16
Timothy, Paul ba Silas yabata
Paul i nae ku Derbe ba yebo ku Lystra ba namai bigeruwana biyina yarakina kesana, kana waba Timothy i mamana, kona sinana wai Jew ba kona bigeruwana biyina, saba tamana wai Greek sebare. Timothy bigeruwana biyisi Lystra ba Iconium kamonai si kaobigegaeni. Paul ana waina ita urabai wai sinina i bonai kairavina Jew biyisi kona kupurinai si mamana, ba si kuira roboi kata tamana wai Greek sebare. Damanina ba meyaga nunusi yai si nenae wai, bigeruwana biyisi si wonawona berisi kata apostle ba warawaraetesi, Jerusalem kamonai wara si porai kata kega sinisi sita bona. Kona kairavina ekaleisiya asi bigeruwana si bo bimaragasi, ba kao patepatena asi koroto i rakarakata.
Paul kana Yore
Paul turaturana Silas ba Timothy si wagawaga Phrygia ba Galatia kupurisi kamosi yai wata si nae, kairavina Kanuma Kaobaisiyena i gesisi kega Asia kamonai wona sita rumamarei. Maranai si botu Mysia ana ku biparaparata, ba asi waina sita riu ku Bithynia saba Iesu kanumina i gesisi. Kona kairavina si vera damana ku Mysia ba si gakira ku Troas. Kona pomnai Paul aba kinakinana i kinani kata, sebare Macedonia kupurinai i msiri ba i bibabai, “Ki garubona ku Macedonia kupurina ba kuni baisikai.” 10 Paul aba kinakinanai i kitai murinai, wai yagiyagina wata ka bobunaga ba ku Macedonia kata nae, ka nosi kata God i yorikai Wara Gairena pipiya kurisi kata rumamarei.
Lydia Iesu i Geruwei
11 Ba Troas yai meyaginai wakai ka geru, ba totorina kai garubona ku Samothrace, ba mara i tom wai ka riu ku Neapolis. 12 Namai ka riu ku Philippi meyagina, Rome biyisi asi meyaga kaikapona wauna kesana, Macedonia kamoniai. Ba namai ka mana mara yoginaikei.
13 Ba Sabath maranai, meyaga ka kasibau taveyei ku okowa parina, namai ka nosi kata pari gawarina kata panani. Ba bibaine si notuwa rupari kairavina, wai kamakira ba kurisi kai sisiya. 14 Ba kesana, nai ibi tainabaenega wai, Thyatira wasike kana waba Lydia, kona gara bi debagirugirumina i bigimona, ba kona wasikena wai God i bopepetei. Bada nuwanuwana ibo taveyei kata Paul awaika i wonewonei wai ibo sekwai. 15 Kata kona ba pipiya ana yove yai si babataito murinai, i baba wai kata nae ana ku yove. I wona, “Komi abisiri yai ko nosinosi yauku bisuwona Iesu Keriso a bigeruwei wai, ko botu au ku yove ba yabata tana mana.” Ba i kaotupetupena yepo kai damanina wai ka nae.
Paul ba Silas Patuma Yovenai
16 Kao kesana ka gaigakira pari ku gawarina ba aba saibisabira wasike urumina kanuma goyona karinai i mamana wai ka panani. Kona wai pipiya naosi yai awaika kurisi ina tupuwa wai i wonewonisi, ba mane kaikapona ana babada kairavisi i wosewosei. 17 Paul ba yakai ereonowakai i kibikibikai, ba i parapara, “Nikosi sebasebare kona God Kaidamo Sakina ana saibisaibirisi, ba sibotu keta te beyita mekabage tana yawasa.” 18 Kao pesarisi nikasike i wose yepo Paul sinina i kai, wai i rusinimura ba kanuma goyona i wonei, “Iesu Keriso kana wabai a kaotunetune yim ke kasibau taveyei!” Ba mara kesana kanuma goyona wasikena i kasibau taveyei.
19 Maranai wasikena ana babada si kitai kata asi mariya ketana Paul ba Silas si reso, wai si botawatawanisi ba si taina seserisi si kasibau ku bigimona gawarina babada kurisi. 20 Si botuvisi bibuibuiya biyisi kurisi ba si wona, “Nikosi sebasebare wai Jew biyisi ba meyaga te bi gamogamoi. 21 Kosi dudura te bibeyebeyena wai kota Rome biyita ata kairuwana kega e bi damaninei.”
22 Koroto si bokauta ba si kokona Paul ba Silas kurisi, ba bibuibuiya biyisi si wonisi kasi gara si taina sikeyana ba whip yai si ravisi. 23 Ba si ravi sakiyisi murinai, ku patuma yovena kamona si garu ruvisi. Ba patuma yovena kana koyakoyaga si kaotunei kata ita kinani kega sita vera. 24 Kona kairavina patuma yovena, kamonai damana i terisi ba kaekaesi keyama bitasi yai i kasi kikita.
25 Ba pom basunai Paul ba Silas si raupari ba si tabotabora God kurina, ba patupatumisi mutusi si bitainabainegisi. 26 Ba marakesana gusugusu kaikapo sakiyina, patuma yovena tanona tupana i gusui. Kata matamketasi ereonowasi si tamotatara, ba ereonowasi kasi chain si peku. 27 Patuma yovena kana koyakoyaga i sikwana ba matamketa ereonowasi tamotatarisi i kinana, wai ana seri i yauni ba ita gwaribunu meyei basuna i nosi bage patupatumisi sita vera. 28 Saba Paul kurina i parara, “Kega kuna kasibunu meyim! Yakai ereonowakai wai nina!”
29 Patuma yovena kana koyakoyaga yasegana kairavina i yoereyana, ba ere kirokirorona i vera i riu Paul ba Silas naosi yai i peku. 30 Ba i uraba kasibauwisi ba i toirubaisi. “Babada, awaika ana wosei wai ana yawasa?”
31 Ba si kaobeyei, “Bada Iesu ki geruwei, wai kom ba am rakaraka yabata kona yawasa.” 32 Damanina Bada warana si sisiyei, kona ba ana rakaraka ereonowasi kurisi. 33 Kona pomnai patuma yovena kana koyakoyaga i yaunisi ba kasi mauwa i bosusuwana, ba kona ba ana rakaraka ereonowasi si babataito. 34 Ba i urabaisi si nae ana ku yove ba kam naosi yai i terei; ba kona wai nuwagaire i bonuwei basuna kona God i geruwei, kona ba ana rakaraka ereonowasi yabata.
35 Mara i tom wai bibuibuiya biyisi, abiabiyisi asi bada si poraisi patuma yovena kana koyakoyaga kurina ba si wonei, “Nikosi sebasebare ko boterisi sina nae.”
36 Ba patuma yovena kana koyakoyaga Paul i wonei, “Bibuibuiya biyisi si wona kom ba Silas si botaveyimi kona nae, nuwanubai ko nae.”
37 Saba Paul i kaobeyisi, “Yakai wai Rome biyikai ba ama goyona awaika, wai kega si buibuiyikai ba debai si ravikai ba ku patuma yovena si garu ruvikai. Saba asi waina karaku bibune yai sini poraikai. Kega rubarubana! Kosi yebo sina botu sini naovikai wai kana kasibau.”
38 Maranai abiabiyisi asi bada bibuibuiya biyisi, si wonisi kata Paul ba Silas wai Rome biyisi, wai si nagara. 39 Kata si botu ku patuma yovena ba si babaisi kata sita notataveyisi. Ba si urabasi si kasibau ba si babaisi kata meyaga sita kasibau taveyei. 40 Ba Paul ba Silas patuma yovena si kasibau taveyei ba si nae Lydia ana ku yove. Namai bigeruwana biyisi si pananisi ba si kaobinuwatoraisi. Ba meyagina si sumarei.