4
Sietaniꞌke Jiisuuꞌ Paaravuuꞌnaꞌ
(Mak 1:12-13; Luk 4:1-13)
1 Teketa teie Tanuaang Meekunge tee Jiisuuꞌ meeꞌboraꞌ sirakamaaꞌkoo beꞌantavuuꞌ Sietaniꞌke dauaꞌuuꞌnaang teka. 2 Teke taamanuaꞌ otouꞌ karenaumo kivora doong eeꞌnoko karenaumo kivora muung-koo. Eeꞌnoko teing doong oparuꞌnooꞌke tee peeravouꞌ. 3 Eeꞌnoko teie dauaꞌbaukoi pora aaꞌpuuꞌ tee Jiisuuꞌ, “Daꞌ Kumponing Bauring deekoꞌ aing kapananka naueriko taamananka deempariaing.”
4 Eeꞌnoko Jiisuuꞌke makuꞌuma aaꞌpuuꞌ, “A, tee Daari Meekung-koo eeꞌ daariari otong,
‘Naning taamang narunge domampari otoaung, teka ookara kara Kumponing-etaning siompui domampari otomaung.’ ” (Boto 8:3)
5 Teketa napoꞌ Sietaniꞌke Jerusalemaꞌaape, teꞌ Meekamono-koo beꞌantavuuꞌ tee Jiisuuꞌ, eeꞌnoko aꞌdeiꞌ pava dootuuꞌnava pankava-koo miiraka-koo panteꞌantavura aaꞌpuuꞌ, 6 “Daꞌ Kumponing bauring deekoꞌ doonko toꞌdiꞌdaravaing, tampaꞌ duaꞌdarako masikaꞌantaraavainaꞌ, aiꞌ Daari Meekung-koo eeꞌ daariari otong,
‘Teie bakaning koosinunanka botovuriaing daꞌ paku-koo. Teinge biikaning birenge deto doontaavaing kapang-koo kauꞌ naapuraraꞌneeng-koo.’ ” (Kena 91:11-12)
7 Teka Jiisuuꞌke makuꞌuma aaꞌpuuꞌ tee, “A, Daari Meekung-koo napoꞌ eeꞌ daariari otong,
‘Diiꞌke tee Ovoring diikaang Kumponing parapaara-koo siperiaukaꞌ.’ ” (Boto 6:16)
8 Teketa napoꞌ Sietaniꞌke Jiisuuꞌ aꞌdeiꞌ iuꞌkoo isikung-koo koing-antavura ookara muuꞌnanka kansiꞌkoo tampaꞌ oroꞌnanka oo-antavuuꞌ. 9 Eeꞌnoko Sietaniꞌke aaꞌpuuꞌ, “Aing ookara ninge oko-antarampeuꞌ daꞌ ning-koo miinge keentarara dootuuꞌmei dei.”
10 Teketa Jiisuuꞌke aaꞌpuuꞌ tee, “Tokoi tenkeniai daꞌ Sietaniꞌ ning-ankoita, aiꞌ Daari Meekung-koo eeꞌ daariari otong,
‘Diiꞌke Ovoring diikaang Kumponing narung dootuuꞌeriaing, eeꞌnoko niiꞌnung siomperiaꞌ otoriai.’ ” (Boto 6:13)
11 Teketa tenang Sietaniꞌke sipura beko tee, koosinunankai porora puring-antavauꞌ.
Jiisuuꞌke Bakaang Nko-nko Kaaleliꞌke Tutumpuuꞌnaꞌ
(Mak 1:14-15; Luk 4:14-15)
12 Tenang batei-koo Eerotiꞌke Jooni Minkinarai kiimatanava-koo daiꞌura sipuuꞌ. Eeꞌnoko Jiisuuꞌke tee taaravura tee Kaaleliꞌnameng-aape*Temeng Eerotiꞌ tarevukoꞌnameng. toroaruꞌ. 13 Teka Nasaretiꞌ sipura Kapaneumeꞌnavuntuꞌkoo otouꞌ teꞌ eeꞌnooꞌ teꞌ nuaruꞌ dueꞌ Sebulon-namuuꞌ eeꞌnoko Napitalai-namuuꞌ biikanameng-koonooꞌ. 14 Teeꞌ biikanameng-koo beioꞌ tee kara teie nakaronara temuꞌnunge Aisaiaꞌke minkuvuuꞌnung dupearuꞌ Daari Meekung-koo aaꞌpuuꞌnooꞌka,
15 “Teinge nantoonge mutaananooꞌ otoromainge pankaing araka ooaavaing teinge Sebulon eeꞌnoko Napitalai beekanavaro-kooninge, teꞌ ookamenta-koo otoromanooꞌ aaꞌnoko pirung-aape danto eeꞌnoko Jooꞌdani-nari-eta eeꞌdaanto, teꞌ eeꞌnooꞌ Kaaleliꞌ, Juꞌdeeaing Biikanooꞌ.
16 Teing eeꞌning teꞌ booꞌke anivumanameng-koo otoromaing arakai taneꞌpuriaing.” (Aisaiaꞌ 9:1-2)
Jiisuuꞌke Nantoong Kumponing-koo Tampaꞌ Doorevuruꞌnaꞌ Taare-antavurima
(4:17–9:34)
Jiisuuꞌke Bakaning-koo Tutunaꞌning Karenaumo Bokuvuruꞌnaꞌ
(Mak 1:16-20; Luk 5:1-11)
17 Eeꞌnoko tenang-eta deto Jiisuuꞌke daankinang tutumpuuꞌ aaꞌpuma, “Bereꞌdariai paninung muuꞌkoo tuntariainaꞌ, aiꞌ tee muuꞌ tee enang dueꞌ poing.”
18 Eeꞌnoko teketa Jiisuuꞌ Kaaleliꞌnaruꞌkoo miiringe nanuma teie kemaintara teka oovuretuꞌ aaꞌnoko Saimoniꞌ tee niiꞌnooꞌke Piita, eeꞌnoko tee Aanduruꞌ, baaraꞌmaꞌnung, sionung duaꞌureko teruꞌkoo, aiꞌ temainta tee taviꞌ baranka. 19 Eeꞌnoko Jiisuuꞌke aaꞌpuretuꞌ, “Poreta ning siomereai, nantoong baranka deeng-antarampeainaꞌ.” 20 Eeꞌnoko namuꞌke tee beekaang sionung sipureta Jiisuuꞌ siompuretuꞌ.
21 Teketa napoꞌ nanuma niiꞌnamainta oovuretuꞌ miring Jeemisi namainta Jooni, Siebedi baurinketa, bakaasi-koo beuma ninka otoroko, Siebedi ninka, biikaang sionung pateꞌaama. Teketa Jiisuuꞌke temainta bokuvuretuꞌ. 22 Eeꞌnoko namuꞌke temaintai biikaang bakaasi eeꞌnoko tee beuma sipureta Jiisuuꞌ siompuretuꞌ.
Jiisuuꞌke Aining Nkovukoꞌnaꞌ Daankinang Eeꞌnoko Taare-anta
(Luk 6:17-19)
23 Jiisuuꞌke tee ootukunairue Kaaleliꞌke nanuma nau-antavuruꞌ nantoong pava dootuuꞌnanka biikaning-koo. Nau-antavurima daankivukoꞌ tee doorenang tampara Kumponing bakaang muuꞌkoong, eeꞌnoko taare-antavurikoꞌ nantoong siipa amutemuriiꞌpoꞌnupoong. 24 Eeꞌnoko doorenang tee-koong Siiria-namenge nanuꞌantavauꞌ, eeꞌnoko teketa ookara siipa amutemuriiꞌpoꞌnupoong tavoꞌaaruꞌ tee-anko, sisikeerai toraꞌantavurikoꞌning, maꞌnarie koriaarikoꞌning, kookoko˜poꞌnupoong, eeꞌnoko dootanuka, eeꞌnoko teꞌ poꞌantavaariko taare-antavurikoꞌ. 25 Eeꞌnoko nantoong karingai aaꞌning-eta Jiisuuꞌ siompai nanaakoꞌ, Kaaleliꞌnupoong, Dekapolis-navete-nupoong, Jerusalemaꞌnupoong, Judiaꞌnavete-nupoong, eeꞌnoko ookara Jooꞌdani-nari-koo aveteraang-nupoong.