7
7:1-8 Isrel-Yambu Wan Andret Poti-Po Tausen Pulu Yili-ni Eninga Mai-Ombelena Makó Turum Temanele
1 Akili kanupu kene penga alsupu kanurundu kene ma-pundu angerekanga angkella angereka angiliiku, mana popuremi tolemú angere ‘Male kene numú-kusale kene unjima kene akumanga popuremi naa tupili.’ niku ambolku angiliiring. 2 Kanu-kene alsupu angkella te kanurundu, yu ena mundi olemúkundu Kona Molupa Mindi Puli Pulu Yili-ni yunga yambuma makó tomba mele yunga bi molemále memba urum. Angkella kanili-ni angkella angere ‘Male kene numú-kusale kene teku kis-sangi!’ nimba tondulale sirim angkellamandu tondulu nangale topa kene nimba mele: 3 “Ma kanili kepe numú-kusale kepe unjima kepe ui méle te teku kis naa sangi! Ui oliunga Pulu Yili-nga kendemande-yambu molemelemanga mai-ombelena oliu andupu ⸤‘Enini Pulu Yili-nga yambuma kanangi.’ nimbu⸥ makó tamili. ⸤Penga kolea teku kis-sangi!⸥” nirim.
4 Kanu-kene yambu makó turingmanga kambuele piliirindu. ⸤Anda-kolepa yi⸥ Isrele-ni kalupa liirim yambu-talape rurepunga pali wan-andret poti-po tausen makó turing.
5 Juda-ni kalupa liirim yambu-talapeliinga tuwallup tausen makó toku,
Rupen-ni kalupa liirim yambu-talapeliinga tuwallup tausen makó toku,
Get-ni kalupa liirim yambu-talapeliinga tuwallup tausen makó toku,
6 Asa-ni kalupa liirim yambu-talapeliinga tuwallup tausen makó toku,
Naptallai-ni kalupa liirim yambu-talapeliinga tuwallup tausen makó toku,
Manasa-ni kalupa liirim yambu-talapeliinga tuwallup tausen makó toku,
7 Simion-ni kalupa liirim yambu-talapeliinga tuwallup tausen makó toku,
LLipai-ni kalupa liirim yambu-talapeliinga tuwallup tausen makó toku,
Isaka-ni kalupa liirim yambu-talapeliinga tuwallup tausen makó toku,
8 Sepullan-ni kalupa liirim yambu-talapeliinga tuwallup tausen makó toku,
Josep-ni kalupa liirim yambu-talapeliinga tuwallup tausen makó toku,
Benjamen-ni kalupa liirim yambu-talapeliinga tuwallup tausen makó turing.
⸤Yambu-talape ima Pulu Yili-nga makále liiring yambuma.⸥
7:9-17 Yambu Aima Pulele Wale-Pakuli Kake Tili Suluma Pakuku Pulu Yili-nga Bili Paka Tonjuku Kape Niring Temanele
9 Akili kanupu kene, penga alsupu kanurundu akili i-sipa mele: Yambu aima pulele, yambu te-ni aima kapula kambu naa tomba mele, muluring kanurundu. Yambu akuma enini kolea lupa-lupa yambuma, talape lupa-lupa yambuma, kangi lupa-lupa kululi yambuma, bo-ung lupa-lupa lili yambuma muluring. Yi nuim king poluna yakundu angiliiku, Sipsip-Walále-nga kumbi-kerina angiliiring. Enini wale-pakuli kake tili suluma pakuku kipiyala-gomú ambolku kene, 10 tondulu munduku kene niku mele:
“Oliunga Pulu Yili
yi nuim king poluna molemú yili yu-kene
Sipsip-Walále-kene elsele-ni
oliu teku liiringlieliinga
mindili naa nombu molupu konjulimulu.”
niring.
11 Yi nuim king polale kene, yi-nuim tokapu-tilu kene, méle kona mululi angere kene, akuma sukuna molangi angkellama pali angiliiku liiku poku teku kene yi nuim king poluna kumbikundu tamalu peku Pulu Yili kape niku kene 12 niku mele:
“Aima sika aku tirim.
Kape nili ulele kene,
tondulu talang puli ulele kene,
piliipa kungnjuli pelemú ulele kene,
‘Angke’ nili ulele kene,
bili aima olandupa puli ulele kene,
yu mélema pali nokumba tondulale kene,
yu aima tondulu olandupa pelemú ulele kene,
ulu akuma pali yu-kene mindi
kamu pepa mindi pupili.
Aima sika aku-sipa tipili.”
niring.
7:13-17 Yambu Kanumanga Mindili Nuring Uluma Pora Nirim Temanele (7:9-17 pali kanui)
13 Kanu-kene yi-nuim tokapu-tilu kanumanga te-ni na walsipa kene nimba mele: “Yambu wale-pakuli kake tili sulu pakokumele ima nameléye? Kolea tena molku kene uringiye?” nirim.
14 Na-ni pundu topu yundu nimbu mele: “Nanga auliele, na naa piliiker. Nu piliikunu.” nirindu.
Yu-ni nimba mele: “Yambu ima eninga ele-túma-ni mindili siku buni pulele siring enamanga mindili aima auli-teku nuring yambuma. Enini eninga wale-pakuli suluma Sipsip-Walále-nga memale-ni lumaye turing-na kake tekem. 15 Akiliinga,
Enini Pulu Yili-nga yi nuim king polu
kumbikundu angiliiku,
yunga lku-sulumina aima kake tílina
sumbulsuli tanguli kongun tinjiring.
Yi nuim king poluna molemú yili
enini-kene tapú-topa molupa enini nokumba.
16 Penga-penga kepe enini alsuku
engle-ni naa kolku
no waka naa kolku,
ena-ni naa nomba,
tepi mola méle te-ni
eninga kangiele naa nupili mulungí.
17 Sipsip-Walále
yi nuim king poluna suku-singina molemále
yu-ni ‘enini nanga sipsipma’ nimba
enini tápu tembaliinga
enini aku-siku kapula molku kunjingí.
‘Enini no nangi.’ nimba
kona molupa mindi puli no pikilimúmanga
memba pumba.
Pulu Yili-ni ‘Enini alsuku kola naa teangi.’ nimba
kolama pali kulu tonjumba.”
nirim.