4
Sietaniꞌke Jiisuuꞌ Paaravuuꞌnaꞌ
(Mat 4:1-11; Mak 1:12-13)
Eeꞌnoko Jiisuuꞌ Tanuaang Meekunge maantoꞌura toroaruꞌnung teketa Jooꞌdani-nari-eta, eeꞌnoko Tanuaang Meekunge beꞌantavuuꞌ meeꞌboraꞌ sirakamaaꞌkoo karenaumo kivora doonanka-koo Sietaniꞌke dauaꞌkoo; Eeꞌnoko teie tee kapooꞌ naivuaꞌ teing doong-koo. Eeꞌnoko teing doong oparuꞌnooꞌke tee peeravouꞌnung. Eeꞌnoko Sietaniꞌke Jiisuuꞌ duaꞌanta-koo paaravuma aaꞌpuuꞌ tee, “Daꞌ Kumponing bauring deekoꞌ aung kapang naueko taamang deemparavaing.” Eeꞌnoko Jiisuuꞌke makuꞌuma aaꞌpuuꞌnung tee, “A, tee Daari Meekung-koo eeꞌ daariari otong,
‘Naning taamang narunge domampari otoaung, teka ookara kara Kumponing-etaning siompui domampari otomaung.’ ” (Boto 8:3)
Eeꞌnoko Sietaniꞌke deto koing-antavura okiꞌnung batei-koo oo-antavuuꞌ ookara muuꞌnanka kansiꞌkooning. Eeꞌnoko aaꞌpuuꞌ tee, “Ninge tee daꞌ aing ookara tare-koo purintoꞌ arompaing biikaning meenasi ninka, aiꞌ aing ning okomui otoining eeꞌnoko ninge tee avomaung baa ninge pia-antavamaung avuꞌkoo. Teka dake ning dootuuꞌmei dei aing ookara oko-antarampeuꞌ.” Eeꞌnoko Jiisuuꞌke makuꞌuma aaꞌpuuꞌnung, “A, Daari Meekung-koo eeꞌ daariari otong:
‘Diiꞌke Ovoring diikaang Kumponing narung dootuuꞌeriaing, eeꞌnoko niiꞌnung siomperiaꞌ otoriai.’ ” (Boto 6:13)
Eeꞌnoko Sietaniꞌke Jerusalemaꞌaape beꞌantavuuꞌ tee Jiisuuꞌ, eeꞌnoko aꞌdeiꞌ pava dootuuꞌnava pankava-koo miiraka-koo panteꞌantavura aaꞌpuuꞌ, 10 “Daꞌ Kumponing bauring deekoꞌ anke doonko toꞌdiꞌdaravaing, tampaꞌ duaꞌdarako masikaꞌantaraavainaꞌ, aiꞌ Daari Meekung-koo eeꞌ daariari otong,
11 ‘Teie bakaning koosinunanka botovuriaing daꞌ neeꞌdaavaꞌnaang. Teinge biikaning birenge deto doontaavaing, kapang-koo kauꞌ naapuraraꞌneeng-koo.’ ” (Kena 91:11-12)
12 Eeꞌnoko Jiisuuꞌke makuꞌuma aaꞌpuuꞌ, “A, teka napoꞌ Daari Meekunge aaꞌmurimaung,
‘Diiꞌke tee Ovoring diikaang Kumponing parapaara-koo siperiaukaꞌ.’ ” (Boto 6:16)
13 Eeꞌnoko tenang Sietaniꞌke paaravuma bakevura sipuuꞌ napoꞌ niiꞌnang makosivuainang nempuitaaꞌ.
Jiisuuꞌ Kaaleliꞌnavaro Bera Tampaꞌ Mintoomparuꞌnaꞌ Tanuaang Meekunge Iriꞌantavuioꞌ
(4:14–9:50)
Nasaretiꞌnupoonge Tutung Bataꞌauꞌnaꞌ Jiisuuꞌ
(Mat 4:12-17; 6:1-6; 13:53-58; Mak 1:14-15)
14 Eeꞌnoko Jiisuuꞌ meeꞌboraꞌ sirakamaaꞌketa toroaruꞌnung tee ninka purintoꞌ Tanuaang Meekung-etaing ninka Kaaleliꞌnameng-aape; 15 Teie Jiisuuꞌke nau-antavurikoꞌnung biikaning pava dootuuꞌnanka-koo biivimpaako, eeꞌnoko tee-koong doorenang avitoitoi nanuꞌantavauꞌ tevaro-koo;
16 Eeꞌnoko tee Nasaretiꞌ pouꞌnung teꞌ tee pankaꞌantavuretuꞌnooꞌ. Eeꞌnoko biikaang pava dootuuꞌnava-koo tumparuꞌ bakaang aarumo Doong Uaanaꞌmung-koong siompuitaaꞌ; 17 Eeꞌnoko deeruvuuꞌnaang donkonuioꞌ avauꞌnung buukunaneꞌ temuꞌnung Kumponing-etaing nakaronarai Aisaiaꞌke daarivuuꞌnaneꞌ. Teie teneꞌ bereꞌura koontoꞌ piavouꞌnooꞌ oovura deeruvuuꞌ eeꞌ daariari otoinooꞌ,
18 “Tee Tanuaang Meekung Ovoring bakaang ning-koo otong aiꞌ ning tee pakoꞌpariꞌmuuꞌnung teie daankiamaꞌnaang doorenang tampara ataꞌoiꞌnuka-koo. Teie botomuuꞌnung ning nauaranko daiꞌnisinanka dipiꞌariiꞌnaang eeꞌnoko kaputuꞌnuka ookaavaꞌnaang;
19 Napoꞌ botomuuꞌnunge unaa-antavaramaꞌnaang teing booniꞌuri otoromaing eeꞌnoko nauaramaꞌnaang enanung batei Ovoringe miruꞌuuꞌnung piaavurira domampuriaing-koo teing.” (Aisaiaꞌ 61:1-2)
20 Eeꞌnoko teie teneꞌ avoꞌura avuuꞌ napoꞌ tee naning dootuuꞌ nko-koo pakupakunung eeꞌnoko nau-anta nko-koo neriarama doonko baꞌnamparuꞌ nantoonge ookarai teke pava dootuuꞌkoo otorokoꞌninge naapu narung ooai otoko; 21 Eeꞌnoko tee kara tutumpuma aaꞌpuuꞌ, “Eꞌmung tee dupearing taaraverioꞌ tee Daari Meekunge minkuvuuꞌnung.” 22 Eeꞌnoko teing ookarai tampaꞌ tampauꞌnung tee-koo, eeꞌnoko taꞌninauꞌ kara maneenaꞌ karouꞌnung-koo. Eeꞌnoko teinge aaꞌpauꞌ, “Nko aung baie, Josepaꞌ bauring ee deeaꞌ?”
23 Eeꞌnoko teie aaꞌpuruꞌ, “Masikaꞌ noruꞌansing, anaare karanaare mirumiruꞌnaare napoꞌ ning naumeriiꞌnaang diiꞌke, eeꞌ minkunaare, ‘Nankaiꞌ, daꞌ daka taare-antararavai. Teing kapooꞌ Kapaneumeꞌnavuntuꞌkoo nkoveuꞌning taaravampiruꞌning anke dakanooꞌke napoꞌ nkoveaing masikung deekoꞌ.’ 24 Masikung naurampimang, naning Kumponing-etaing nakaronara bakanooꞌka tee arooꞌaavaung. 25 Masikaꞌ aaꞌnouꞌnung naurampimang: Mmauꞌ naaroonkunanka otorokoꞌ Isireeli-nameensiꞌkoo tenang tee temuꞌnung Kumponing-etaing nakaronara Eliasi otokoꞌnang peera pankaing nkoaruꞌ aaꞌnang, paning pankaroong avoꞌari otoko mareꞌ beemareu-eta ˜nau-taa kaara-koo. 26 Eeꞌnoko teing-koo naning-anko Kumponinge botovuaꞌ Eliasi, teka naaro Juꞌdeeaing-koonani-anko naroꞌ botovuuꞌ paku-koo arooꞌuainani noruꞌui Sarepatiꞌnavuntuꞌkoo, Saidoniꞌkoonooꞌ. 27 Eeꞌnoko napoꞌ tenang tee Kumponing-etaing nakaronara Elaisaꞌ bakanang aaꞌnouꞌ, mmauꞌ oramuuꞌpoꞌnupoong otorokoꞌ Isireeli-nameensiꞌkoo, eeꞌnoko teing-koo niiꞌnarai Elaisaꞌ arooꞌuaꞌ kui-koo, teka Juꞌdeeaing-koo narung deekoꞌ, Neeamani, Siiria-nameensiꞌkoong, Elaisaꞌ arooꞌuioꞌ kuiaruꞌ.”
28 Tenang teinge teeꞌ taaravaara ookara pava dootuuꞌkoo otorokoꞌning aaꞌnaꞌ iiravorouꞌnung. 29 Eeꞌnoko daaꞌarira kompai osi-eta tuuꞌaama bataꞌauꞌnung bera mare-koo auremping osi siroong kaniauꞌnooꞌketa dueꞌ, teke doonko kosiꞌaavaꞌnaang boreꞌke uroioꞌ. 30 Teka teketaꞌ teing-koo meuꞌke beentevuri tankinura tenkenuuꞌ.
Jiisuuꞌke Kapaneumeꞌnavuntuꞌkoo Maꞌnaang Bataꞌuuꞌnaꞌ
(Mak 1:21-28)
31 Eeꞌnoko Jiisuuꞌ Kapaneumeꞌnavuntuꞌaape danto beuꞌ, osi pankaing Kaaleliꞌnameng-koonooꞌ; 32 Eeꞌnoko teke otoi Doong Uaanaꞌmung kara nau-antavuriko aaꞌnaꞌ taꞌninauꞌ tee-koo bakaang nau-anta-koo, kara bakaang purintoꞌ deemparioꞌ; 33 Eeꞌnoko teke pava dootuuꞌkoo naning narung otokoꞌnung maꞌnaang orara kurumaaꞌaruꞌnung. Eeꞌnoko aaꞌnaꞌ uiarama aaꞌpuuꞌ, 34 “Ei, arekeeꞌ nkomeriiꞌnaang, Jiisuuꞌke Nasaretiꞌnunge? Daꞌ ee niiꞌ bataꞌkoo poing? Ninge noruꞌdansi oꞌnong daꞌ Kumponing-etaing Naning Meekung.”
35 Teka Jiisuuꞌke tee akaꞌpuma aaꞌpuuꞌ, “Kareaukaꞌ, eeꞌnoko daꞌ teietaꞌ bankeꞌdaravai.” Eeꞌnoko teketa maꞌnaange teing-koo meuꞌ teꞌ doonko duaꞌantavura teieta bankeꞌaruꞌnung tokoonaꞌ baikevuaꞌ tee. 36 Eeꞌnoko ookarai aaꞌnaꞌ taꞌninaara biiꞌka kareaama aaꞌpaakoꞌ, “Aung aremuriiꞌke karai iirakutai karomaung purintoꞌke aaꞌnunge maꞌnari orenanka botovuriko bankeꞌarikooꞌ?” 37 Eeꞌnoko doorenang aung-koong tee ookutunairue osinankai nanuuꞌnung temeng korovui otoininge.
Jiisuuꞌke Piita Baꞌdoraa Taare-antavuuꞌnaꞌ
(Mat 8:14-17; Mak 1:29-39)
38 Eeꞌnoko tee teketaꞌ donkonura teva pava dootuuꞌnava sipura Saimoniꞌ bakanavaꞌke deto koinuuꞌ. Eeꞌnoko Saimoniꞌ baꞌdoraa teke aaꞌnaꞌ siipavora otoko uipaariiꞌ ninka teinge Jiisuuꞌ niaꞌauꞌ teni pakuvuuꞌnaang. 39 Eeꞌnoko tee teni-anko donkonura tee siipa akaꞌpuuꞌnung eeꞌnoko tee uipaariiꞌ namuꞌke boimpuuꞌ. Eeꞌnoko namuꞌke tenie deto iꞌamparara bauꞌuruꞌ teing.
40 Emuꞌ tee tenang duaaꞌ tumparioꞌ ookarai biikaning siipa-poꞌnupoong tavoꞌaaruꞌnung amutemuriiꞌ siipa otoꞌevorokoꞌning. Eeꞌnoko teie tankaꞌ ookara-koo narunaꞌ narunaꞌ panteꞌurima taare-antavuruꞌnung. 41 Eeꞌnoko mmauꞌ nantoong-eta maꞌnari bankeꞌarikoꞌ bokiaama aaꞌpaama, “Daꞌ tee Domang-anta Kumponinge tero nantoong marakavuruꞌnung, Kumponing bauring.” Teka teie orokovurima kara-koo tauraꞌpuriarukoꞌ, aiꞌ teinge tee tasiꞌpauꞌnung tee tee Kumponinge tero Pakoꞌpariꞌuuꞌnung˜ nantoong domampuri tarevuriainooꞌkoo.
42 Eeꞌnoko siimpoorovuma˜ nanuko Jiisuuꞌ tenkenura baka otoꞌnooꞌ beuꞌ teke kunsiaraaꞌnaang. Eeꞌnoko nantoonge besiꞌaama porouꞌ tee-anko. Eeꞌnoko pinkaꞌkoo paaravaakoꞌnung teing-ankoita tenkenuarooꞌnaang. 43 Teka teie aaꞌpuruꞌ teing, “Ninge aaꞌ daankiamaꞌnaang tee doorenang tampara napoꞌ niiꞌning osi-koo Kumponing bakaang muuꞌkoong, aiꞌ ning tee teeꞌ nko-koo botomuuꞌnung.” 44 Eeꞌnoko tee teketaꞌ Judiaꞌnameensiꞌkoo bera daankiarakoꞌ pava dootuuꞌnanka-koo.