18
Meagai Babiloni Yana Peu
1 Ka kadu aitam anelose adueyei wahuma opupuei. Tauna ya bagibagi ananina, ka kadu tauna ana dune a maheta wayahina tanopi habuhabuna tunu‑mahetei. 2 Ka movina ananina vi‑hone, ivona,
“Ipeu! Ika, Babiloni Ani‑vainena avaha ipeu! Ataina meagai‑nana avaha vi‑pai maꞌ Satana yanꞌ anelose wayahi, ka vi‑pai maꞌ nua goyogoyoi tunina tunina wayahi, ka kadu vi‑pai maꞌ manua yaveyaveha gawagawami wayahi, ka Yaubada manua‑naia habuhabui nau‑nikonikoiei. ✡SiV 14:8; Isa 13:21; 34:11-14; Ier 50:39. 3 Iuna meagai Babiloni yai kenene wainaV deina, ka papani habuhabuna tanopi hetana wainaV tanoi inimnim, ivi‑kwavakwava. Tanopi ana kiniV Babiloni wayahia ikenekenene, ka tau aimwane habuhabui tanopia ivi‑tau kaikaiwabo, iuna Babiloni yai nuanua ananina kaikaiwabo yai gugua ivaniahei, kadu hetana ibou vi‑tupanei.”
4 Ka kadu aitam movi wahuma wayahina omo, anononi, ivona,
“Itomi yau tomotau, meagai‑nana uni‑tawanei! Eha yau nuanua Babiloni yai dewa goyona uvꞌ‑iune, iuna aituhu aviyaivia dewaia idedewei, apaina kadu taui dewa‑yaiyai dewaia wayahi ivaniahei aitamoata. ✡Isa 48:20; Ier 50:8; 51:6, 45; 2Ko 6:17. 5 Vona ahiahina, Babiloni yai dewaia goyo ai yau ani‑vainena, ka gwau‑nana avaha ivane wahuma deina. Wayahina, Yaubada Babiloni yai dewaia goyona dudueyei, e ai dewa‑yaiyai venevenei. ✡Nao 18:20-21; Ier 51:9. 6 Aviani vavine‑nana idedewei, akanai ai nau‑pata deina. Ika, avi dewa goyona idewei, akanai vavine‑nana ai nau‑pata wayahi vivane dewa‑yaiyai ainua! Yauke Babiloni ai vei anꞌ‑epei, e vei‑nana nihenina ai dewa‑yaiyai avinevinei, avo‑vi‑aiaia, avenei, ina‑nimi. ✡Sam 137:8; Ier 50:15, 29; 2Te 1:6. 7 Tuta nonova wayahina a itoava tuta ataina wayahina Babiloni yai nuanua didigai kadu gugua kaikaiwaboi, ka ainua igwaugwaui. Wayahina, ataina viha kadu pai vi‑mohai avenei ai nau‑pata. Akanai deina. Vavine‑nana nuai nihenina ivona‑vanevane ka inuanua, ‘Yauke kwiniV aitam amanuena ka aveimeyei. Ama wava ananina, wayahina adewa‑haiawa. Yauke eha wadawadae deina, iuna eha aitam aviani wayahina ana pata avi‑mohai.’ ✡Isa 47:7-9. 8 Yai vona‑vanevane tanoi anononi. Wayahina, auyewa aitamoata nihenina ai dewa‑yaiyai ava‑tawanei, e vavine‑nana ivaniahei, vivane aniga, ka vi‑mohai, ka kadu am navovo. Ika, ai ananata ananai, iuna Kauvea Yaubada nau‑yanahi, ka tauna ai dewa‑yaiyai veimeyei, ka tauna vivane bagibagi‑vainena. ✡SiV 17:16.
9 Nonova kiniV tanopia imamaei vavine‑nana nui ikenekenene, ka Babiloni yai gugua kaikaiwaboi ivo‑patai. Ka avaha bawa‑nana meagai‑nana wayahina vanevane idudueyei, e ivi‑putu itoutou ka ivi‑mohai wayahi. ✡Ese 26:17; 27:30-35. 10 Ka kini‑naiaV Babiloni ai viha wayahina imatamatauta ananina. Wayahina, meagai‑nana wayahina bana mamanaina imimini, imatamatauta, itoutou, ka ivonavona,
‘Aioi! Aioi! O meagai ani‑vainemi,
O Babiloni, meagai bagibagimi!
Babau aitamoata ana heta nihenina
wamike ami dewa‑yaiyai uvaniaha‑kwayavoni!’
11 Ka kadu tau aimwane tanopia imamaei itoutou ka ivi‑mohai Babiloni wayahi, iuna tuta nonova a itoava tuta ataina wayahina, tomotau yai gugua kaikaiwaboi tunina tunina ivi‑maiei, kate ataina eha. Ka taui yai gugua vivane ✡Ese 27:36. 12 goulaV, ka silivaV, ka hanu patai ani‑vainena, ka yano, ka kwama lineniV, ka tau kaikaiwabo ai kwama yabebenina kadu yabebenina tupwana nigenigena, ka kwama mumuyewina, ka ai tunina tunina patai ananina, ka gugua tunina tunina tau ai‑tai inau‑vevewanei vahitau tonai wayahia kadu taui inau‑vevewanei ai patai anani wayahia, ka bironeseV, ka kainumu, ka hanu toyoina, ✡Ese 27:12-13, 22. 13 ka ai wagana ana wava kinamoniV, ka naia, ka pai mau dibidibina ana wava muroV, ka pai mau ahiahina ana wava libanosiV, ka wainaV, ka oliveV wetona, ka palaua ahiahina, ka witiV, ka bulumakauV, ka sipiV, ka osiV, ka pai vi‑ata taitaina, ka tau paisewa‑kavokavovo, kadu tomotaui ivi‑nomui. Guguaia habuhabui tanoi kadu hetaia iaimwanei. 14 Wayahina, tau aimwane‑naia Babiloni wayahi ivonavona,
‘Ua‑naia unuanua ananina wayahi avaha imaiova,
kadu yami gugua kaikaiwaboi
ka ami dadi habuhabui avaha imaiova.
Ka eha kadu aitam tuta tepakaia wayahina
uvaniahe‑havine.’
15 Ka tau aimwane‑naia guguaia habuhabui tanoi iaimwanei, ka taui kadu yai gugua kaikaiwaboi ivaniahei yai paisewana wayahina. Ka kadu taui Babiloni ai viha wayahina imatamatauta ananina. Wayahina, bana mamanaina meagai‑nana wayahina imimini ka imatamatauta, itoutou, ivi‑mohai, ivivi‑hone, ka ivonavona, ✡Ese 27:31, 36.
16 ‘Aioi! Aioi! O meagai ani‑vainemi!
Nonova ami kwama kwama lineniV,
kwama yabebenina ka tupwana nigenigena,
kadu kwama yabebenina.
Kadu ami dadi ivo‑vi‑namanamani
goulaV wayahina,
kadu hanu patai ananina wayahia,
ka yano wayahia! ✡SiV 17:4.
17 Ka babau aitamoata ana heta nihenina
yami gugua kaikaiwaboi habuhabui
ai vita‑vovona ivaniahei!’
Ka wae habuhabui ai tau weyaisi, ka wae ai tau vi‑ata habuhabui, ka wae ai tau paisewa habuhabui, ka taui habuhabui hawana wayahina ai maꞌ ivaniahei, taui habuhabui kadu bana mamanaina meagai‑nana wayahina imimini. ✡Isa 23:14; Ese 27:27-29. 18 Ka taui avaha bawa‑nana meagai‑nana anꞌ ananata wayahina idudueyei, akanai ivivi‑hone, ivonavona,
‘Tuta nonova wayahina a itoava tuta ataina wayahina,
avi meagai meagai ani‑vainena taina deina?
Eha aitam!’ ✡Ese 27:32.
19 Wayahina, taui inua‑vita, ka apunava ununuia ioneonei, ka itoutou, ka ivi‑mohai, ivivi‑hone, ivonavona,
‘Aioi! Aioi, O meagai ani‑vainemi!
Itoai habuhabuai yama waꞌ wayahia
avi‑tau kaikaiwabo.
Iuna wamike yami gugua kaikaiwaboi wayahi!
Kate babau aitamoata ana heta nihenina
meagaina ipeu iopu,
igoyo ananina!’
20 Kate itomi tau maꞌ wahuma habuhabumi
nau‑wawanimi udewa‑haiawa
Babiloni ai vita‑vovona wayahina!
Ika, itomi tau ekalesia,
ka itomi tau hae ananimi,
ka itomi tau apa‑taputapu
nau‑wawanimi udewa‑haiawa!
Iuna Yaubada avaha Babiloni nau‑yanahi,
kadu dewa‑yaiyaiei yai dewa goyona
itomi wayahimi.” ✡Isa 44:23; V.V 32:43; Ier 51:48.
21 Ka dewaia iakwa, ka aitam anelose bagibagina hanu ani‑vainena si‑nai. Ka hanu‑nana ya nata anana deina, ka tauna hanu‑nana haponei iopu hawana, e ivona,
“Meagai‑nana ani‑vainena Babiloni yana peu
vivane dewa manimaninina deina!
Vona ahiahina, Yaubada meagai‑nana
na‑haponei na‑vita‑vovoni,
ka eha kadu aitam tuta tepakaia wayahina
ana pata kavaniahe. ✡Ier 51:63-64; Ese 26:21.
22 Nonova nihenimia ana pata
dewa habuhabuna kavaniahei,
vivane tomotau yai pai viam‑toutou
tunina tunina inavinavia kanononi,
ka tomotau habuhabui yai pai viam‑toutou
tunina tunina bwegigi deina
ivaivaini imamaei.
Ka nonova tau paisewa tunina tunina
nihenimia imamaei ipaipaisewa.
Ka tau paisewa tupwai witiV iautei
vi‑palaua imamaei, ka ana pata
taui yai paisewa a nonona kanononi.
Kate apaina eha ana pata
dewaia habuhabui tanoi
nihenimia kavaniahe. ✡Isa 24:8; Ese 26:13.
23 Ka nonova lampaV ai maheta
mahemaheta nihenimia.
Ka tau tavine onotona ka tau tavine vavinena
yai dewa‑haiawa a nonona
kanononi nihenimia.
Kate apaina eha ana pata
dewaia habuhabui tanoi kavaniahe nihenimia.
Ka nonova tau aimwane ai wava anani tanopia
imamaei nihenimia ipaipaisewa.
Ka wamike yami banauma wayahina
tau maꞌ papani habuhabui unonoi,
ueta‑naoi ini‑panipani. ✡Ier 7:34; 16:9; 25:10.
24 Ka tuta nonova wayahina
a itoava tuta ataina wayahina,
tau vi‑meagai meagai‑nana nihenina
Yaubada ya tomotau
inau‑vi‑anigi‑neiei,
vivane ya tau apa‑taputapu
kadu ya tau ekalesia.
Ka kadu aituhu aviyaivia ianiga
iuna mani tomotau inau‑vi‑anigi‑neiei,
akanai dayahi meagai‑nana
nihenina mamaei.” ✡Ier 51:49; SiV 17:6.
✡18:2: SiV 14:8; Isa 13:21; 34:11-14; Ier 50:39.
✡18:4: Isa 48:20; Ier 50:8; 51:6, 45; 2Ko 6:17.
✡18:5: Nao 18:20-21; Ier 51:9.
✡18:6: Sam 137:8; Ier 50:15, 29; 2Te 1:6.
✡18:7: Isa 47:7-9.
✡18:9: Ese 26:17; 27:30-35.
✡18:11: Ese 27:36.
✡18:12: Ese 27:12-13, 22.
✡18:15: Ese 27:31, 36.
✡18:17: Isa 23:14; Ese 27:27-29.
✡18:18: Ese 27:32.
✡18:20: Isa 44:23; V.V 32:43; Ier 51:48.
✡18:21: Ier 51:63-64; Ese 26:21.
✡18:22: Isa 24:8; Ese 26:13.
✡18:23: Ier 7:34; 16:9; 25:10.