Aneꞌ
KALESIA-nupoong
Paulaꞌke Daarievuruꞌnaneꞌ
Kara Baavootunanka Aneꞌkooning
1:1 Kumponinge Eeꞌnarai Paulaꞌ Bakaang Kara Okovui Nka-koo Miruꞌuuꞌnaꞌ
2:15 Teing Jiisuuꞌkoo Baito-nupoong Naing Kumponinge Koontoꞌnuka Tampurimanaꞌ
5:1 Tanuaang Meekunge Baito-nupoong Siong-antavurimanaꞌ Tampaꞌ Nkoveeaꞌnaang
Kumponinge Eeꞌnarai Paulaꞌ Bakaang Kara Okovui Nka-koo Miruꞌuuꞌnaꞌ
1
(1:1–2:14)
Ee aing diiꞌ dootuuꞌnupoong Kalesia-nameensiꞌ otorimaing osi kante-koo, niiꞌmaikororiꞌke ookarai nariꞌ oꞌnorimainge tampaꞌ tampampimaang diiꞌanko daarirerompima niꞌninka Paulaꞌ ninka; Ning tee Paulaꞌ Kumponinge Baumai eeꞌnoko Jiisuuꞌ Karistooꞌ booꞌketa daaꞌantavuuꞌnung, tekange eeꞌnakange koontoꞌ miruꞌmuretuꞌnung beekaang kara okomui nka-koo, niiꞌninge deeaꞌ.
Biraanke eeꞌnoko mooa diiꞌkoo otoaing Kumponing Niuma-itaing eeꞌnoko teieta Ovoring Jiisuuꞌ Karistooꞌ. Tee eeꞌnara niikaang orakaꞌ nkonanka tontaꞌmemuri baka avaruꞌnung kansiꞌkoong orara aarumo-ita mooꞌmuriiꞌnaang enanaroong-koo otomaung-eta Niuma Kumponing meumpui. Tee-koo daangang otoaing ookara batei boturopa-koo. Eeꞌ, eeꞌnaꞌ.
Tokoonamuriau “Tampara Doorenang” Tampaama Siompai Pooariruꞌnaꞌ
Ning bakei taꞌninansi oꞌnong diiꞌ daꞌdeng bereꞌdaririoꞌ Kumponing-eta, tampaꞌ bokururuꞌnung-eta diiꞌ bautaꞌduriiꞌnaang Jiisuuꞌ Karistooꞌke. Tee siperima taꞌninaꞌ niiꞌnamuriiꞌ kara siong-koo tutumperuꞌ “tampara doorenang” tamperima. Teka tee niiꞌnamuriiꞌ tampara doorenang otoaꞌ. Nantoonge tosiraariko siperuꞌ tampara doorenang Karistooꞌkoong aveꞌkoo piavoromainge. Baa tee, bane niiꞌ aiꞌ koosinung˜ paning-eta deekoꞌ daankiampipeuꞌ oovunaare “tampara doorenang” tampampima tero daankiampiruꞌnung-pinaꞌ oroꞌ deeaung, tee aaꞌ tee barakosiꞌari otoaing. Enang napoꞌ unaunantampiri naurampimang: Baa tee naning oovunara kara “doorenang tampara” tampuma daankirurimaung dakaꞌpui tee tenaare tero taaraveruꞌnaare, tee tee eeꞌnara barakosiꞌari otoaing. 10 Aung arekeeꞌ, aiꞌ nantoong dotu-antavaramaꞌnaang minkuansinunge aiꞌ Kumponing dotu-anta-koonge? Tee aaꞌ nantoong dotu-anta-koong deeaꞌ. Nkaang aarumo nantoong dotu-anta narung-koong deekoꞌ ning tee Karistooꞌ bakaang botovotonaaꞌ deeaꞌ.
Doorenang Tampara Masikung Tee Baka Karistooꞌke Paulaꞌ Oko-antavuuꞌnaꞌ
11 Diiꞌke mmaikoriꞌke eeꞌ noruꞌeriiꞌnaang piamomaang tee eeꞌnara doorenang tampara ninge daankiantuꞌnung tee naning kansiꞌkoong bakaang deeaꞌ. 12 Aiꞌ nantoong-koo baremaravaꞌ, napoꞌ naninge nau-antamuaꞌ, nka baka Jiisuuꞌ Karistooꞌke sirapoꞌuuꞌnung ning-koo. 13 Diiꞌke ning noruꞌmeri oꞌnong nkaang urikung otootoꞌ Juꞌnung aarumo-koo kuunge oꞌnokoꞌnaꞌ; 14 Ning tee nkanavarang-koo bakei dau basi Juꞌnung aarumo-koo nkanavitu-koo. Kaakatauro biikaang pareꞌnaanta aaꞌnaꞌ purimari siompansitaaꞌ teing dootuuꞌnupoong aaꞌnaꞌ tavarama turamparankoꞌ pesiꞌaramaꞌnaang paaravama; 15 Aung aaꞌ tee teketa ning-koo kapooꞌ nkoaruꞌ: Tee tee ning pontoꞌmaravaruko Kumponinge tero miruꞌmuuꞌ bakaang kara-okomui-nka deemaraaꞌnaang; 16 Teketa bokumuuꞌ domaang oparavaung amuuꞌnaang, eeꞌnoko napoꞌ baka bakaang pia siompuitaaꞌ tee Bauring ning-koo sirapoꞌuuꞌ ninge daankiamaꞌnaang tee avitevitunanka-koo; 17 Teeꞌ nkoarako naning baa tasiꞌantamuaing besiꞌampaꞌ eeꞌnoko Jerusalemaꞌaape meaꞌ teing-anko ning-koo uroꞌkanooꞌka kara-okovuri nka-nupoong deempariruꞌning-anko, teka ning Arebia-nameensiꞌaape tenkenantuꞌ. Eeꞌnoko napoꞌ damaꞌke Damaskas-namono-aape toromaruꞌ. 18 Teketa beemareꞌpi masiraani tankinuko Jerusalemaꞌaape napoꞌ toromaruꞌ Siipas, tee niiꞌnaꞌ Piita, beeroꞌamaꞌnaang, eeꞌnoko kivora-ita paꞌnokoꞌ doong oꞌnouꞌ tee ninka. 19 Teka niiꞌning kara okovuri nkanuka-koo ooarampaꞌ, Jeemisi narung deekoꞌ Ovoring baaraꞌmaꞌnung ooantuꞌ. 20 (Aung kapooꞌ ninge diiꞌ daarirerompimatomaung-koo Kumponing-koo uroꞌkanooꞌke ning tosimaravaꞌ.) 21 Teketa tee ning aaꞌning-aapei meuꞌ: Siiria-nameensiꞌ eeꞌnoko Silisia-nameensiꞌ. 22 Eeꞌnoko tee niiꞌninge ning oing oomaavaꞌ Karistooꞌ bakaning dootuuꞌnupoong-kooninge Judiaꞌnameensiꞌka. 23 Teka tamung teinge eeꞌ nariꞌ taaramauꞌ: “Tee aung tee niiꞌ tamurikoꞌnung enang tee minkunaa masikaꞌantavampimaung daankivumang aaꞌnung tero turang-koo paaravukoꞌ.” 24 Eeꞌnoko teinge Kumponing daangampauꞌ ning-koo.