11
Iesu i Riuriu ku Jerusalem
(Mat 21:1-11; Luk 19:28-40; Jhn 12:12-15)
1 Ba si verakasibau ku Jerusalem maranai, si botu ku Bethphage ba Bethany meyagisi ba Olive koyanai Iesu ana nonorayauna ruwamo i poraisi. 2 Ba i wona, “Ko nae nao ku meyaga naoti yai koni bisukaibau maranai donkey sebare yogiyogina kega kesana kotoi i geru rubai nai si kausi wai kona panani. Ko tombauni ba kona botuwei nikei. 3 Ba kotoi wata ina toirubami ina wona, ‘Awaika kairavina nikona ko wosewosei?’ Ko wonei, ‘Kata Bada e waiwainei, mara yoginaikei. Ba yebo yagiyagina kani porai ina veramaga.’ ”
4 Damanina ba si nae wai donkey ketai yove matam ketanai si kausi si kitai wai si tombauni ba, 5 pipiya mutusi nai si bimsiri wai si toirubaisi si wona, “Awaika kairavina donkey ko tombauni?” 6 Saba kosi Iesu i wonisi wai nanakasike si kaobeyisi. Damanina ba si boterisi si nae. 7 Maranai donkey si botuwei Iesu kurina wai, kasi tarasowo si garu gegeyana ku tepana, ba Iesu i geru.
8 Ba pipiya pesarisi kasi tarasowo ketai si yabara, ba mutusi wai keyama ragaragasi ere rurausi dipai si tara wai si yabara. 9 Ba iyabosi si nao si nenae ba murinai si kibikibi wai si paraparara,
“Hosana Bigairenina!
Kona Bada kana wabai e botubotu.*Psalms 118:25,26
10 Bibigairenina,
kona tamata David ana basileiya e botubotu,
Hosana kau kaidamona.”
11 Maranai Iesu i nae ku Jerusalem wai, i riu God ana ku yove taparoro. Ba sawara ereonowasi i kita nanaga, saba kao i kakaba kairavina ana nonorayauna yabata si kasibau si nae ku Bethany.
Iesu Koveya Keyamina i Kaonawai
(Mat 21:18-19)
12 Mara i tom wai Iesu ana nonorayauna yabata Bethany si kasibau taveyei, si veraveramaga ku Jerusalem wai Iesu soya i rabobo. 13 Ba koveya rurauna rabarabai i kinani wai i nae ku gwabina saba rurauna wata i kinana kairavina kega koveya kana mara ba ita uwa. 14 Damanina ba Iesu kurina i wona, “Kom kega kesana kotoi uwam ina kam meyei.” Kata ana nonorayauna si nonori.
Isu God ana Yove Kamonai
15 Maranai si verakasibau ku Jerusalem wai, Iesu i riu God ana ku yove taparoro ba i dagui iyabosi namai si bigimogimona wai i rukwabina si kasibau, ba pipiya mane si bibobereyana God ana yove taparoro suwara kairavina.*Wai asi bobitaura ba iyabosi buruku, si bigimona puyobunuwa kairavina wai asi pesapesa i kum tabitabirana. 16 Ba kega kesana kotoi i boterei kata bigimogimona sawarisi ita kabara ita riu God ana ku yove taparoro kamona. 17 Ba yebo i beyebeyisi wai i wona, “Matapa si kirumi kata,
‘Au yove sina yorei
dam ereonowasi asi pari yovena.’*Isaiah 56:7
Saba komi ko wosei ‘bage pisipisikarisi asi aba kobakoba.’ ”
18 Priest kaikaiwabosi ba kairuwana bibeyebeyena biyisi nikona si nonori saba, kosi si nagarei basuna pipiya ereonowasi ana giu si nonori wai si wareyei.
19 Ba i rabisi wai, Iesu ana nonorayauna yabata meyaga kaikapona si kasibau taveyei.
Koveya Keyamina i Bosivisivi
20 Didibarai, si yewo si nenae wai, koveya keyamina si kinani, warowaronai ba i gae ku damona i bosivisiviyei. 21 Peter i notapanani wai Iesu kurina i wona, “Bibeyebeyena biyim ke kinani nao koveya ku kaonawai wai i rabobo.”
22 Saba Iesu i kaobeyei, God ki tumaganei. 23 A bisuwonim kotoi wata niko koya kurina ina wona, “Ke nae ikesim ku enaga ki garu kirena meyim.” Ba nuwanuwanai kega ina nota kabakaba saba ini geruwana kata awaika i wonei wai, wosena ina wosei ba kairavina ina tupuwa.*Matthew 17:20; 1 Corinthians 13:2 24 Kona kairavina a wonimi, awaika wata kairavisi kuna rupari ba kuni baba wai, ki geruwana kata matapa ku yauna, ba ini karimi yai. 25 Ba ku msiri ke raupari maranai kotoi wata ana goyona ke botawani wai ke notataveyei kata Tamam sapamai am piragagoyosi yebo ina notataveyisi.*Matthew 6:14,15 26 †Niko kewa kiruma waubosi kamosi yai kega e mamana. [Ba kom pipiya asi piragagoyosi kega kuna notataveyisi wai, Tamam sapamai am piragagoyosi kega ina notataveyisi.]
Iesu ana Bibadana Kairavina si Toirubai
27 Kosi si verakasibau mena ku Jerusalem, ba Iesu God ana ku yove taparoro kamonai i yewoyewo wai priest kaikaiwabosi ba kairuwana bibeyebeyena biyisi, ba Jew babadisi si botu kurina ba, 28 si toirubai, “Memei maragata ku yauna wai nikosi sawara ke wosewose, ba kotoi maragata i berim wai nikosi wose ke wosewose?”
29 Iesu i kaobeyisi, “Baitoruba kesana ana berimi, ba kona kaobeyiku wai, ana wonimi. Kata kotoi maragata i beriku wai nikosi wose a wosewose. 30 Ko woniku kata John ana maragata memei i yauni wai i babataito, sapamai kona pipiya karisi yai?”
31 Saba kosi i kesisi si kaoboneyana si wona, “Memei bage tana wona, ‘Sapamai wai.’ Ini toiruba kata, ‘Awaika kairavina kega koi geruwei?’ 32 Ba memei bage tana wona, ‘Pipiya karisi yai wai’…” Pipiya si nagarisi, kairavina ereonowasi si kuiri kata John kona bisuwona peroveta. 33 Kona kairavina Iesu si kaobeyei si wona, “Yakai kega ka kuiri.”
Iesu yebo i wona, “Yauku yabata kega ana wonimi kata memena maragata a yauni wai nikosi wose a wosewose.”