1 Ale e Kraist lubeti etatou taro la kilisi, eia kama veia etato ge gotigu rivu lou ge pou lou te la kilisi ele. Amuto ge magiri vagari, egite umalati ge kisi amutou mai la paia ale egite vuvu la gogo te la lohola! 2 Eau e Pol, eau veia mutou maie: Amuto umala ge pou varumurumu veia egite ge koro la vovo mutou, veia la gauru ale ge vimahuli amutou. Mai amuto ge varumu tali egiteu veia ge igo seselea mai ale egite veia, la pilehole Kraist kati ge suli amutou. 3 Tio me eau veia ge mera taro vagari lou amutou. Mai egite ge koro la vovo mutou, amuto mai ale goiloti lou veia amuto ge pou te la kilisi te la merera tomi tegite ururu. Mai amuto ge hilovi la merera isasa veia ge igoa, tio amuto oilo tomiti ovolale. 4 Eala moli mai amuto ge igo mai ele, veia la merera te ururu ge vimaroka lou amutou veia eia ge vimahuli amutou, amuto mai ale vipou baati lou me Kraist, amuto boruti. 5 Eala moli etato ale te Kraist, etato abiti la vimarokala te La Kalulula, me etato sau tola vagariti la merera tetala ale eia veia ge vimaroka etatou. 6 Ale etato goiloti te Kraist, etato tetalati. Eia kama gabu tikumua veia ale koroti la vovola, ale isa ouka. La golu isa moli eia uru te la gabutatalala tetala: ale etato gabu tikumu la merera tetala, veia te la vulovulo gatou etato ge veipala la gilogo tetala.

7 Ale pala amuto soko la tuluga tamutou soio te Kraist, amuto mata kaseka pasi te la tuluga. Me ale igoie eau hiloa amuto mai ale tutuakiti lou, amuto kati tilimuli tataho la gauru ale sesele. Ere sogi amutou? 8 Eala moli eau rovia la tahalo ale viruru amutou kama La Tahalo Uru ale tola pala muga amutou soio tetala, ouka! 9 La visigolola eia mai ale ubi tatubati amutou tomie! 10 Eala moli etato isa moli te la isale Iesus, me oio vola eau rovia veia amuto ge beu loua te la gauru ale matata, me la tahalo ale viruru amutou ele, La Tahalo Uru ge vilai taia.

11 Amuto tabarabaragu, amuto ge lolo somai taku, egiteu la tahalo la visigologolola, egite saupupupu eau veia la haro isahari eau soloio te la valolo mai te la kiroro la vovo la tahalo! Me mai ge mai ale, la vuhula lava egite Iuda oio gagima moliaue, mai eau ge soloio moli te la vimari ale egite masagea! Eala moli eau te la valolo moli te la tauvalautu, ale egite malagotila. 12 Mai amuto ge veia giteu la tahalo la visigologolola ale igo gegeru amutou ele veia ge egite ge barautu rivu bakisi la vovo giteu loue! La vovo gatou ale egite veia ge koro taroale, egite ge koro rivu lou tegiteu, eia ge paru tomi molitio!

13 Amuto tabarabaragu, La Tahalo Uru tolati amutou veia ge vagoilo amutou te la pulolou la mavulahala, amuto kamati ge pou lou te la kilisi. Eala moli isasa umala ge toia maie veia “Taritigi pepeho, eau ge tilimuli moli la masasagala taku te la vovo, la vuhula La Tahalo Uru kama kisi leau la merera usu.” Ouka, etato umala ge gabutatala mai aleiele. Eala moli taritigi amuto ge visuli baololi te la igogolu tomi, ge vipuhi tigi moli te la gilogo te La Tahalo Uru. 14 La vuhula, la merera te Moses tomi, la masovala isa moli maie veia “Amuto ge gogo tavu moli egiteu e tabarabara mutou mai lou ale amuto gogo rivu lou amutou ele.” 15 Eala moli mai amuto ge vaigo totolo, amuto ge igo marapa lou la pulolou tamutou ale taritigi ele, amuto mai ale ge sulu rivu lou amutou ele!

16 Tiele, eau ge tutu tola loua mutou maie: Mai La Kalulu La Marokala ge magiri mamuga te la lagu mutou, amuto kamati ge vulo gele tavu la vulovulo la vovo ale kama kokora. 17 La vulovulo la vovo ale kama kokorale, me la vulovulo La Kalulu, egira kama visauru, egira isapolo seseleti, egira vaubi bibibi moli. Me oio volale amuto ge matagaga tigi veia la haro usu etato kama tilimuli sesele la gabutatalala tegatou ale taritigi, la vuhula oio moli te la vulovulo la vovo ale kama kokora, eia soloio mahulihuli oilo tegatou. 18 Eala moli mai La Kalulu La Marokala eia ge mamugame, eme kati ge pou lou te la uluva la merera te Moses.

19 Eala moli mai amuto ge tilimuli la vulovulo la vovo isahari ale kama kokora, la iruru ge sibitala, eia ge tabuli matagaga te la valalua me hatavivile tomi maie: la iligo la iruru soio te la tavile, la para osaosala, la mata bulakalakala, la gililo, 20 la lotu tavu la puigolo, la savula, la vikokuela, la vaigigola, la ilo maliki tavu la golu te tabaramu, la igototolola, la vareagila, la vigiriri tatavula, la vipou baala, 21 la ilo lago la paga te tabaramu, la iliu pauala, me la iligo galolola. Eala moli eau mera taro vagari lou amutou tegiteu la iruru tomi alele. Egiteu ale vagari tavu egiteu la vulovulo alele, egite kama koramulia ge sau tola la pulolou la matagagala te La Tahalo Uru, ouka viruru.

22 Eala moli la vavua La Kalulu La Marokala ale eia visibitalea te la mahulila tegatou, eia maie: La gilogo, la sagegela, la vipuhi tigila, la tilogo, la mutelela, la vulovulo ale taritigi, la vikara seselela, 23 la vaigo tigila, la vulo taro la vulovulo la vovo ale kama kokora. Isa kama koramulia veia ge magiri robo egiteu la vulovulo alele! 24 La vulovulo mutou te la vovo ale kama kokora, mai amuto kama ge sugu taroa soata te la tauvalautu te Iesus, ge poke taroa, amuto kama koramulia ge veia amutou te Kraist, ouka.

25 La Kalulu La Marokala, eia vimahuli etatou tomi, eala eia taritigi etato ge pou te la uluvala veia eia ge mamuga etatou. 26 Etato umalati ge pou tavu lou la vulovulo la vareagila, veia ge etato ge karasusuku la valalua me hatavivile veia ge la masasagala tegatou ge tabuli loata te la masasagala tegiteu e tabarabara gatou ele, umalati.