24
1 Ezɨ Balam datɨrɨghɨn fo, Ikiavɨra Itir God a deravɨra Israelia damuamin akam mɨgei. Kamaghɨn amizɨ, a faragha amizɨ moghɨn uamategha akuzir araziba bagha ghuzir puvatɨ. A raghɨrɨgha munagh gumazamiziba puvatɨzir danganimɨn gari. 2 A garima, Israelian gumazamizibar anababa vaghvagha uan purirpenibar ikiavɨra iti. Ezɨ Godɨn Duam iza anevarazɨma, 3 a kamaghɨn mɨgei:
“Kɨ Beorɨn otarim Balam, ia nan mɨgɨrɨgɨaba baragh.
Kɨ deraghavɨra bizibar gara dav geir gumazim.*Hibrun akam, kagh deragha mɨgeir puvatɨ. (Ves 15 uaghan kamaghɨra ghu.)
4 Kɨ Godɨn akar a mɨgeiba barasi.
Egha kɨ pamtemɨn gara, irebamɨn mɨn garir bizimɨn aven,
kɨ nguazim gɨra uan guam nguazim mɨtuagha, uan damazimningɨn deraghavɨra garima,
Godɨn Gavgaviba Bar Itim nan akakasi.
5 O Jekopɨn ovavir boriba, kɨ ian purirpenibar garima,
dar ganganiba bar dera.
Bar guizbangɨra, Israelia, ian danganir ia itiba,
bar dera.
6 Ian purirpenir kaba, mati detɨn temer bɨzir bar ruariba mɨtivighav iti.
Egha mati azeniba faner mɨriamɨn iti.
Egha mati temer aghuir Ikiavɨra Itir God opariziba.
Egha mati sidan temer dɨpar mɨriamɨn itiba.
7 Amozir avɨriba Israelian nguazim gizam.
Eghtɨ Israelian gumazamiziba uan dagheba nguazir aghuimɨn da oparam.
Israelian atrivim, an gavgavim ko ziar ekiam, Atrivim Agakɨn gavgavim ko ziar ekiam gafiragham.
Eghtɨ Israelian atrivim gumazamizir avɨribagh ativagh men ganam.
8 God Isipɨn kantrin Israelia inigha men akua azenan ize.
Egha me bagha bulmakaun atiamɨn mɨn mɨsosi.
Kamaghɨn amizɨ, Israelia uan apanibav sogh bar me gasɨghasigh,
uan afuzibar me giniv men agharapanibagh asegham.
9 Jenesis 12:3; 49:9Israelia, mati laionɨn bar gavgavim.
A dakutɨ, tav a gaghunan atiatigham.
Gumazitam deragh Israelia damusɨ mɨkɨmtɨ, God deragh a damuam.
Eghtɨ gumazitam Israelia ikuvsɨ akavsiam me darɨghtɨ, God pazɨvɨra a damigham.”
10 Ezɨ Atrivim Balak akar kam baregha atara an navim bar ikuvizɨ, a uan dafarimning mɨsuegha kamaghɨn Balam mɨgei, “Kɨ uan apaniba ikuvighamin akavsiam me darɨghasa nɨ bagha mɨkemezɨ, nɨ ize. Ezɨ nɨ 3plan dughiar kabar me deraghvɨra ikiasa me mɨgei. 11 Kamaghɨn amizɨ, kɨ aghua. Nɨ datɨrɨghɨra na gitagh uamategh uan nguibamɨn mangɨ! Kɨ faragha ivezim nɨ danɨngasa akar dɨkɨrɨzim gami. Ezɨ Ikiavɨra Itir God nɨn ivezim iniamin tuavim apɨri, eghtɨ nɨ ivezim inighan kogham.”
12 Ezɨ Balam a ikaragha ghaze, “Nɨ oragh. Gumazir nɨ amadaziba, kɨ kamaghɨn me mɨkemegha gɨfa. 13 Nɨ fo, nɨ ti uan atrivimɨn dɨpenimɨn itir silvaba ko golba bar, na danɨngtɨ, kɨ Ikiavɨra Itir Godɨn akam batuegh bizitam uan ifongiamɨn a damuan kogham. Akar Ikiavɨra Itir God mɨkemezimra, kɨ anarɨra mɨkɨmam.”
Balamɨn akar abuananam
14 Egha Balam kamaghɨn Balak mɨgei, “Kɨ uamategh uan adarazi bagh mangasava ami. Egh kɨ faragh ikiangsɨzim nɨ danɨngtɨ, nɨ fogham, Israelia gɨn manmaghɨn ganamin araziba nɨn adarazir amuam.” 15 Egha akar kam kamaghɨn a mɨgei:
“Kɨ Beorɨn otarim Balam, ia nan mɨgɨrɨgɨaba baragh.
Kɨ deraghavɨra bizibar gara dav geir gumazim.
16 Kɨ Godɨn akar a mɨgeiba barasi.
Kɨ Godɨn Bar Pɨn Itimɨn fofoziba dagh fo.
Egha kɨ pamtemɨn gara, irebamɨn mɨn garir bizimɨn aven,
kɨ nguazim gɨra uan guam nguazim mɨtuagha uan damazimningɨn deravɨra garima,
Godɨn Gavgaviba Bar Itim nan akakasi.
17 Kɨ gɨn otivamin bizibar gara,
egha uaghan Israelian gari.
Atrivir mam men tongɨn otogh, ziar ekiam ko gavgavim ikiam,
egh mɨkovezir angazangarim itimɨn mɨn ikɨ gumazamizibagh siragham.
Egh Moapɨn gumazir dapanibav sogh bar me agɨvagham.
Egh Setɨn ikɨzimɨn gumazamiziba bar me abɨragham.
18 Egh an apanir Idomɨn itiba, a bar me agɨvagham.
Egh men nguaziba ua bagh bar da inigham.
Eghtɨ Israelia uan apaniba abɨn mamaghɨra ikiam.
19 Israelian tongɨn atrivitam otogh, uan apaniba dɨkabɨragham,
egh men nguibar ekiamɨn aven gumazir ikiavɨra itir varazira bar me agɨvagham.”
20 Egha Balam irebamɨn mɨn garir bizimɨn aven Amalekian gari. Egha kamaghɨn mɨgei:
“Amalekia bar gavgavizɨ, men gavgavim ikɨzir igharazibar gavgavibagh afira.
Egh me gɨn iregh bar ikuvigham.”
21 Egha Balam irebamɨn mɨn garir bizimɨn aven a Kinian gari. Egha kamaghɨn mɨgei:
“Danganir ia itim, a nguibar gavgavir aghuim, ia deravɨra an ikia,
mati kuarazir isamɨn mɨkonim, dagɨabagh isɨn bar pɨn mar mɨghsɨamɨn iti.
22 Eghtɨ Asuria, gɨn izɨ ia mɨsogh ia gasɨghasɨgh,
egh ian adarazi inigh kalabuziar gumazamizibar mɨn mangɨgham.”
23 Egha Balam akar mam ua kamaghɨn a mɨkeme:
“Iavzika! God arazir kabar amuamin dughiamɨn, tinara ikɨvɨra ikiam?
Bar puvatɨgham.†Hibrun akam, kagh deragha mɨgeir puvatɨ.
24 Saiprusɨn mɨdorozir gumaziba uan kurir ekiaba inigh izɨ, Asuria ko Eberia mɨsogh me abɨragham.
Egh Saiprusba uaghan bar gɨvagham.”
25 Egha Balam dɨkavigha uamategha uan nguibamɨn zuima, Atrivim Balak uaghan uamategha uan nguibamɨn ghu.