21
Yeisuw isap wasigeis navamul teinim teiy
(1,14) Yeisuw ikit kanig waseg, sivay isap inavamul wasigeis; sivtounun mo isap mamagina:
Yevagam katiboul wanawoud yagan Tibeliyas. Yeisuw inekes navamul wadadan yevagam towen. Tasiyas katanok bod nisesus, Saymon Pita, Tomas (mtowen idudouws Papap), Nataniyel (mtowen naven Ken, wawnuwan Galiliy), sisiy Sebidiy nitun, sisiy Yeisuw navamul asteiy.
Saymon Pita mo ilana, “Ban agileloud.”
Tasiyas ilansa, “Simey yak bitaneis.”
Inibwis siwag, ikala̱vis, igilelouds ee... iyam. Ta-kweitan in ikwanes. Makaw-wan. Walalayis Yeisuw iton wakawalaw; tage navamul nag iwtusis. Yeisuw idibakes, ilana, “Tawaw! Tabta amiyin?”
Ilansa, “Nag. Makawan!”
Yeisuw ilana, “Kweitan saw kulaves wamika̱tay, mo bukukwanes in.”
Ilaves wot in, mo ikwanes asiyin; nag bikawes, peinan singay babaw. Ta-ma̱wan bidagis in wanuwan wag.
Yeisuw navamul towen isiwa̱youb waseg, mo idibek Pita, ilana, “Mtowen datoveks.” Saymon Pita sona mwadoyan iwwotet, ikakin mtowen natovek, mo isikam anakweim, inuw wayevagam, igay.
Yeisuw navamul tasiyas wa̱wag ikala̱vis ineis wanakaew, isilbiteilis wot peinan bo ika̱lawt in; nag bikadiveiyov mo ita̱lags. Ineis wanakaew ikines kov son in bo ika̱men, son bled.
10 Yeisuw idibakes, ilana, “In towen nukukwanes, kumeyes mwasanin.” 11 Saymon Pita mo itow in wa̱wag, iyous wot, ibiteil in wanakaew, bo ika̱lawt in kavka̱veks lakatutan sinwanim mwana̱toun. Tage nag ikayboulis wot; bwein-wan.
12 Yeisuw idibakes, ilana, “Kumeis, kukwams.”
Nag kal bikatugan, bilana, “Kavel yak?” Aspwa̱yat bikatiga̱nes. Ikakins gog sitovek towen.
13 Yeisuw im, ikow bled, ivgen isekes; in-vak mo isekes ma̱wan; ikams. 14 (-)
Kumtakavates aleig sip
15 Ikams ikous, Yeisuw mo idibek Saymon Pita, ilana, “Yon natun yak. Tasiyas isiwyoubugs. Tabta ya̱koum singay bukusiwyoubug, ne?”
Pita ilana, “Mounid; guntovek yak, kukwakin asiwyoubum.”
Yeisuw ilana, “Kumtakavates aleig la̱miy.”
16 Sivyuwein Yeisuw idibek Saymon, ilana, “Yon natun yak, tabta bukusiwyoubug, ne?”
Pita ilana, “Mounid; guntovek yak, kukwakin asiwyoubum.”
Yeisuw ilana, “Kumtakavates aleig sip.”
17-18 Sivtounun Yeisuw idibek Saymon, ilana, “Yon natun yak, tabta bukusiwyoubug, ne?”
Pita mo igeg nanon, peinan Yeisuw nilivan sivtounun, ilana, “Tabta kusiwyoubug?”; to ilana, “O guyaw, youd babaw kukwakin; kukwakina asiwyoubum.”
Yeisuw ilana, “Kumtakavates aleig sip. Mounid adibakeim, igaw wagwa̱dim nukusikam amkweim, nukuninoun ampalawen sivinam. Igaw bukutovek namam bukudimwes, soum teitan biyawen amuwat, bivakabanim binaweim palatan nag ivag sivinam.”
19 Yeisuw anilivan towen va̱gan bikamtel ama̱wan Pita bikanig, yakawanan Yowbad silma̱nin. Ikous, mo ilana, “Kwabkunig.”
Yeisuw navamul towen singay isiwa̱youb waseg
20 Pita itouvin ikin Yeisuw navamul teitan ikabwa̱kun waseg, mtowen singay isiwa̱youb waseg, o kamkwam waseg nisineikim kadiyakus wavtakon Yeisuw nikatimwa̱lag, ilana, “Tamwey, kal towen bisilkodeim?” 21 Pita ikin navamul towen, idibek Yeisuw, ilana, “Taw towen, aveiyag bilouvat?”
22 Yeisuw ilana, “Kukin ba̱tam va̱gan mtowen bisesuna ee... mo ba̱yum bam, awoum bigeg nanoum. Misinaka kwabkunig.”
23 Yeisuw nagamag iliganes livan towen, idokes kid taw towen nag bikanig; tage Yeisuw na-ilivan, “Mtowen nag bikanig”; nag. Misinaka ilana, “Kukin ba̱tam va̱gan mtowen bisesuna ee... mo ba̱yum bam.”
24 Yeisuw navamul mtowen nikatimlakeids youd tasiyas, nilel nein wa̱buk; takakins-wan anilivan bo mounid.
25 Wotet babaw Yeisuw niwtel. Kukin teitan bilel nawotet babaw bein wa̱buk, adok ven watinow mo bika̱lawt buk maynsiyas, tage igawa bilelel.