1 Tiele, eia taritigi pepeho veia amuto tabarabaragu ale eau gogo amutou, eau gabu pepeho amutou, taritigi amuto ge magiri vagari te Iesus, La Uru gatou.

2 Eau kaka vagari amulua la tavile uru iluale, e Vodia, e Sintiki, amula ge vipuhi tigi lou te la isale Iesus, La Uru gatou. 3 Me eau kaka tai eme, e vikilipi taku sesele ale pou oio e Pilipai ele, eme ge suli egirua veia egira kati ge vaigo, la vuhula egira pala vaigogolu vagari vikapopo le amiteu te la valolo te Iesus, mai amiteu me Klement, me egiteu la tahalo la visuli tomi ale la isaisa giteu La Tahalo Uru kekesi tolatia te la buk la mahulila.

4 Taritigi pepeho veia te la haroharo tomi amuto ge sagegege moli te la isale Iesus, La Uru gatou. Me eau ge vei loua mutou vakasa lou maie veia amuto ge sagege! 5 Eala moli amuto ge la tahalo la pou makokovula, la tahalo la mutelela tai. Hagagaviti La Uru gatou ge beu rivua. 6 Amuto umala ge gabutatala papapai te la mahulila tamutou te la paga isasa mai la ilali me la lavalava. Amuto ge vaisale moli La Tahalo Uru, me la paga ale amuto savelea, amuto ge kaka molia tetala. 7 Me oio moli ovola, La Tahalo Uru ge igo malilo tataho la tia mutou oilo, veia la gabutatalala tamutou ge magiri vagari oio te Iesus Kraist moli sekela, amuto kama ge marapa. La visuli uru ele, etato la tahalo la vovo kama koramulia ge igoa, La Tahalo Uru moli sekela koramulia.

8 Eala moli la tapasi la merera taku tavu amutou e tabarabaragu ele, eia maie: Amuto ge igo volu la gabutatalala tamutou me la vulovulo ale maroka maie: La vulovulo ale taritigi, la merera ale sesele, me la gauru ale matata. La valalua me hatavivile ge hiloa, egite ge rovia veia la pulolou tamutou eia maroka, eia marasa, egite ge vei tataho amutou te la vulovulo mutou mai ele, me La Tahalo Uru tai ge sagege le amutou. 9 Amuto ge igo seselea mai ale eau vahiloti le amutou ovola, te la merera taku te la valolo, me te la vulovulogu tai ale eau pala pou oio tamutou. Mai amuto ge igo seselea mai ele, La Tahalo Uru ale igo malilo tataho la tia gatou, eia ge pou tamutou.

10 Eau sagege pepeho, eau vaisale sesele e Kraist, La Uru gatou, teale igoie amuto gabutalati lou eau. Sesele amuto kama vaula leau, eala moli la gauru ouka veia amuto ge suliau ovola. 11 Eala moli eau kama ge hateka, la vuhula mai eau ge savele la uati, la pulolou la savelela eau tahaiti ovola, veia mai la uati taku ilua moli eau ge taholea eia ge koramuli moli eau. 12 Eau sagaititi, eala mai eau ge pou la savelela, veia mai eau ge pou tai la balavala, ale la golu bulalahu. Mai tai eau ge vitolo, uka eau ge maru, ale tai eau kama gabutatalea. 13 La iloburukola tomi ale eau ge pogea, eau ge bolehohola la vagagirila te Iesus Kraist, eia la tuha magirigu. 14 Eala moli ale eau pou la savelela, amuto loloa, amuto suliau, taritigi pepeho te alele. 15 Ale pala, eau so sosoko moli la igogolu la valolo te Kraist, amutou la valalua me hatavivile e Pilipai rovia, la lotu isa lou kama suli leau la vaabila ale eau hiliti taro la gale e Masedonia, amutou moli. 16 Me mulimuli te la pulolou taku oio e Tesalonaika, kara igoie, amuto sulitiau vaka luati. 17 Eala moli la vaabila tamutou ele, eau kama gabu tikumua, eau gabu tikumu moli la tilalau ale La Tahalo Uru rararagia veia ge koli la vulovulo mutou alele. 18 Me igoie eau popou, eau kama savele, la vuhula eau abiti la vaabila tamutou ale e Paprodaitas vahariagu, me eau lege sisigi seseletila. Amuto sugu tarotiagu la vaabila alele, La Tahalo Uru hilotia, eia mai ale amuto vaabi tai soio tetala me eia lege sisigi taila. 19 Me La Tahalo Uru ge koli pepehoa soio tamutou, la vuhula eia tahola usu pepeho la vuliti, eia ge abi uru loua mutou, teale amutou te Kraist Iesus, me mai amuto ge savele la paga isasa, eia ge abia mutou.

20 Etato ge toi taritigi pepeho soata te La Tahalo Uru e Tama gatou, kara igoie, kara mulimuli, la kaluvula ge ouka. Amen.

21 Amutou tomi la riau te Iesus ele, amiteu me egiteu e tabarabara mutou ale omai egite taku, amite veia mutou la haro. 22 Egiteu tomi la riau te Iesus ale omai, egite veia mutou la haro sesele, egite tomi tai la valalua me hatavivile te Iesus omai ale igogolu te la luma te la mulugaluga tegiteu e Rom, egite vei taia mutou la haro. 23 La gilogo te Iesus Kraist, La Uru gatou, eia ge pou te la kalulu mutou tomi isasasa.