1 Teketa ookara naroꞌariruꞌning daaꞌarira Pailatiꞌanko tavoꞌauꞌ eeꞌnung daurarong Siisaꞌke botovuuꞌnung Judiaꞌnavaro tare-koo. 2 Eeꞌnoko teka teinge tuumpi tutumpauꞌ aaꞌpaama, “Niiꞌke enang daaꞌampiring aung naning nantoong Siisaꞌ bakaang tare-ita onou kentaang-antavurimaung, tee Siisaꞌanko taakisi duaꞌkoo orokovurikooꞌ, eeꞌnoko aaꞌpukooꞌ, ‘Ning tee tero Kumponinge diiꞌ domang-anta-koo maraka-antaruruꞌnung, daurarong pakoꞌpariꞌantamuma.’ ”

3 Eeꞌnoko Pailatiꞌke niaꞌuuꞌ tee, aaꞌpuuꞌ, “Daꞌ ee tee Juꞌnupoong biikaang daurarong?” Eeꞌnoko teie makuꞌuma tee aaꞌpuuꞌ, “Teeꞌ nariꞌ minkueinaꞌ oꞌnong.”

4 Eeꞌnoko Pailatiꞌke teing piristiꞌkoo ovontunanka karikaꞌ ninka nariꞌ aaꞌpuruꞌ, “Ninge kapooꞌ orakaꞌ nkovuing ooampaꞌ aung-koo diiꞌke tuumpi-koo makosi.”

5 Teka teinge eꞌmanai aaꞌpaakoꞌ, “Aunge nantoong Roomaꞌnung daurarong bakaang tanata-ita ketaꞌpariiꞌnaang irikung-antavurimaung nau-antavurima Judiaꞌnameensiꞌ dakaꞌpui, Kaaleliꞌnameensiꞌketa bera aaꞌ amono-koo basivukooꞌ.”

6 Tenang Pailatiꞌke taaravura tee aung kara teie tanaꞌuuꞌ tee Kaaleliꞌnung deekoꞌ. 7 Eeꞌnoko tenang teie Pailatiꞌke Kaaleliꞌnung noruꞌura, teie Jiisuuꞌ Eerotiꞌanko botovurioꞌ beꞌantavauꞌ, tee Siisaꞌke Kaaleliꞌnavaro tarenara deeng-antavuuꞌnung-anko, aiꞌ Eerotiꞌ Kaaleliꞌketa Jerusalemaꞌ beeroꞌui otokoꞌnung tee paroro oo-koo.

8 Tenang Eerotiꞌke Jiisuuꞌ oovura aaꞌnaꞌ dotuaruꞌ pankaroong oo-koo piavokoꞌnung-koo nantoonge minkuaako taaravukoꞌnooꞌka tee. Eeꞌnoko teie niiꞌning taaꞌniꞌanta iriꞌpoꞌning nkovuko deekoꞌ oovuuꞌnaang piavouꞌ. 9 Teeꞌkoo Eerotiꞌke pankapankaroonge nianiaꞌ niaꞌuuꞌ, teka Jiisuuꞌke niiꞌnauꞌ makuꞌevuaꞌ. 10 Teketa piristiꞌkoo ovontung eeꞌnoko boto naunukai teke donkonai iriꞌoroitaaꞌnange tuumpiaakoꞌ. 11 Eeꞌnoko Eerotiꞌ ninka bakaning piatooronukai uriꞌnarimpaama orakaꞌ nkoaakoꞌ akapeuꞌaama, teketa nepuꞌnaꞌ mononopaꞌ booꞌantananka tee-koo daurarong-pinaꞌ kurumpaara Eerotiꞌke toro-antavuuꞌ Pailatiꞌanko. 12 Eeꞌnoko teꞌmung eeꞌnaꞌmung Eerotiꞌ naanka Pailatiꞌ napoꞌ navueeretuꞌ temuꞌketa tee turampeerekoꞌnaanka.

13 Teketa Pailatiꞌke piristiꞌkoo ovontung, tare-nupoong eeꞌnoko nantoong naroꞌurira aaꞌpuruꞌ, 14 “Diiꞌke tee aung naning ning-anko tavoꞌering daurarong Siisaꞌ bakaang tare-ita nantoong onou kentaang-antavurimaung tamperima. Tee-koo ee aing, ninge diiꞌkoo uroꞌkanooꞌka baakeeneama kapooꞌ diiꞌke tuumpierimaing-koo narung ooampaꞌ. 15 Eerotiꞌke teeꞌke, niiꞌanko toro-antavuing-koo noruꞌampiringe kapooꞌ oovuaꞌ. Ooveriko, kapooꞌ aung booꞌanta-koo makosi aunge nkovuaꞌ. 16 Ninge muraꞌke kiimata-antavamira niikaang toomo siompansitaaꞌ siꞌantarerompiaing.” 17 Tee tee toomo ookara mareꞌ kante Baariꞌkoong˜ Paroro-koo Pailatiꞌke tee narung kiimatanuka-koo kiimata-ita simpiriꞌantaevurikoꞌ nantoong piavoroko. 18 Teka ookarai nariꞌ bokiaama aaꞌpauꞌ, “Booꞌantaveainung tee aung naning, eeꞌnoko Barabas sing-antaveai niiꞌanko.” 19 Barabas tee naning kiimata-koo sipauꞌnung Siisaꞌ bakaang tanata totoꞌkoo tavuꞌ tutumpuioꞌ Jerusalemaꞌkoo meuꞌke eeꞌnoko naning dupisiꞌuuꞌ.

20-21 Pailatiꞌke Jiisuuꞌ simpiriꞌanta-koo piavora napoꞌ niiꞌnamuꞌ daankivuruꞌ, teka teinge bokiaama aaꞌpauꞌ, “Aaꞌbarataꞌkoo, aaꞌbarataꞌkoo taakaveai!”

22 Napoꞌ beemuꞌpinaꞌ teie aaꞌpuruꞌ teing, “Aming-koo? Aming orara kapooꞌ nkovuinge? Ninge aung-koo orooꞌ aung booꞌanta-koo makosinooꞌ ooampaꞌ. Teeꞌkoo ninge kiimata-antavamira simpiriꞌantavamaꞌnaang.” 23 Teka teinge aaꞌnaꞌ deravariri bokiaama aaꞌbarataꞌkoo taakavaavaꞌnaang tampaakoꞌ. 24 Eeꞌnoko baruꞌ aaꞌnaꞌ bokiaako teeꞌkoo Pailatiꞌke tauraꞌpuma boto sipuuꞌ kapooꞌ piavorouꞌnaꞌ nkoaraaꞌnaang. 25 Teketa teie bake-antavuuꞌ tee naning kiimata-koo sipauꞌnung Siisaꞌ bakaang tanata totoꞌkoo tavuꞌ tutumpuioꞌ eeꞌnoko naning dupisiꞌuioꞌ, tee eeꞌnara teing eentavaarikoꞌnung, eeꞌnoko Jiisuuꞌ teing biikaang bireng-koo sipuuꞌ.

26 Eeꞌnoko teinge Jiisuuꞌ tuutunantoma-ita tenkeng-antavaama aaꞌbarataꞌ poruꞌantavauꞌ. Teketa mankiꞌoi nkavuko naning poraꞌketa poko kompauꞌ miring Saimoniꞌ, Sairini-nung, eeꞌnoko teinge tee aaꞌbarataꞌ tee-koo poruꞌantavauꞌ Jiisuuꞌkoo damaꞌdue nkavuuꞌnaang.

27 Eeꞌnoko teketa nantoong karikaꞌke siompauꞌ, eeꞌnoko niiꞌning manikuꞌke nariꞌ orarunsiariri birompaama tee siompauꞌ. 28 Teka Jiisuuꞌ teing-aape bereꞌarara aaꞌpuruꞌ, “Diiꞌ manikuꞌ Jerusalemaꞌnupoong, ning biromeriaukaꞌ, teka diiꞌka birontariai eeꞌnoko diurukaaꞌ toireꞌ birompererima. 29 Aiꞌ, ee aing, doonanka pomaang ookara mankiꞌoroainang, baruꞌ teing biurukaaꞌpoꞌnupoong biurukaaꞌ baikeaariko orarunsiariaining. 30 Eeꞌnoko tenang baiarima aaꞌpaavai, ‘Iuꞌnanka niiꞌkoo dau duaꞌdariai eeꞌnoko miinankai dakaꞌmereriai.’ 31 Ning naning tampara eeꞌ kiimatamaako oomerira tasiꞌperiaing diiꞌ aaꞌnaꞌ dau basinooꞌ toraꞌantaraariaing kiimata-koo makosinuka deentariko.”

32 Niiꞌnaanka kenaankara oraanka teeꞌ nariꞌ beꞌantavaaretuꞌ tee ninka nariꞌ dupisiꞌaareeꞌnaang. 33 Eeꞌnoko tenang teꞌ basiarira Makupiꞌ tampaamanooꞌ teka tee aaꞌbarataꞌkoo taakavauꞌ, eeꞌnoko tenaanka oraanka nariꞌ, narung tampavine-aape eeꞌnoko narung mareꞌaanavine-aape. 34 Eeꞌnoko Jiisuuꞌke aaꞌpuuꞌ, “Mmaꞌ tontaꞌantaveriaing teing, aiꞌ teinge tee noruꞌaavaꞌ nkoaamang tee aung kapooꞌ.” Eeꞌnoko teinge piatooronukai deikooꞌeema bakaang mononopaꞌ tankaampeuꞌ.

35 Eeꞌnoko nantoong tee-ankoi dueꞌke donkonai ooai otokoꞌ, eeꞌnoko ovontunge akapeuꞌaakoꞌ tee aaꞌpaama, “Aunge tee nantoong oovuning domaang mooꞌurikooꞌ, enang baka mooꞌaravai, aung Kumponinge Pakoꞌpariꞌniiꞌ, tero niiꞌ domang-anta-koo maraka-antamuruꞌnung deekoꞌ.”

36 Eeꞌnoko napoꞌ teke tee narunge dariraari eeꞌ oroꞌ beemuꞌpie daariauꞌ tee-koo boreꞌkanooꞌke:

AUNG TEE JUꞌNUPOONG BIIKAANG DAURARONG;

39 Narunge tenaanka-koo oraanka-koo nariꞌ biꞌaaretuꞌnaanka-koo Jiisuuꞌ orakaꞌ minkuvuma aaꞌpuuꞌ, “Daꞌ ee tee Domang-anta Kumponinge tero Pakoꞌpariꞌniiꞌ deeaꞌ? Enang daka domaang mooꞌdaravai, eeꞌnoko neeꞌ nariꞌ mooꞌmereai.” 40 Teka teie niiꞌnunge tee akaꞌpuma aaꞌpuuꞌ, “Daꞌ ee Kumponing-koo aroreaꞌ otong eeꞌ nariꞌ booꞌaape oꞌnoritaaꞌ? 41 Neeꞌke tee makosinaꞌ toraꞌpampemang meroꞌkoo nkoampemaing-koo, teka aunge kapooꞌ orara nkovuaꞌ.” 42 Eeꞌnoko teie aaꞌpuuꞌ Jiisuuꞌ, “Norunoruꞌmeai ning tenang dakaang muuꞌ taaꞌniꞌdoi kompema.” 43 Eeꞌnoko Jiisuuꞌke aaꞌpuuꞌ tee, “Masikaꞌ ninge nauramaang daꞌ, eꞌmung eeꞌnaꞌmung niꞌninka nariꞌ oꞌnoreeꞌnaang daꞌ osi tampooꞌke˜.”

44 Enang tee duaakiꞌuko duaaꞌ namuꞌke kaꞌmuruntaꞌuuꞌ ookutunairu-koo bera kamunooꞌnang deekoꞌ duaaꞌ kooꞌuuꞌ. 45 Tenang duaaꞌ mutaanampuioꞌ tee baarong pava dootuuꞌnava pankava-koong, meekavaro kuꞌnung, meuꞌ keꞌmeꞌaruꞌ. 46 Eeꞌnoko Jiisuuꞌ aaꞌnaꞌ deto bokuma aaꞌpuuꞌ, “Mmaꞌ ee, nkaang tanuaang dakaang bireng-koo sipansing.” Eeꞌnoko teeꞌ minkuvuma asiꞌnamuꞌ domaang oparuꞌ.

47 Teketa enang teie piatooro daakuꞌ tarenunge tee aung kapooꞌ nkoaruꞌnung oovura teie Kumponing pankaing-antavuuꞌ aaꞌpuma, “Masikaꞌ, tee aung naning tee orakaꞌnko otoꞌevuaung.” 48 Eeꞌnoko ookara karikaꞌ teꞌ naroꞌariruꞌning dooroariiꞌnaang tenang ookara kapooꞌ nkoaruꞌnung-koo osi-aape toroariruꞌ orarunsiariri domang tavarima. 49 Eeꞌnoko ookarai Jiisuuꞌ noruꞌaakoꞌninge, eeꞌnoko manikuꞌ Kaaleliꞌketa siompauꞌning nariꞌ, teinge isipoꞌ donkonai ooauꞌ tee kapooꞌnanka.

50 Enang tee naning narung otokoꞌ miring Josepaꞌ, Arimateaꞌnamono-koong, Juꞌnupoong biikaning-koo osi-koo namono. Aung Josepaꞌ tee narung koompaaraꞌnavitu-koong pankaing, naning tampara, koontoꞌ, eeꞌnoko nemparakoꞌnung Kumponing bakaang muuꞌ oo-koo; 51 Bane teie koompaaraꞌnavitu-koong narung, nka Jiisuuꞌ dupisiꞌaavaꞌnaang minkuaako tee kontevouꞌ. 52 Teie eeꞌnunge Pailatiꞌanko bera Jiisuuꞌ bakaang mono eentavuuꞌ. 53 Eeꞌnoko aaꞌbarataꞌketa sing-antavura baaronge booꞌnuka daiꞌnaꞌ daiꞌuma nopaꞌura sipuuꞌ teie kuvi dakoꞌdoma-koo kuung, aaꞌnooꞌ kapang-koo nenkeꞌuuꞌnareng, naning tutung dakoꞌaavaꞌnareng. 54 Tee tee teꞌmung Doong Uaanaꞌmung-koo maamunaꞌmung eeꞌnoko tee Doong Uaanaꞌmung dueꞌui otoko namuꞌke dakoꞌauꞌ.*Tenang duaaꞌ tumparako doong maamunaꞌmung-koo tee Doong Uaanaꞌmung tutumparakoꞌnung. Josepaꞌ Arimateaꞌnung eeꞌnoko Nikodemasi iriꞌnarumpuresi dakoꞌuretuꞌ tee Jiisuuꞌ, Doong Uaanaꞌmung orarivureꞌneeng-koo. 55 Eeꞌnoko teinge manikuꞌke Kaaleliꞌketa Jiisuuꞌ ninka porouꞌninge Josepaꞌkoo biꞌariri berora tee kuvi dakoꞌdoma ooauꞌ eeꞌnoko Jiisuuꞌ bakaang mono bempauꞌnaꞌ ooauꞌ. 56 Teketa tee osi duparira duuninanka numpompoꞌning maamu-antavauꞌ bakaang mono sisiꞌkoo, eeꞌnoko teꞌmung Doong Uaanaꞌmung tee uaavoroi otorouꞌ botoi minkuvui otoinaꞌ.