A Varuaiang A Waambaar Zin Jon
Ka Waan Sin Aubina Di Inaxam Paazaai
A Dor Vaamaravazang Pana A Waambaar Angkari
Aaposal Jon ka varaar a waambaar angkari. La raan angkanaan aubina di inaxam paazaai di iruzuaai naandi ina di zuruk a Dorang Daxa zin Iesu ma di waan farawuk ma di fazei wana. Singsaxai amun maravas faagit di giu zaait malasing kanaan, malasing ma Jon ka farar zin aubina di inaxam paazaai xuna raamaai daxaiang pana amun faraviraaiang sin naandi dit sangas farawuk, ma dina ruzuaai be naandi ina di ilos Iesu. A maariaas iwana fararang ka malasing AD 87.
A baar 2 Jon ka malasing kari:
(1) 1-3 A dor vaamaravazang
(2) 4-6 A matmalabuk iwana sasaxotang azanon
(3) 7-11 A fanaauang pana amun maravas faagit
(4) 12-13 A vanongang a dorang
1
A Dor Vaamaravazang
1 Nia a waamua iwana lotu.
Ga varaar a dorang kari xa waan sunum a ravin ina Nakmai xa kalin ma xa waan saait sin a funalik sunum. Nia ga sasaxot faaratunaan nim. Kawit nia zingbe, singsaxai naandi vaakdul di rexaazin a dorang faaratunaan sin Nakmai, di sasaxot saait nim, 2 panaze a dorang faaratunaan sin Nakmai xa iziar zin dia ma xana iziar bulaai zin dia.
3 A daxaiang ma a varamaaluvang ma a luaai xana iziar varaxai wana dia xa wat sin Nakmai Damana dia ma Iesu Kaarisito Naata Nakmai lamaskana a dorang faaratunaan ma a matmalabuk iwana sasaxotang azanon.
A Dorang Faaratunaan Ma A Matmalabuk Iwana Sasaxotang Azanon
4 Nia ga nanam mase wanaze ga langarin adu azanon sin a funalik sunum di valos a dorang faaratunaan sin Nakmai, malasing be Damana dia xa dador dikdik sin dia wana. 5 Jn 13:34,15:12,17Ma naari fafnugu, xawit ga varaar vawat ta dorang faaxur zunum. A dorang dikdik angkari, dia di langarin fanong paamua la raan dia di zuruk a roroiang faaxur lamaskana Iesu Kaarisito. Ga maainung adu dia dina sasaxot axazak saksaxai. 6 A vuvuna a matmalabuk angkanaan iwana sasaxotang azanon ka malasing kari: Lamaskana a roroiang faakdul zin dia, dina valos amun dorang dikdik sin Nakmai. Malasing nim naagu ra langarin la raan naagu zuruk a roroiang faaxur, a dorang dikdik sina xa malasing kari: Naaguna sasaxot azanon tawarak lamun taan faakdul.
Dia Dina Roting Falagot A Dorang Sin Kaarisito
7 Avuna amala aubina dit faagit ma di zazangas farawuk la pira angkari. Aubina angkanaan di wispuk adu Iesu Kaarisito xawit na balas malasing a xastunaan. Aubina malasing kanaan dit faagit ma naandi amun purua zin Kaarisito. 8 Naaguna lagat kuna xatkatong fatalaminang a matmalabuk daxa zinim, kuna tuaa naaguna luaa psin amun saan ina naagu gut pana lamaskana Kaarisito, ma naaguna zuruk a wulwulang faakdul zinim. 9 Tamon axazak kawit na valos amun faraviraaiang sin Kaarisito, ma naa vadumduma wana azanon faraviraaiang tawarak, Nakmai xawit na iziar zina. Singsaxai tamon ka valos amun faraviraaiang sin Kaarisito, Damana dia ma Naatna di iziar iaa zina. 10 Tamon axazak ka balas sinim ma xawit na zuruk fawat a varaviraaiang kanaan, tuaa naagu rudaxain naan kula vaal ma tuaa naagu ruzuaai naan. 11 Avuna tamon taxazak ka ruzuaai naan, ka malasing adu naan ka irur varaxai wana naan lamaskana amun taksaarang sina.
A Vaanongang Iwana A Dorang
12 Ga rauxin a dorang ka varas kuna dadorang pana zinim. Singsaxai xawit ga saxot gana varaar wana a waambaar ma wana a xizong iwana ikalarang. Ga naxaam be adu gana balas puat sinim, ma dia dina varataamaai varaxai ma gana dador zinim kuna a nanamang sin dia xana bas pakluaai. 13 A funalik sin duaam ina Nakmai xa ra kalin naan, di lis a dor vaananamang sinim.