58
God gumazir kurabagh asɨghasɨghasa
Devit ighiar kam osiri.
Gumazir ighiabar faragha zuim a gumazamizibav kɨmtɨ, me tiarir kamɨn gɨn mangɨ ighiar kam bangam, “Gumazitam gasɨghasɨghan markɨ.”
Onger akar kabar mam, me ziam Miktam, a garɨsi.
1 Ia gumazir dapaniba, ia kotiabar deragha biziba baragha dav gei, o?
Ia gumazamizibar mɨgɨrɨgɨaba deragha da baragha da tuisɨsi, o puvatɨ?
Ti puvatɨ.
2 Ian nɨghnɨziba arazir kurabara damuasa dɨkafi.
Ia nguazimɨn gumazamizibagh asɨghasɨghasavɨram ami.
3 Gumazir arazir kurabagh amiba, me mangamin tuavim ataki.
Men amebaba me batezir dughiamɨn ikegha iza datɨrɨkɨn, me ifaravɨra iti.
4 Men mɨgɨrɨgɨaba mati, kuruzimɨn aven itir imezir kuram dagh izɨfa.
Egha me kuruzimɨn mɨn,
uan kuarir toribav konegha biziba barazir puvatɨ.
5 Kuruziba oraghtɨ, gumazim marvim givitɨ, kuruzir kaba dɨkavigh ighiam.
Gumazir kurar kaba, me kuruzir mariviba barazir puvatɨzibar mɨn ami.
Marvibagh ivir fofozir gumazim marvim givitɨ,
kuruzim oreghan kogham.
6 O God, nɨ arazir kurabagh amir gumazir kabagh asɨghasɨkigh.
Ikiavɨra Itir God, me laionɨn mɨsozibar mɨn ikia puvɨra mɨsosi.
Nɨ men ataribav sogh, bar da apɨrarigh da asigh.
7 Nɨ me damightɨ, me dɨpam nguazimɨn aven uaghiri moghɨn mangɨ pura puvatɨgh.
Nɨ me dɨkabɨntɨ, me gumazim grazim dɨkabɨri a uaghira mɨdɨi moghɨn me mɨsɨngigh.
8 Jop 3:16Nɨ me damutɨ, me demdembar mɨn arɨmɨghiregh puvatɨgh.
Nɨ me damightɨ, me borim amebamɨn navir averiamrama aremezɨ moghɨn ikɨ.
Egh amebam gɨn a bateghtɨ an aruemɨn ganighan kogham.
9 Gumazim temer muziarim voroghɨrama anetuzɨ moghɨn, God bar zuamɨra me gasɨghasigham.
Me angamɨra ikiavɨra itima, God men anɨngaghegha bar moghɨra me agɨfa.
10 God, gumazamizir arazir kurabagh amibagh asɨghasɨgham.
Eghtɨ gumazamizir aghuiba arazir kamɨn ganigh bar akuegh,
gumazir kurabar ghuzibar uan dagariba ruam.
11 Onger Akaba 67:4; 92:7Gumazir igharaziba uaghan ganigh fogh suam,
“Bar guizbangɨra, gumazir aghuiba me ivezir aghuim isi.
Bar guizbangɨra, God ikia
kotɨn aven nguazimɨn itir gumazamizibar araziba tuisɨsi.”