8
Iesu Yaka Tau Vi‑nomu Ananina Pai Nau‑yehata
1 Yau vona habuhabuna a pai mini kadu iuna taina. Tuta ataina wayahina yaka tau vi‑nomu ananina avaha ivane wahuma, ka manuena Yaubada Ahihinata ya pai manuena ahihi‑vainena ateina, ka mamaei. 2 Kadu tauna vi‑tau paisewa Yaubada ya manua‑hoina ahihinata wahuma wayahina. Tomotau eha manuana ita‑yone, kate Kauvea, tauna yonei.
3 Ka tanopia tau vi‑nomu habuhabui yai paisewa am‑venena‑kavovo kadu vi‑nomu vahitau Yaubada ivenevenei. Akaka yaka tau vi‑nomuna vovouna nau‑wawani tauna kadu vi‑nomu Yaubada venei. 4 Unuani. Aituhu tauna tanopia mamaei, eha ana pata tauna vi‑tau vi‑nomu. Iuna Mosese ya veimea avaha tau vi‑nomu awaehei, vivane Levi ya tupua‑nenenehi, ka taui avaha imamaei kadu ipaipaisewa. 5 Ka tau vi‑nomu tanopia manua tapanono nihenina ipaipaisewa, kate tomotau manua tapanonona wahuma iaito‑vi‑tamani vivane anuana deina. Manua tapanono wahuma vivane manua tapanono‑hoina. Unuani, tutana Yaubada Mosese veimeyei ine tapanono tanopia na‑nau‑vevewanei, ivona,
“Enua‑vi‑avini dewa aitamoata aitamoata
ana dune eyonei avaha oya aviwavenem deina.
Ka dewa habuhabuna edewa‑vꞌ‑iunei.”✡Kol 2:17; Ebe 9:23; NiT 25:40.
6 Ka tuta ataina wayahina Yaubada avaha Iesu tauna ya paisewa venei. Ka tauna ya paisewa tau vi‑nomuia tanopia yai paisewa vane‑tawanei. Ka kadu aitamoata deina, tauna awaeha vovouna veneveneka ya paisewa Yaubada wayahina, ka awaehana awaeha tutuaina vane‑tawanei. Iuna Yaubada tauna ya vona‑dabadaba itoka ya tomotau veneka, ka vona‑dabadabana dewa ahihi‑vainena wayahina.✡Ebe 7:22.
7 Aituhu awaeha tutuaina ahiahina ana noe, akanai, eha aitam iuna Yaubada awaeha vovouna na‑vevewane, a? 8 Kate tuta nonova wayahina Yaubada tauna ya tomotau vona‑opuopuei, wayahina ivona,
“ ‘Apaina, tuta tepakaia wayahina,
awaeha vovouna avevewanei me Isiraeli wayahi
kadu me Iuda wayahi.’✡Ier 31:31-34.
9 Ka Kauvea kadu ivona, ‘Ka awaehana vovouna
eha awaeha tutuaina aboui
yai tupua‑nenenehi wayahi deina.
Tuta nonova wayahina aeta‑naonaoi
papani Egipita wayahina ini‑tawanei,
kate tutana ineine, taui eha moviu ita‑vi‑ateteye,
kadu awaehana aboui wayahi ivihahaiei.
Wayahina tomotaui avihahaiei.’
10 Ka Kauvea kadu ivona,
‘Ka apaina awaeha vovouna
me Isiraeli wayahi aboui deina.
Yau veimea nuai nihenina aboui,
kadu nuai nihenina aginumi imamaei.
Ka yauke tomotaui yai Yaubada,
kadu taui vivane natunatu.
11 Ka tuta‑nana wayahina
habuhabui inꞌ‑anamaneu deinake.
Wayahina, eha nau‑wawani
yaiai iviwavene, inꞌ‑anamaneu,
kadu eha nau‑wawani vavanei ivonavona,
“Vaneiu, nau‑wawanim
Yaubada enꞌ‑anamanei.”
Iuna auyewana wayahina habuhabui
inꞌ‑anamaneu.
Taui ai wava anani,
ka kadu taui ai wava kikitui.
12 Ka tuta tepakaia wayahina
yauke yai dewa goyogoyoi
anua‑tavuni,
ka eha kadu aitam tuta wayahina
anuani.’ ”
13 Yaubada awaehana vi‑wahani Awaeha Vovouna. Wayahina kanamanei, tauna avaha awaeha naona kweui. Wayahina, kana‑vona awaeha naona ihanua kadu tutuaina, ka eha ani‑hoina na‑maiova.