16
Kavo-tanata Tosiroꞌkoong Mirumiruꞌ
Niiꞌnaꞌmung Jiisuuꞌke bakaning barevare-nupoong nau-antavurima aaꞌpuruꞌnung, “Naning narung kavo mmauꞌ poꞌnung otokoꞌnung. Teie niiꞌnung bakaning kavonanka avutevuꞌ tare-koo sipuuꞌ. Eeꞌnoko niiꞌninge tuumpiauꞌnung orakaꞌ tare tampaama. Eeꞌnoko teie okonarai bokuvura aaꞌpuuꞌ tee, ‘Tee aming-koo daꞌ minkuraako taaravansing? Kavo tarevemanaꞌ daariera ameaing. Daꞌ tee bake-antaramaꞌnaang.’ Eeꞌnoko teie tare-nkoi baka karoma aaꞌpuuꞌ, ‘Nkaang pankainge enang tontaꞌmuuꞌnaang tanatamaramanooꞌketa. Ninge enang aming nkoamaꞌnaang? Aiꞌ ning tee kansiꞌ nenkeꞌkoo makotumpaꞌ. Ning baka-eenta-koo maiaꞌmomang. Eeꞌ, enang noruꞌansing. Nantoong pakuarampaing biikanairu-koo bokumaavainaꞌ tanatamaramanooꞌketa bataꞌmuko.’
“Tee tee teie narunaꞌ narunaꞌ bokuvuruꞌnung teing bakaang ovoring-koo komaaru˜ otoꞌevorouꞌning. Tutunaꞌnung aaꞌpuuꞌ, ‘Daꞌ nkaang ovoring-koo arekeeꞌning komaaru otoꞌderung?’ Teie aaꞌpuuꞌ, ‘Narung daakuꞌ daramu duuni-poꞌnanka.’ Eeꞌnoko teie aaꞌpuuꞌ tee, ‘Aung aneꞌ komaaru-koonaneꞌ tero daarieuꞌnaneꞌ nkavera iriꞌnarung baꞌnanira pariꞌema niiꞌnaneꞌkoo naruaape daarieai.’
“Napoꞌ niiꞌnung aaꞌpuuꞌ, ‘Daꞌ arekeeꞌning komaaru otoꞌderung?’ Teie aaꞌpuuꞌ, ‘Narung daakuꞌ daramu uiteꞌkoonanka˜.’ Teie aaꞌpuuꞌ tee, ‘Aung aneꞌ komaaru-koonaneꞌ daarieuꞌnaneꞌ nkavera pariꞌema niiꞌnaneꞌkoo naruaape-ita beenaumo kivora daarieai.’
“Eeꞌnoko tee tarenara bakaang ovoringe taaravura aaꞌpuuꞌ, ‘Tee aung tarenara aaꞌ, bane koontoꞌ deeaunge, teka bakei tampaꞌ uroꞌke noruꞌumaung!’ ”
Eeꞌnoko Jiisuuꞌke minkunaavarama aaꞌpuuꞌ, “Nantoong aung kansiꞌnupoong kansiꞌkoo mintoonaꞌ tero uroꞌka matauaarimaung diiꞌ araka-koo-nupoong divuꞌdaari paninung mintoonuka tantarimaing. Aꞌnooꞌ kansiꞌnupoonge tamung apupoꞌ uroꞌke noruꞌaama kavokavoro kompaamaung biiꞌka dotu-anta-koo, Kumponing deeaꞌ. Teka ninge eeꞌ botorampimang diiꞌ araka-koo-nupoong, kavokavoro tampaꞌ komperiaing niiꞌning nantoong paku-koo, Kumponinge tampaꞌ oorurira onkeonkeꞌduriainaꞌ paning-koo, teꞌ tampaꞌ otoi otorimaatoainooꞌ.
10 “Baa tee naning kakeꞌiinung okiꞌning-koo napoꞌ teeꞌke kakeꞌiinung mmauꞌkoo. Eeꞌnoko baa tee naning okiꞌning kompui kavuruaramaung teie mmauꞌ tampaꞌ tanatavuarupeuꞌ. 11 Tee tee teeꞌkoo diiꞌ naurampirinaꞌkoo kakeꞌiirariarura deekoꞌ aung kansiꞌkoong kavokavoro-nanka-koo, baie noruꞌduriaꞌ kapooꞌ masikung oko-antaruripeuꞌ? 12 Eeꞌnoko teing kapooꞌ Kumponinge okiꞌnooꞌ kong-koo tauraꞌdurining-koo kakeꞌiirariaruko deekoꞌ baie diiꞌka diiꞌ okoruriaining aruriiꞌnaang? 13 Narung bautarai kenaanka ovontura siompurearupeuꞌ, aiꞌ teie tee narung munteꞌuma niiꞌnung piaavumatopeuꞌ, niiꞌnooꞌ narung siompuma niiꞌnung siompuarupeuꞌ. Teeꞌkoo diiꞌke Kumponing eeꞌnoko kavokavoro ookeng deto deeng-antaveriarupeuꞌ.”
Kara Mirumiruꞌ Aaꞌning-koong Naning Maneenung Eeꞌnoko Tee Sitovuruꞌ
14 Teinge Boto Keperuuꞌnavitue mooniꞌ piaavaakoꞌninge aing eeꞌ oroꞌ taaravaara Jiisuuꞌ benkempauꞌ, teka teie aaꞌpuruꞌ teing, 15 “Diiꞌ aing diiꞌka koontoꞌnuka-pinaꞌ nkorarimaung nantoonge daangantaariiꞌnaang, teka Kumponinge noruꞌui otong diikaning domang oreng, aiꞌ aming tee kapooꞌ nantoonge daangampaamaung tee maremaare Kumponing-koo duta-koo. 16 Temuꞌketa tee Jooni Minkinara mmeꞌ poaruko Moosesi-nung boto eeꞌnoko Kumponing-etaing nakaro-nupoong biikaang dariraari otoꞌderurikoꞌnung diiꞌke siong-koo, teka Joonie tampara doorenang Kumponing bakaang muuꞌ poaing-koong tasiꞌantaruruꞌnooꞌketa karikaꞌ aaꞌnaꞌ itoveema taatoiarimang tung-koo diiꞌ tamung doororariri otoko. 17 Nka Moosesi bakaang boto-koo okiꞌnanaare daanaare deemparavaukaꞌ, bane paning eeꞌnoko kansiꞌ tankinureko. 18 Eeꞌpinaꞌ, diiꞌ ookara diiꞌankaampi bataꞌerererima oovuning namperererimaing diiꞌke tee nampeesi orarierimaung. Eeꞌnoko diiꞌ donkaang manikuꞌ biiꞌunkaampie bataꞌaarimaing namperereerimaing teeꞌke, nampeesi orarinukai Moosesi bakaang boto totoꞌperi.”* Ooveai Maatiuꞌ 5:31-32; 19:9; Maakaꞌ 10:11-12.
19 “Narung aunge, diiꞌmaikoꞌ, mmauꞌ kavopoꞌnung atang-pinaꞌ oroꞌninge tampenge mononopaꞌke nopaꞌarakoꞌnung, doong kante paroro narunge mavomavoꞌpoꞌninge bauꞌarakoꞌ. 20 Eeꞌnoko bakanooꞌke karanaang-koo naning narung ataꞌoiꞌ bempari otokoꞌ miring Lasarusi, pentai maantoꞌ. 21 Mukunge bauꞌarakoꞌ tee ovoꞌmaꞌnung taamang bantoꞌdoma-ita duaꞌarakoꞌninge. Aaꞌnokoꞌnung, mosiꞌke poroma penta nempiꞌaakoꞌ. 22 Teketaꞌ tee ataꞌoiꞌ booꞌparioꞌ koosinunankai nkavaara Eebaraamiꞌkoo bireng-koo kuung sipauꞌ. “Tee kavo mmauꞌpoꞌnung teeꞌ nariꞌ booꞌparioꞌ dakoꞌauꞌ.
23 Eeꞌnoko booꞌnuka biikanooꞌke sisikeeravoi duta bereꞌarara ookukoꞌ Eebaraamiꞌkoo isipoꞌ otoko Lasarusi ninka nariꞌ. 24 Eeꞌnoko tee bokuvuuꞌnung aaꞌpuma, ‘Mmaꞌ, Eebaraamiꞌ, piaamera Lasarusi botoveko pora pankiriꞌ ntong-koo duuꞌparara meneng komura boimuai, aiꞌ ning tee sisikeerai puruꞌantamuing aung-koo urung-koo meuꞌka.’ 25 Teka Eebaraamiꞌke aaꞌpuuꞌ, ‘Nnuring ee, noruꞌeaing daꞌ tee kansiꞌkoo otoi kapooꞌ tampeng nkasiikoꞌnung eeꞌnoko Lasarusie tenang oreng nkavukoꞌ, teka enang aung anke boiravui domang kuaaꞌoi otong eeꞌnoko daꞌ sisikeerai puruꞌantarui otong. 26 Napoꞌ niiꞌnung kapooꞌ niiꞌkoo meuꞌke keevaꞌ bakatemota otong nantoong anketa tanking-koo piavoropeuꞌning beroarupeuꞌ, eeꞌnoko teketa dakanameng-eta aaꞌ niiꞌanko naning tankinuarupeuꞌ.’
27 “Eeꞌnoko tee kavo mmauꞌke Eebaraamiꞌ makuꞌuma aaꞌpuuꞌnung, ‘Mmaꞌ ee, nuuꞌdamaang dake Lasarusi botoeaing mmaꞌ bakanamono-koo, aiꞌ ninge paꞌnokoꞌ ntaraꞌmainkaang otorong. 28 Bera siingoravuriaing aaꞌ orooꞌ sisikeera-poꞌnooꞌ poroꞌneenga.’ 29 Teka Eebaraamiꞌke aaꞌpuuꞌ, ‘Tee aaꞌ Moosesi eeꞌnoko teing Kumponing-etaing nakaro-nupoong biikaang dariraari otong. Teing deeruaavaing.’
30 “Eeꞌnoko teie kavo mmauꞌke makuꞌuma aaꞌpuuꞌ, ‘A, mmaꞌ Eebaraamiꞌ, naning booꞌketa bei dei teing-anko teing bereꞌaripeuꞌ.’ 31 Eeꞌnoko teie makuꞌuma aaꞌpuuꞌ tee, ‘Tee aaꞌ tee Moosesi eeꞌnoko teing nakaro-nupoong taaravaariaukaꞌnung deekoꞌ tee teeꞌ nariꞌ masikaꞌantavaavarupeuꞌ, bane naninge booꞌketa daaꞌarapeuꞌnunge nauvuriko.’ ”

*16:18: Ooveai Maatiuꞌ 5:31-32; 19:9; Maakaꞌ 10:11-12.