118
Me God men akuragha apaniba abɨrazir bizim bagha a mɨnabi
1 1 Eghaghaniba 16:34; 2 Eghaghaniba 5:13; 7:3; Esra 3:11; Onger Akaba 100:5; 106:1; 107:1; 136:1; Jeremaia 33:11Ikiavɨra Itir God a dughiabar zurara en dera,
egha a zurara en apangkuvigha mamaghɨra iti.
Kamaghɨn amizɨ, e a mɨnamam!
2 E Israelian gumazamiziba, e kamaghɨn mɨkɨm suam,
“A zurara en apangkuvigha mamaghɨra iti.”
3 Aronɨn adarazi uaghan kamaghɨn mɨkɨm suam,
“A zurara en apangkuvigha
mamaghɨra iti.”
4 Gumazamizir Ikiavɨra Itir Godɨn atiatiba e bar moghɨra uaghan kamaghɨn mɨkɨm suam,
“A zurara en apangkuvigha
mamaghɨra iti.”
5 Onger Akaba 18:19; 120:1Kɨ faragha bar osɨmtɨzir ekiam ikia
Ikiavɨra Itir God ko mɨgɨa an deima,
a na baregha
nan osɨmtɨzir kam agɨfa.
6 Onger Akaba 56:4; 56:11; Aisaia 51:12; Hibru 13:6Ikiavɨra Itir God na ko itima
kɨ atiatir puvatɨ.
Kɨ fo, gumazamiziba arazitamɨn na damighan kogham.
7 Ikiavɨra Itir God uabɨ nan akurvasi.
Kɨ Ekiamra gantɨ,
a nan apaniba abɨnigh me gasɨghasigham.
8 Kamaghɨn deragham, e Ikiavɨra Itir Godra nɨghnɨzir gavgavim an ikɨtɨ,
an e geghuv e avaragh en gantɨ,
gumazamizir kuraba e gasɨghasighan kogham.
Eghtɨ e nɨghnɨzir gavgavim gumazamizibar ikian kogham.
9 Kamaghɨn deragham, e Ikiavɨra Itir Godra nɨghnɨzir gavgavim an ikɨtɨ,
an e geghuv e avaragh en gantɨ,
gumazamizir kuraba e gasɨghasighan kogham.
Eghtɨ e nɨghnɨzir gavgavim gumazir dapaniba ko atrivibar ikian kogham.
10 Apanir avɨriba faragha na ekɨaru,
ezɨ Ikiavɨra Itir Godɨn ziamɨn gavgavimra, kɨ me dɨkabɨra.
11 Guizbangɨra, me danganiba bar na ekɨaruzɨ
kɨ tongɨra iti.
Ezɨ Ikiavɨra Itir Godɨn ziamɨn gavgavimra, kɨ bar me agɨfa.
12 Me aparibar mɨn bar na ekɨaru.
Egha me dadabar avimɨn mɨn zuamɨra isigha munge.
Ikiavɨra Itir Godɨn ziamɨn gavgavimra, kɨ me gasɨghasɨki!
13 Nan apaniba faragha na ko mɨdorozim pamten a gamua
na abɨnasava ami.
Ezɨ Ikiavɨra Itir God nan akura.
14 Ua Me Ini 15:2; Aisaia 12:2Ikiavɨra Itir God uabɨ na gamizɨma,
kɨ gavgavigha onger akam bangava an ziam fe.
A zurara ua na ini,
ezɨ kɨ an ziam fasa.
15 Ia oragh! Ikiavɨra Itir Godɨn gumazamiziba uan purirpenibar aven ikia
bar akongegha dɨa kamaghɨn mɨgei,
“Ikiavɨra Itir Godɨn gavgavimra,
e uan apaniba dɨkabɨra.
16 Ikiavɨra Itir Godɨn gavgavimra en akura.
Ikiavɨra Itir Godɨn gavgavimra,
e uan apaniba dɨkabɨra.”
17 Kɨ fo, kɨ aremeghan kogham. Puvatɨ.
Kɨ angamɨra ikɨ,
egh bizir Ikiavɨra Itir God amizibagh eghanam.
18 Kɨ fo, Ikiavɨra Itir God nan arazir kuraba akɨrasa mɨzazir ekiam na gase,
egha na ataghizɨ kɨ aremezir puvatɨ.
19 Ia Ikiavɨra Itir Godɨn Dɨpenimɨn na bagh tiar akaba kuightɨ,
kɨ aven mangɨ egh a mɨnamam.
20 Kar Ikiavɨra Itir Godɨn tiar akam,
eghtɨ gumazamizir an damazimɨn derazibara an aven mangam.
21 O Ikiavɨra Itir God, nɨ kɨ nɨ ko mɨkemezir mɨgɨrɨgɨam baraki,
egha nan akurazɨ, kɨ deragha iti.
Kamaghɨn kɨ nɨ mɨnabi.
22 Luk 20:17; Aposel 4:11; 1 Pita 2:7 Matyu 21:42; Mak 12:10-11Kar dɨpenir akɨnir ingangarir gumaziba aghuazim,
a datɨrɨghɨn dɨpenim aterir guarim gava.
23 Ikiavɨra Itir God uabɨ bizir kam gamizɨma an oto.
Ezɨ e an garima, a bar dera.
24 Ikiavɨra Itir God uabɨ, dughiar aghuir kam e ganɨngi.
Kamaghɨn en naviba deraghtɨ, e bar akuegham.
25 Matyu 21:9; Mak 11:9; Jon 12:13O Ikiavɨra Itir God, nɨ en akurvaghasa e nɨn azangsɨsi.
Nɨ en akuraghtɨ, bizir e amiba, da bar deragham.
26 Matyu 21:9; 23:39; Mak 11:9; Luk 13:35; 19:38; Jon 12:13E ghaze, gumazir Ikiavɨra Itir Godɨn ziam ko gavgavimɨn izim,
God deragh a damu!
E Ikiavɨra Itir Godɨn Dɨpenimɨn ikia,
gumazir kamɨn ziam fe.
27 Ikiavɨra Itir God, a uabɨra guizbangɨra God.
A bar deravɨram e gamua an angazangarim e gisira.
Kamaghɨn, e bar akongegh temer aguabar suigh
ofa gamir dakozimɨn mɨkebabar itir bulmakaun kombar mɨn garir bizibagh ighuraruam.
28 O God, nɨ nan God,
ezɨ kɨ nɨ mɨnabaghasa.
Nɨ nan God,
kɨ ziar ekiam nɨ danɨngam.
29 Ikiavɨra Itir God a dughiabar zurara en dera,
egha a zurara en apangkuvigha ikia mamaghɨra iti.
Kamaghɨn amizɨ e a mɨnamam!
118:1: 1 Eghaghaniba 16:34; 2 Eghaghaniba 5:13; 7:3; Esra 3:11; Onger Akaba 100:5; 106:1; 107:1; 136:1; Jeremaia 33:11
118:5: Onger Akaba 18:19; 120:1
118:6: Onger Akaba 56:4; 56:11; Aisaia 51:12; Hibru 13:6
118:14: Ua Me Ini 15:2; Aisaia 12:2
118:22: Luk 20:17; Aposel 4:11; 1 Pita 2:7
118:22: Matyu 21:42; Mak 12:10-11
118:25: Matyu 21:9; Mak 11:9; Jon 12:13
118:26: Matyu 21:9; 23:39; Mak 11:9; Luk 13:35; 19:38; Jon 12:13