1 Teketa napoꞌ teie Kampiai ˜kenaanka-taa-nung pinkapinkaꞌ kaapeꞌuko ookara kapooꞌ paning-koo okiꞌnooꞌ kaꞌduuariruꞌ namarang aua-pinaꞌ. 2 Teketa ˜kenaanka-taa koosinung ooarantuꞌ Kumponing-koo uroꞌkanooꞌke donkonai otoromaing, eeꞌnoko teinge tuuviri ˜kerenta-taa nkavauꞌ. 3 Eeꞌnoko napoꞌ niiꞌnung koosinung kooro-koong tapeng kompui pora boonturoma donkonuuꞌ. Eeꞌnoko tee kanteng tampaꞌ nuuraaꞌ mmauꞌ avauꞌ pitu-koo teing ninka kunsinanka ookara nantoong meekupoong biikaang ninka nariꞌ boontunamparaaꞌnaang teke kooro-koo nkoniiꞌnooꞌke boonturomai, ovorimpari baꞌnavaꞌnaniꞌdoma-koo uroꞌkanooꞌke. 4 Eeꞌnoko tee kanteng paroꞌuioꞌ teꞌ ninka ii-nooꞌ kunsinanka ninka kompeereta teing meekupoong biikaang ninka deto daaꞌaruꞌ Kumponing-anko koosinung-koong bireng-eta. 5 Teketa teie koosinunge tee tapeng nkavura ntaꞌke maantoꞌantavuuꞌ boonturoma-ita nkavuuꞌnunge, eeꞌnoko terempoꞌ kansiꞌaape baiꞌuuꞌ, teketa aaꞌnouꞌ pipirakai kurung-kurung ninininimpuma uꞌmiꞌ nkoaruꞌ.

6 Teketa tenang teing ˜kenaanka-taa koosinung teing tuuviri puumpaavaꞌnaang maamuariruꞌ. 7 Eeꞌnoko tutunaꞌnunge bakanareng tuuviri puumpuko apoꞌ kamaarie moomparama kapang kaaꞌomanaꞌ kaaꞌora kansiꞌkoo doonko tumputumpurunang duaꞌaruꞌ eeꞌnoko napoꞌ ntaꞌ erenge mavoꞌ teeꞌ nariꞌ kansiꞌkoo duaꞌaruꞌ. Eeꞌnoko kansiꞌkoo beevorai navoraꞌ taivuuꞌ, koiꞌnanka-koo beevorai-koo navoraꞌkooning taivuuꞌ, napoꞌ ookara baaꞌ okiꞌnarekaꞌ taivuruꞌ.

8 Teketa napoꞌ kenaanka-nung koosinunge bakanareng tuuviri puumpuuꞌ, eeꞌnoko kapooꞌ iuꞌ pankaing-pinaꞌ oroꞌ ntaꞌke taivuko pirung-koo duaꞌaruꞌ. Eeꞌnoko pirung-koo beeruꞌpi naruꞌ ereng narung deemparuꞌ. 9 Eeꞌnoko kapooꞌ pirung-koo domampariri otoromaing-koo beemantori-koo namanto boorouꞌ, eeꞌnoko aarerinanka-koo beemantori namanto ntaꞌke taivurira opuruꞌ.

10 Teketa napoꞌ beenaumo-nunge koosinunge bakanareng tuuviri puumpuuꞌ, eeꞌnoko narung beentoꞌ pankaing paning-eta duaꞌaruꞌ, puu-pinaꞌ arakavari ntaꞌke taivuko, eeꞌnoko aaꞌning-koo dau duaꞌaruꞌ: ntong-koo beeriiru-nari-koo eeꞌnoko puꞌantanairu-koo teeꞌ nariꞌ. 11 Tee-koong beentoꞌkoong miring Dopa Tokaaꞌ. Teketa teing ntonanka beentoꞌ duaꞌaruꞌning tokaaꞌ doparopa-poꞌnung deemparioꞌ nantoong mmauꞌke naiaama booꞌpariruꞌ.

12 Teketa napoꞌ karenaumo-nunge koosinunge bakanareng tuuviri puumpuuꞌ eeꞌnoko aaꞌnouꞌ: duaaꞌkoo okiꞌnameng paparovuuꞌ, napoꞌ kaara-koo okiꞌnameng paparovuuꞌ, eeꞌnoko beentoꞌnanka-koo niiꞌnamanto*Beemantori-koo namanto-kooning, (1/3). paparovuruꞌ. Eeꞌnoko aaꞌnouꞌ: teꞌmung doong apukaꞌparuꞌ. Napoꞌ teꞌmung muunga teeꞌ, beentoꞌnanka-ita kaara okiꞌnameng-koo araka otoaruuꞌ.

13 Teketa napoꞌ ooama narung mareoiꞌ aaꞌnaꞌ karoma auviꞌaue puraanuma aaꞌpuko taaravantuꞌ, “Oi, oi, bakaꞌ, bakaꞌ piaaruꞌnuka kansiꞌkoo otoromaatomaing. Teinge asiꞌninge beenaumoi koosinunankai biikaning tuuviri puumpaako teing-koo bakei sisikeera pankaing tavoꞌaraaꞌnaang.”