145
Ighiar Godɨn ziam fem*Arazir Israelia gɨn ghua akaba osirir maba, da mong ighara. Hibrun akamɨn me 22plan letabar uan akaba osiri. Egha dughiar maba, me osirir akaba 22plan akuabar da bɨsi. Ezɨ dar akuar kaba, vaghvagha dar akar faragha zuibar faragha zuir letaba, letan igharazim iti. Me ikɨzir igharazibar akar, Hibrun akamɨn daghizir dughiamɨn, me Hibrun akamɨn arazir kamɨn gɨn ghua dagh izir puvatɨ. E fo, Aruamɨn akamɨn mɨgɨrɨgɨaba 21plan letaba iti. An letabar dɨbobonim mong Hibrun letabar dɨbobonimɨn mɨn ghu. Ezɨ kamaghɨn Aruamu Baibelɨn Onger Akabar Akɨnafarim sapta 145, e Hibru akamɨn arazir kamɨn gɨn ghua, a gɨra. Eghtɨ nɨ gan fogham, a manmaghɨn mangam. Nɨ ighiar kamɨn gantɨ 21plan letaba ikiam, vezɨn faragha zuim, an mɨgɨrɨgɨar otevir faragha zuim, a leta A an iti. Namba 2 ves, an mɨgɨrɨgɨar otevir faragha zuim, a leta B an iti. Egha ighiar kam kamaghɨra ghua ves 21ɨn oto. Ighiar kamɨn aven ves, 8 ko 9 aning ighiar kamɨn aven itir nɨghnɨzir ekiamɨn gun mɨgei, kamaghɨn amizɨ leta I vezɨn kamning vɨrara aningɨn iti, egha gavgavim nɨghnɨzir ekiar ighiar 145ɨn itim ganɨdi. Hibrun akamɨn arazir kam kaghɨra itir puvatɨ, me uaghan arazir kamra gɨn ghua akɨnafarir kaba uaghan a da osiri. Kar Azir Akam 1-5 ko Onger Akabar Akɨnafarim sapta 9, ko 10, ko 34, ko 37, ko 111, ko 112, ko 119, ko Aghuzir Akabar Akɨnafarim sapta 31.
Ighiar kam, Devit an osiri.
1 Atrivim, nɨ nan God, kɨ nɨn ziar ekiam fam.
Kɨ nɨn ziar ekiam pɨrafɨ mangɨvɨra ikiam.
 
2 Bar guizbangɨra, dughiaba vaghvagh bar, kɨ zurara nɨ mɨnamam.
Egh kɨ zurazurara nɨn ziam pɨrafɨ mamaghɨra ikiam.
 
3 Dughiaba bar, Ikiavɨra Itir God bar ziar ekiam iti, e an ziar ekiam fɨ mamaghɨra ikiam.
E an gavgavim gɨfoghsɨ damuva avegham.
En nɨghnɨziba otefe.
 
4 Ekiam, gumazamizir datɨrɨghɨn itiba, me gumazamizir gɨn otivamiba bizir nɨ amibar gun me mɨkɨmɨva,
nɨn ziam fam.
Me arazarazir bar ekiar nɨ amiziba,
me dagh eghanam.
 
5 Faraghavɨra Itir Atrivir Ekiam, kɨ nɨn gavgavim ko,
nɨn atrivir araziba ko, ingangarir ekiabagh nɨghnɨgham.
 
6 Guizbangɨra, kɨ nɨn ziar ekiam itir bizibar gun mɨkɨmam.
Gumazamiziba nɨn ingangarir gavgavir ekiar nɨ amizibagh egharavɨra ikia,
 
7 ghua nɨn arazir aghuim ko, nɨn apangkuvir arazim, geghara
onger akam bange.
 
8 Dɨboboniba 14:18; Onger Akaba 103:8Ikiavɨra Itir God bar en kuarkuva e gifueghavɨra iti.
A bar en apangkuvigha zuamɨram en atarir puvatɨ.
Kar bar bizir ekiam.
9 Ikiavɨra Itir God gumazamiziba bar men deragha,
bizir a ingariziba sarama apangkufi.
Bar guizbangɨra.
 
10 Kamaghɨn, Ikiavɨra Itir God, bizir angamɨra itir nɨ ingariziba bar moghɨra nɨn ziam fam.
Eghtɨ nɨ baghavɨra itir gumazamiziba nɨ mɨnamam.
 
11 Me nɨn gavgavimɨn gun mɨkɨm suam,
nɨ biziba bar dagh ativagha dar gari, da bar dera.
Ezɨ nɨn ziam bar pɨn iti.
 
12 Nɨn ingangarir ekiar nɨ amiziba ko,
nɨ biziba bar dagh ativaghamin arazim,
me dar gumazamizibav kɨmtɨ me fogh suam,
nɨ ziar ekiam ko gavgavir ekiam iti.
 
13 Nguazimɨn itir gumazamiziba ko, biziba bar,
nɨ dagh ativagh dar gan mamaghɨra ikiam.
Nɨ bizibagh ativaghamin arazir kam, gɨvaghan kogham.
God uan akar dɨkɨrɨzimɨn gɨn ghua biziba bar dagh ami.
Arazir an amir kaba,
a bar en apangkufi.
 
14 Osɨmtɨziba itir gumazamiziba, Ikiavɨra Itir God men akurvasi.
Gumazamizir, men apaniba me abɨniziba,
Ikiavɨra Itir God ua me fava gavgavim me ganɨdi.
 
15 Pɨn garir angamɨra itir biziba, me nɨrara gari.
Ezɨ mɨtiriaba men azir dughiaba,
nɨ men akurvagha dagheba me ganɨdi.
 
16 Ruarimɨn itir biziba ko, nguibamɨn itir biziba bar,
nɨ dagheba me ganɨdi me apa izɨvagha kuatɨgha iti.
 
17 Sɨn itir arazir aghuibara, Ikiavɨra Itir God, dar gɨrara ghua bizibagh ami.
Arazir an amir kaba,
a bar en apangkufi.
 
18 Te navir averiaba zuegha Ikiavɨra Itir Godɨn dei,
a bar men boroghɨra ikiam.
 
19 Uaghan, gumazamizir an atiatia an apengan itiba,
a bizir me ifongeziba bar da isɨ me danɨngam.
A uaghan men arareba baragh
men akurvagh ua me iniam.
 
20 Vezir kuram, Ikiavɨra Itir God a isɨ gumazamizir arazir kurabagh amiba, me danɨngɨva,
bar me gasɨghasɨgham.
Egh gumazamizir bar a gifongeziba,
a bar me akumakum deragh men ganam.
 
21 Zurazurara, kɨ Ikiavɨra Itir Godɨn ziam fam.
Eghtɨ bizir angamɨra itir a ingariziba,
me an ziam fɨ ikɨ mamaghɨra ikiam.

*^ Arazir Israelia gɨn ghua akaba osirir maba, da mong ighara. Hibrun akamɨn me 22plan letabar uan akaba osiri. Egha dughiar maba, me osirir akaba 22plan akuabar da bɨsi. Ezɨ dar akuar kaba, vaghvagha dar akar faragha zuibar faragha zuir letaba, letan igharazim iti. Me ikɨzir igharazibar akar, Hibrun akamɨn daghizir dughiamɨn, me Hibrun akamɨn arazir kamɨn gɨn ghua dagh izir puvatɨ. E fo, Aruamɨn akamɨn mɨgɨrɨgɨaba 21plan letaba iti. An letabar dɨbobonim mong Hibrun letabar dɨbobonimɨn mɨn ghu. Ezɨ kamaghɨn Aruamu Baibelɨn Onger Akabar Akɨnafarim sapta 145, e Hibru akamɨn arazir kamɨn gɨn ghua, a gɨra. Eghtɨ nɨ gan fogham, a manmaghɨn mangam. Nɨ ighiar kamɨn gantɨ 21plan letaba ikiam, vezɨn faragha zuim, an mɨgɨrɨgɨar otevir faragha zuim, a leta A an iti. Namba 2 ves, an mɨgɨrɨgɨar otevir faragha zuim, a leta B an iti. Egha ighiar kam kamaghɨra ghua ves 21ɨn oto. Ighiar kamɨn aven ves, 8 ko 9 aning ighiar kamɨn aven itir nɨghnɨzir ekiamɨn gun mɨgei, kamaghɨn amizɨ leta I vezɨn kamning vɨrara aningɨn iti, egha gavgavim nɨghnɨzir ekiar ighiar 145ɨn itim ganɨdi. Hibrun akamɨn arazir kam kaghɨra itir puvatɨ, me uaghan arazir kamra gɨn ghua akɨnafarir kaba uaghan a da osiri. Kar Azir Akam 1-5 ko Onger Akabar Akɨnafarim sapta 9, ko 10, ko 34, ko 37, ko 111, ko 112, ko 119, ko Aghuzir Akabar Akɨnafarim sapta 31.

145:8: Dɨboboniba 14:18; Onger Akaba 103:8

© 2020 PBT