1 Asiꞌnooꞌka ee mmaikoriꞌ aaꞌdampimang, Ovoring-koo doturoturarimatoaing.

Aung tee kara anaare napoꞌ unampama daariamatomaung ninge daari-koo poreꞌ deeaꞌ eeꞌnoko diiꞌ tampaꞌ koono-koonge. 2 Teeꞌ eeꞌ: Tarerariri otorimaatoai teing-koo nantoong-koo Juꞌ biikanaꞌ dootuuꞌ koong taaꞌniꞌanta kong-koo eturaarimaing-koo, aiꞌ teing nkaunanka makosinanka, kapooꞌ oreng nkoaama mono-nameng-koong taaꞌniꞌantai daang meekaꞌparimaing dopaꞌ napuꞌ dovang nkoarima. 3 Teka niiꞌ eeꞌning Kumponing bakaning masikeng-pinaꞌ taaꞌniꞌantaniiꞌnuka, bakaang Tanuaang ninka dootuuꞌmarimaing Jiisuuꞌ Karistooꞌ baitoampiri daangampampima, mono bakanameng-koo arooꞌ oꞌnoriaꞌ.*Teeꞌ teie taaꞌniꞌantai dopaꞌtotoꞌkoonge miruꞌui otoinaꞌ. 4 Mono bakanameng-koo arooꞌ oꞌnoi dei ning makosi avitoitoi-koo biivimarapeuꞌ, eeꞌnoko napoꞌ niiꞌnung naning mono-aapenameng-koo biivimparamaung deekoꞌ ning puruꞌmuarupeuꞌ. 5 Aiꞌ ning tee naning meekung taaꞌniꞌantaniiꞌ dopaꞌ totoꞌmauꞌnung-koo ˜beenang-taa doong tankinuioꞌ pontoꞌmaruꞌnooꞌketa. Eeꞌnoko ning bakei Isireeli-nupoong-koo narung, Kumponing bakaning-koo, teing Bensimani bakanaving-koo kuunge pontoꞌmarara. Napoꞌ biikaang kara eeꞌnoko aarumo kompansi oꞌnong, Iiburunaꞌ. Eeꞌnoko boto sionameng-koo ning tee Boto Keperuuꞌnavitu-koo narung aaꞌnung. 6 Napoꞌ toomo-nameng donkompansi ning tee iriꞌmoi dootuuꞌnupoong mankiꞌantavarankoꞌnunge. Eeꞌnoko koompari otoꞌnairu-koo ning naninge tuumpimupeuꞌnooꞌ otoaꞌ.

7 Teka teing aing kapooꞌnanka tero ning puring-antananka-pinaꞌ noruꞌankoꞌning enang teing tamunsiꞌning noruꞌansira duaꞌarantuꞌning ookara, Karistooꞌ narung-koo noruꞌ sipamira. 8 Eeꞌnoko teing naing deeaꞌ, ookara kapooꞌnanka daang-antavaramira opansi duaꞌarantuꞌ nung tee kapooꞌ pankaing masikung kompamaꞌnaang. Tee nkaang Ovoring Jiisuuꞌ Karistooꞌ noruꞌkoo piamora tee bakaang miring-koo ookara kapooꞌnanka damaꞌduarantuꞌ tamunsiꞌning tampamira, tee Karistooꞌ nkateemaꞌnaang. 9 Eeꞌnoko ning tee-koo kuung oꞌnoi pinkaꞌmaravai Kumponinge ning naning koontoꞌ tammuuꞌnaang, boto siompama ninka koomarioꞌ deeaꞌ, teka Karistooꞌ masikaꞌantavansioꞌ. Aiꞌ Kumponing ninka koompari otoꞌ tee Kumponing-eta nka-koo miruꞌniiꞌ, eeꞌna baito narunge nka-koo makosi. 10 Ning tee Karistooꞌ bakei aaꞌnaꞌ noruꞌkoo piamoi oꞌnong eeꞌnoko tee bakaang iriꞌ tee domang-antavuuꞌnung; napoꞌ tee baike teie kompuuꞌnung teeꞌ nariꞌ kompampainge; 11 Eeꞌnoko booꞌkoo teeꞌ moompai tee-pinaꞌ, damaꞌke booꞌketa daaꞌmaravainaꞌ piamora teeꞌ naumuruꞌnaꞌ.

12 Ning aaꞌmaravarooꞌnang, “Ning teeꞌ Karistooꞌpinaꞌ dupearioꞌ kompansing ookara aarumo.” Otoaꞌ. Ning mmeꞌ makotumpaꞌ. Teka ning aaꞌnaꞌ keviꞌmaramatoaing temuriiꞌ aarumo okomuuꞌnaang Jiisuuꞌke ning okovui miruꞌmuuꞌnaꞌ. 13 Ee mmaikoriꞌ, ninge tee tero nkavantuꞌnung-pinaꞌ noruꞌampaꞌ, teka aung kapooꞌ narung ninge nkoampaing: Teing kapooꞌnanka damaꞌduaransining ampaꞌmora kapooꞌ uroꞌkanooꞌke otoing keviꞌama mintoomari oꞌnoaing bera booꞌke basi, nkavamaꞌnaang tee mooꞌ. 14 Tee mooꞌ tee aung eeꞌ oroꞌ: Kumponinge Jiisuuꞌ Karistooꞌ karantavuko˜ aꞌdeiꞌ beꞌkoo bokumuaing ning.

15 Enang tee niiꞌ ookara tanuaang nameng-koo petaaꞌnuka tee teeꞌ nariꞌ noruꞌmariaing. 16 Eeꞌnoko diiꞌkoo niiꞌninge oovunaꞌ noruꞌeriko deekoꞌ, tee Kumponinge diiꞌkoo sirakaꞌantavuaing bakaang kara-koo noruꞌerimanooꞌ tampaꞌ nariꞌ siomperimatoaing deekoꞌ. 17 Ee mmaikoriꞌ, teeꞌ nariꞌ otoritaaꞌ ning oꞌnomanaꞌ otoriaing eeꞌnoko napoꞌ teing ninge nauarantuꞌnaꞌ otoromaing-koo barerariri otorimaatoai. 18 Aiꞌ aung tee mmauꞌnamuꞌpie teroita naurampikoꞌnaꞌ eeꞌnoko enang teeꞌ nariꞌ piaarampima taꞌdu ninka unampansi aaꞌdampimang: Mmauꞌ nantoong dootuuꞌnupoong teing turaniꞌnuka-pinaꞌ otorong teeꞌ Karistooꞌ aaꞌbarataꞌkoo bouꞌnaꞌ siong-koo. 19 Aiꞌ teing teing biikaang kumponing-pinaꞌ noruꞌ tee biikaang mono bakaang pia narung, kapooꞌnanka maimaiaꞌarimaing, eeꞌnoko biikaang noruꞌ kapooꞌnanka kansiꞌkooning-koo otokooꞌ. Teeꞌ nkoarima mosianung-aape otorong. 20 Teka niiꞌ niikanooꞌ osi teꞌ paning. Eeꞌnoko niiꞌ teing tee niikaang Domang-anta tee Jiisuuꞌ Karistooꞌ teketa poaing domange etuvuko nempampiri oꞌnorining. 21 Eeꞌnoko pora teie tee aung niikaang kansiꞌkoong mononanka aruaruꞌ paari-antamuriaing bakaang mono meenasi-poꞌnung-pinaꞌ oroꞌantamurima teie iriꞌke ookara kapooꞌnanka bakaang tanata-koo kuung siꞌkoo makosi-antavuuꞌnunge.