4
Urikung Onou Sipampiaing Orara Aarumo Nariꞌ
1 Enang tee, Karistooꞌke bakaang monoi baike toraꞌpuuꞌnung-koo diiꞌ teeꞌ nariꞌ uroꞌkanooꞌka purintariri arooꞌdariaing temuriiꞌ baike kuneꞌkoo, aiꞌ baa tee naning baike kuneꞌuma tee tee enang orakaꞌ nko-ita bakearing. 2 Tee tee enang bakaang mono ninka domampari otoi emuꞌketa deto mono bakaang pia siompuaukaꞌ, teka Kumponing bakaang pia siompuaing. 3 Tee tee diiꞌke teing-pinaꞌ nariꞌ mutaanang-nupoong piavoromanaꞌ aing aaꞌning nkoveriaukaꞌ temuꞌ nkoverikoꞌnaꞌ: maimaiaꞌnaꞌ otoꞌ, mono bakaang pia siong, purintoꞌ naruꞌke kanuꞌanta, taamang tovang nainai nai-koo deikooꞌ, eeꞌnoko daang-koong dootuuꞌ, tee maarekusiꞌ. Batei temuriiꞌ nko-koo tero tankinuing botu teꞌ. 4 Teing teing enang taꞌnimparirining diiꞌ teing ninka nariꞌ tapoꞌdariaruioꞌ tamung iriꞌ oꞌanta-koo, eeꞌnoko orakaꞌ minkuraarikooꞌ. 5 Teka teinge tee teka damaꞌ toosiaavaing Kumponing ninka ookara nantoong simpeꞌkoo maamuari otoing ninka: booꞌnuka eeꞌnoko domantooꞌnuka nariꞌ. 6 Aiꞌ teie Kumponinge teing temuꞌ boorouꞌning teeꞌ nariꞌ tampara doorenang taara-antavuruꞌ teing teing biikaang tanuaang domampariri otorooꞌnaang Kumponing domampari otomanaꞌ nariꞌ. Ookara nantoong ninka nariꞌ biikaang mono booꞌkoo barakosiꞌniiꞌnuka deempariko teie tee daankinang taara-antavuruꞌnung.
Teing Avuavuꞌ Kumponing-etaing Kompampiri Tampaꞌ Mintoomariaing
7 Ookara kapooꞌnanka aung kansiꞌkoonanka oꞌdoma dueꞌumaang. Teeꞌkoo mataurariri tarerariri otoriaing tampaꞌ kunsirariainaꞌ. 8 Ookara-koo daua narunaꞌ narunaꞌ diikaang domang-eta tampaꞌ piaareeri otorimaatoai, aiꞌ niiꞌke nantoong piaavarampima deekoꞌ biikaang orakaꞌ nkonanka mmauꞌ dakaꞌpampipeuꞌ. 9 Diikaning pavananka-koo tampaꞌ onkeonkeꞌdeerimaatoaing baruꞌ poreꞌpinaꞌ noruꞌerima munkumunkureeriaꞌ. 10 Kumponinge avuavuꞌ narunaꞌ narunaꞌ aruruꞌnaꞌ makosinaꞌ komperi pakureerimaatoai. Teeꞌkoo diiꞌ teing kapooꞌ amutemuriiꞌ Kumponinge aruruꞌning tampeng tare-nupoong deentariaing. 11 Kara siraꞌperima deekoꞌ teeꞌ Kumponinge naururiainaꞌ masikaꞌ siraꞌperiai. Nantoong pakuererima deekoꞌ Kumponinge iriꞌ arurimanaꞌ siomperi pakuereriai, ookara-koo kapooꞌ nanka-koo Kumponing pankaimparavainaꞌ Jiisuuꞌ Karistooꞌkoo kuunge. Miring eeꞌnoko meenasi pankaing okovui otomatoaing ookutunung batei-koo oꞌdomaropa-koo. Eeꞌ, masikung.
12 Ee maikoriꞌ, taꞌniniriaukaꞌ diiꞌ tee-koo ntaꞌpinaꞌ mantong-koo parapaara-koo diiꞌkoo poing-koo paararurima. Tee kapooꞌ taꞌnimpaariiꞌpinaꞌ noruꞌeriaukaꞌ. 13 Teka baruꞌnooꞌ doturariaing diiꞌke Karistooꞌ siomperima arikung kuneꞌuuꞌnaꞌ nariꞌ, eeꞌ noruꞌerima teeꞌ nkomarimaung-koo dotumariaing tenang tee bakaang meenasi oroꞌparavainang.
Niiꞌ Dotumariaing Makosi Sisikeera Toraꞌpampira Karistooꞌke Toraꞌpuuꞌnaꞌ
14 Karistooꞌnung miring komperimaung-koo orakaꞌ minkuraariko tee doturariaing, aiꞌ teeꞌ minkuraarima siraꞌpaamaung tee Tanuaang Meekung Kumponing bakaang meenasi-poꞌnung diiꞌkoo otomaung. 15 Teka diiꞌ orara aarumo siomperi sisikeerang-antarariko taara-koo bakei piamoaꞌ aing eeꞌ oroꞌ nkoverima: dupisiꞌanta, bakiaaꞌnko, orakaꞌnko, niiꞌnooꞌ kakaruaꞌdorima. 16 Teka Karistooꞌkoo kuung otoritaaꞌ baike kuneꞌerima maiaꞌdoriaꞌ Kumponing pankaing-antaveriaing Karistooꞌ bakaang miring komperimaung-koo. 17 Aiꞌ batei tee poi otong teie bakanavaꞌkooning paara-anta-koong. Eeꞌnoko niiꞌketa tutumparavaing deekoꞌ teing Kumponing bakaang doorenang tampara siompaavaꞌ otomaing areꞌke botu deempariaing? 18 Teeꞌ Daari Meekunge aaꞌpumanaꞌ,
“Teing koontoꞌnuka kakaue domampariaing deekoꞌ, teing nantoong oreng Kumponing piavoroaing areꞌke oroꞌpariaing?” (Mirumiruꞌ 11:21)
19 Teeꞌkoo teing nantoong Kumponing bakaang pia-koo otoroi baike kuneꞌaavaining, makosi tampaꞌ nariꞌ nkoaamatoaing biiꞌka avariri tee-koo teing nkovuruꞌnung bakaang tare-koo, biikaang tarenara mutekaroꞌ masikaꞌantavai.