɨfa.† 25 Ezɨ gumazamizir bɨzir dafam, me a koma arui. Galilin Distrighɨn itir darazi ko Distrik Dekapolisɨn itir darazi ko Jerusalem ko Judian Distrik, ko Jordanɨn vongɨn itir danganimɨn itir darasi, me an gɨn arui.

Matyu
<
4
>

4:1: Mk 1:12-13, Lu 4:1-13, Hi 2:18, 4:15

4:1: Mak 1:12-13; Luk 4:1-13; Hibru 2:18; 4:15

4:2: Kis 34:28, 1 Kin 19:8

4:2: Ua Me Ini 34:28; 1 Atriviba 19:8

4:3: Jo 6:30-31

4:3: Jon 6:30-31

4:4: Lo 8:3

4:4: Godɨn Araziba 8:3

4:6: Sng 91:11-12, Jo 7:3-4

4:6: Onger Akaba 91:11-12; Jon 7:3-4

4:7: Lo 6:16

4:7: Godɨn Araziba 6:16

4:9: Jo 6:14-15

4:10: Lo 6:13, 10:20, Jos 24:14

4:10: Godɨn Araziba 6:13; 10:20; Josua 24:14

4:11: Hi 1:6, 1:14

4:11: Hibru 1:6; 1:14

4:12: Mt 14:3, Mk 1:14, 6:17, Lu 3:19-20, Jo 4:43

4:12: Matyu 14:3; Mak 1:14; 6:17; Luk 3:19-20; Jon 4:43

4:13: Jo 2:12

4:13: Jon 2:12

*4:13: Israelɨn inazir pumuning Sebulun Ko Naptali fomɨra Galilin Dɨpar Akaremɨn dadarimɨn ike. Egha Iesusɨn dughiamɨn aning Galilin Distrighɨn aven iti.

4:15: Aisaia 9:1-2

4:16: Ais 42:7, Lu 2:32

4:16: Aisaia 42:7; Luk 2:32

4:17: Mt 3:2, 10:7, Mk 1:14-15

4:17: Matyu 3:2; 10:7; Mak 1:14-15

4:19: Mt 13:47, Lu 5:1-11

4:19: Matyu 13:47; Luk 5:1-11

4:20: Mt 19:27, Mk 10:28, Lu 18:28

4:20: Matyu 19:27; Mak 10:28; Luk 18:28

4:23: Mt 9:35, Mk 1:39, Lu 4:15, 4:44, Ap 10:38

4:23: Matyu 9:35; Mak 1:39; Luk 4:15; 4:44; Aposel 10:38

4:24: Mk 6:55

4:24: Mak 6:55

†4:24: Judan Nguibam Rom gavmanɨn apengan itir dughiamɨn, kantri Israel a Romɨn Provinsɨn ekiam Sirian aven iti.

4:25: Mk 3:7-8

4:25: Mak 3:7-8