14
Pipiya si Kokona
1 Kona pomnai pipiya ereonowasi gamosi kaikaponai si tou rasarasa. 2 Moses ba Aaron kurisi si gwini, si wona, “I gaire kata Egypt yai kata ma mom, kona niko kupura momna kamonai tata rabobo. 3 Ba awaika kairavina Bada i yaunita ta nenae niko ku kupura ba abiya kamonai sina kasibunuwanita? Ba kaokaowata ba natunatuta sina patumisi. I gaire kata tata veramaga ku Egypt!” 4 Ba kosi wata si kaoboneyana, “Kota bada wauna tana binei ba tana veramaga ku Egypt.”
5 Damanina Moses ba Aaron Israel biyisi ereonowasi si gaenisi wai naosi yai si peku ku tano. 6 Ba Nun natuna Joshua ba Jephunneh natuna Caleb, kosi yabata tano si nanagi wai, ere yapoyisi kasi gara si sika. 7 Ba Israel biyisi ereonowasi kurisi si wona, “Nao tano ka yewo ba ka nanagi wai i gaire saki. 8 Abisiri yai Bada gwabiti yai wai, ini naovita tana riu nao ku kupura tanona gairena ba mariya bonabonana ina berita. 9 Kega Bada kurina koni kawakasekase.*Hebrews 3:16 Ba kega pipiyisi kona nagarisi, rubana tana getawanisi. Kasi abapapara wai kega, ba Bada wai kota gwabiti yai. Kega kona nagarisi.”
10 Saba koroto ereonowasi si wona, kata akimai sita kasibunuisi. Saba Bada ana kadara Tabernacle yai i rerematara Israel biyisi ereonowasi kurisi.
God Moses i wonei, ke veramaga ba pipiya kuni naovisi ku kupura momna, ketanai ku Enaga Taratarana.
Gwini Sarobina
26 Damanina ba Bada Moses ba Aaron kurisi i wonisi, 27 “Meyana nikosi pipiya kaikorotosi, pipiya goyogoyosi, ba kawakasekasesi, kuriku gwini sina boterei! Israel biyisi asi kaogimoto ba gwini a nonori. 28 Ke wonisi kata, ‘A mamana ba awaika si bisisiyei a nonori wai, nanakasike kurimi ana wosei. 29 Ereonowami niko kupura momnai, ko gwinigwini kuriku, ba komi iyabomi pipiya baiyavisi maranai si baiyawimi ba kami bodu 20 ba i gae wai kona rabobo.*Hebrews 3:17 30 A kaobiyoyobanimi namai kota mana saba kega komi kotoi ina riu, Caleb ba Joshua kosi wata sina riu ku kupurina.
31 Natunatumi ko wona sina pisikarisi, wai ana yaunisi ana riu kupura koi sinikikiyei wai nakai, ba namai nuwagaire ai sina mana. 32 Saba komi wai niko kupura momnai kona rabobo. 33 Ba natunatumi wai sheep aba potapota rutainisi, niko kupura momna kamonai sina bubuwa neubuwa bodu 40 rubana ami nota kabakaba kairavina, yepo ereonowami kona rabobo.
34 Kao 40 kupura ko nanagi wai nanakasike saroba ana berimi, bodu kesana wai kao kesana rubana. Koi abiyiku wai au damidami kona yauni. 35 Yauku Bada a wona, bisuwona nikona ana wosei, niko kaikorotona kuriku si kawakasekase wai, ereonowasi niko kupura momnai sina kakaba. Nina sina rabobo.’ ”