1 Inadegu ei maido, a bibi tasa ei mulimuli ni guale a golugolu vuso mine tamane ei, moni mane ei saboa bibaini, ei tasa moni tomane a bibi na pipigona sabubu. 2 Ei ni matano moni ana vanua na ulagona ma vanua na niitealalena, i asu mapigogoi a malada tamana ei tau. 3 Eitou tamai ilala eitou ino tomane sou selebanini, eitou tomane a vanua na pipigona sabubu mina matamatana nunu ei matetengi a sinokona muadana mina magamaga. 4 Moni na matailala bilesi Salemo i tau, ei peltase Natune ei usinani. A tavine ei maalepose ei, me a bibaini iedo tamai ei malu matano na binea mine Moses, 5 mina oleliualene eitou a vanunua ma tavivine ino matano na binea, me ei ni toe eitou palea natatune Salemo. 6 Seidei amutou natatune Salemo. Maido me Salemo ei peltasesi a Nunu ne Natuna usinani na lilone eitou ma Nunu ei toe eitou tola ane Salemo maido, “Aba, Euma!” 7 Maido me oo ma muina otosi tomane a bibi na pipigona sabubu lou. Salemo ei toe oo palea natune ei. Me mane oo a natune Salemo, de oo no guale a golugolu vuso i doana mine ei.

8 Lisa amutou ma muada oto e Salemo, me amutou tomane a vanua na pipigona sabubu moni mina matamatana golugolu, sou salemo ivu boa. 9 Moni seidei amutou muadasi e Salemo, ue nane puiale eau na vei, Salemo ei muadasi e amutou. Maido me posa matina amutou veteliu lou usino na matamatana matetengina mina magamaga? Sou ma isa oto a sagagalina me sou a golu sabubu moni. Amutou kale namutou palea a vanua na pipigona sabubu mine ei lou, io? 10 Taliuliu amutou damutale a ogomulina binea mina malada buobuo, gamegame, matailala me avalavala. 11 Eau lae, dae a pipigona eau goli le amutou ei ni buale sabubu.

12 Eau tagi sagali e amutou tamtamaigu namutou palea tasa moni tomane eau. Vuna eau asutase a binea me eau palea tasa moni tomane amutou. Me pea na malada iedo amutou ma goli ete a sinusu tasa usinani minau. 13 Amutou muada, munugana ilala eau veipale a malongolongona kubaana usino ne amutou, iede ilala sinobe buo i guale eau. 14 Sinobe minau iodo ei bilii a mavaana buo usino ne amutou. Moni amutou ma lametase ete eau, me amutou ma bale oto a ugu pilu ne eau. Amutou guale eau tomane amutou guale a bineanea tasa mine Salemo, ue tomane amutou guale e Krais Iesu oto. 15 Na malada do amutou mongemonge me mu lilokuba agu, moni a munonge ne amutou iede, seidei ino iva? Eau veipale le amutou, mane amutou mapigogoi namutou osetase a matane amutou na malada do, de namutou osetase me ne mu bilii e eau. 16 Moni posa matina seidei eau palea a butu mine amutou? Vuna eau veipale a inade patotona usino ne amutou, io?

17 Sou a vanua sanii sou ogomuli a binea do, sou toesagali e amutou mu ogomuli a inade mine sou, moni ei ma kubaana oto le amutou. Sou kale ne sou gualelele amutou mainani minau, me sou toe e amutou mu ogomuli sagali e sou. 18 Ei puiale mane amutou pipigo sagali na ogomulina inigogona kubaana. Taliuliu ne mu goli a inigogona do, me na malada eau ma pilu oto e amutou tamai. 19 Amutou natatugu, eau lai a davutina lou tomane a tavine ei maalepose a bibaini mapigogoi a inigogona mine Krais ei ni palea lilone amutou. 20 Maula, eau ma pilu oto e amutou seidei. Mane eau ino pilu e amutou, eau na ade iiti usino ne amutou. Eau lilobuu sele e amutou, me tamai eau ma muada oto na buloi e amutou matina.

21 Amutou a vanunua amutou kale namutou matano moni na binea, mu vei le eau seidei. Nane amutou ma muada oto a golu a binea ei ade i, io? 22 Laulau mine Salemo ei vei maido, Abraham ei isa e natuna bibi lua. Tavine ei pipigo sabubu, ei maalepose tasa, me tavine ei malamala, ei maalepose tasa. 23 Natune tavine ei pipigo sabubu, ei alaposa na vea mina taulaina. Moni natune tavine ei malamala, ei alaposa na adegatunana mine Salemo.

24 Adetinovona ino lilona mapamulina ie. Tavine lua li sulu matailale a magilipiluna lua. Hagar ei matailale a magilipiluna mina loena e Sainai, me natatuna sou palea a vanunua na pipigona sabubu. 25 Hagar ei matailale a loena e Sainai, a loena do ei mina avena buobuo e Arabia, me ei tamai ei matailale e Ierusalem ei ino seidei. Ierusalem ieli ei a tavine na pipigona sabubu pilu e natatune ei. 26 Moni e Ierusalem tasa ei ino oata na langi, ei ugu malamala. Ei e tinane eitou. 27 Laulau mine Salemo ei vei maido,

28 Amutou tamtamaigu, amutou tamai amutou e natatuna mina adegatunana mine Salemo tomane Aisak. 29 Moni bibaini ei alaposa na vea sou a vanunua ma tavivine sou mapalele selebanini, ei toegegeli a bibaini tasa ei alaposa na sagagalina mina Maolona Nunu. Seidei tamai a matana inigogona do ei eili moni. 30 Laulau mine Salemo ei vei matina? Ei vei maido, “Peltaselele a tavine na pipigona sabubu pilu e natuna. Natune tavine na pipigona sabubu ei ni ma mapigogoi ete a gualena a golu doana mine tamana pilu e natune tavine ei malamala.”†Sinokona 21:10 31 De amutou tamtamaigu, eitou e natatune tavine na pipigona sabubu boa, eitou e natatune tavine ei malamala.