71
Gumazir ghurim God ko mɨgei
1 Onger Akaba 31:1-3O Ikiavɨra Itir God, kɨ nɨ ko ikɨtɨ nɨ na geghuv na avaragh nan gantɨ,
gumazir kuraba na gasɨghasɨghtɨ kɨ aghumsɨghan kogham.
Nɨ me ateghtɨ me na abɨnan markɨ.
2 Nɨ zurara arazir aghuim gami.
Egh nɨ uan arazir aghuir kamɨn gɨn mangɨ nan akuragh!
Kɨ nɨ ko mɨgeir mɨgɨrɨgɨaba,
nɨ da baregh ua na inigh.
3 Onger Akaba 18:2; 42:8; 90:1; 91:9Nɨ dagɨar ekiamɨn mɨn na modogh.
Nɨ dɨvazir gavgavimɨn mɨn ikɨ na ekɨarughtɨ, nan apaniba na abɨnan kogham.
Kɨ nɨn aven modogh ikiam.
Nɨrara deragh na geghuv nan gantɨ, kɨ deragh ikiam.
4 Nan God, nɨ gumazir kurabar dafarimɨn ua na ini.
Me arazir kurabar amuasa bar gavgafi.
5 Ekiam, kɨ nɨghnɨzir gavgavim nɨn iti.
Kɨ fomɨra uan igiamra ikia, nɨghnɨzir gavgavim Ikiavɨra Itir God, nɨn ikia,
iza datɨrɨghɨn ikia kamaghɨra iti.
6 Nan ikɨrɨmɨrir kɨ itir kam, a nɨn agharimra iti.
Nan amebam na batezɨ dughiamra, nɨ na geghuva deragha nan gara iza datɨrɨkɨn.
Kamaghɨn, kɨ nɨn ziam zuraram a fam.
7 Na bativizir biziba, gumazamizir avɨriba dar ganigha fo,
nɨ na geghuv nan ganasa gavgafi.
8 Dughiabar zurara,
kɨ nɨn ziar ekiam fɨ, an gun gumazamizibav kɨmasa.
9 Onger Akaba 92:14; Aisaia 46:4Kɨ ghurigha gɨvagha gavgaviba puvatɨ,
nɨ na ategh akɨrim ragh na gasan markɨ.
10 Nan apaniba na mɨsueghtɨ kɨ aremeghasa
uari akuvagha akabav sosi.
11 Me ghaze, “God anetegha gɨvazɨ, gumazir an akurvaghamiba puvatɨ.
Aria, e an agɨragh an suiraka.”
12 Onger Akaba 22:11; 38:21-22; 70:5O God, nɨ na ategh nan saghon ikian markɨ.
O nan God, nɨ zuamɨra izɨ nan akuragh.
13 Gumazir akaba na gasiba, nɨ me abɨnigh bar moghɨra me agɨfagh.
Me na gasɨghasɨghasa, nɨ me gasɨghasɨgh men ziaba abɨnightɨ,
me okam nɨghnɨgh bar aghumsigham.
14 Onger Akaba 130:7Nɨ nan akurvaghsɨ, kɨ nɨ mɨzuam nɨghnɨzir gavgavim nɨn ikiam.
Egh nɨn ziam fɨ mangɨvɨra ikiam.
15 Kɨ nɨn arazir aghuimɨn gun gumazamizibav kɨmam.
Bizir aghuir nɨ amir kabar dɨboboniba, kɨ deragha dagh fozir puvatɨ.
Nɨ ua na inizir arazir kam, kɨ dughiabar zurara an gun me mɨkɨmam.
16 O Ekiam, nɨ Ikiavɨra Itir God, kɨ nɨn gavgavir ekiam gɨnɨghnɨgh nɨn ziam fam.
Egh kamaghɨn akam akun suam,
“Ikiavɨra Itir God uabɨra dera.”
17 O God, kɨ igiamra ikia iza datɨrɨghɨn, nɨ nan sure gami.
Ezɨ bizir aghuir nɨ amir kaba, kɨ dughiar kamɨn dar gun mɨkɨmvɨra ikiam.
18 Onger Akaba 22:31; 78:4-6Kɨ datɨrɨghɨn ghurigha gɨvagha bar ghurapani.
God, nɨ na ataghɨraghan markɨ.
Nɨ na ko ikɨtɨ,
kɨ nɨn gavgavir ekiamɨn gun gumazamizir gɨn otivamibav kɨmam.
19 God, nɨn arazir aghuim nguazir kamɨn danganiba bar dagh izɨvagha, uanaga overiamɨn tu,
egha gumazamizibar damazibar azenara iti.
Nɨ ingangarir bar ekiam gami.
Ezɨ nguazir kamɨn gumazitam nɨn mɨn garir pu. Bar puvatɨ.
Nɨ bar moghɨra me gafira.
20 Osɨmtɨzir kaba nɨ na bagha da amangizɨ da izi.
Ezɨ kɨ fo, nɨ gavgavim ua na danɨngam.
Kɨ mati aremegha nguazir torimɨn ikia fo,
nɨ ua na inigh azenan izam.
21 Nɨ nan ziam damightɨ a bar ekevegh,
egh na damightɨ kɨ navir amɨrizim ikiam.
22 Kɨ gita mɨsoghtɨ an ararer aghuim otivtɨ, kɨ nɨn ziam fam.
O nan God, nɨn akam a bar guizbangɨra, ezɨ nɨ na ataghɨrazir puvatɨ.
Kamaghɨn, kɨ nɨn ziam fam.
Nɨ, Israelian Godɨn Bar Zuezim,
kɨ buam mɨsogh ighiam bangɨ ziar ekiam nɨ danɨngam.
23 Kɨ ighiam bangɨ bar akongegh dɨmam.
Kɨ nɨn ighiaba bangɨ, egh uan akamra da bangan kogham.
Puvatɨ. Nɨ ua na inizir bizir kam bagh,
kɨ uan navim ko, nɨghnɨzim sara nɨn ighiaba bangam.
24 Gumazamiziba na gasɨghasɨghasava amima,
nɨ me abɨrazɨ me bar aghumsɨki.
Kamaghɨn amizɨ, kɨ dughiabar zurara
arazir aghuir nɨ amizir kamɨn gun gumazamizibav kɨmam.