1 Teketa tee napoꞌ ooama ning-koo dutakanooꞌka tee Kampia Saioni-namii-koo donkonuioꞌ ooantuꞌ tee ninka nariꞌ teing narung daakuꞌketa karenaumo kivora-eta karenaumo kokoreiꞌ [144,000] donkonaioꞌ. Eeꞌnoko tee bakaang miring eeꞌnoko Bauma-koong miring daariniiꞌnuka biikaang oing-koo. 2 Eeꞌnoko teketa napoꞌ aurong paning-eta karoko taaravantuꞌ ntonanka-pinaꞌ aaꞌnaꞌ uutuarako napoꞌ kurunkurung-pinaꞌ aaꞌnaꞌ karoko, eeꞌnoko tee auronanka nepuꞌnaꞌ tampaꞌ taaravankoꞌ nantoonge kiitananka kopiꞌaako karopeuꞌnaꞌ karoko. 3 Eeꞌnoko tee teinge kena nerakung kenavaakoꞌ aaꞌning-koo uroꞌkanooꞌke Kumponing bakanooꞌ baꞌnaniꞌdomai, teing kapooꞌ karenaumo kupaꞌpoꞌning domantoia eeꞌnoko teing ovontung. Niiꞌnung naninge noruꞌuarupeuꞌ tee tevu kena, teinge narung daakuꞌketa karenaumo kivora-eta karenaumo kokoreiꞌ [144,000] nainge deekoꞌ noruꞌai otorong kansiꞌketa mooꞌuruꞌninge. 4 Teing aing teing nantoong manikuꞌ ninka bakiaaꞌkoo domang orariariaꞌ otoromaing. Otootoꞌkoo ootukunung-koo tampaꞌ tanatavariritaaꞌ kiiroraaꞌariri otoromaing. Tee Kampia tee teinge siompai nanaamaung areꞌ tokoo tee bemanooꞌ. Ainooꞌ teing tutunaꞌning ookara nantoong-koo Kumponinge mooꞌuruꞌning-koo. Teing aaꞌnaꞌ meekupoong Kumponing-koo, eeꞌnoko tee Kampia-koo. 5 Biikaang karang-koo naninge tosi minkuaako taaravuarupeuꞌ, napoꞌ kiiroraaꞌnukai.

6 Teketa napoꞌ narung koosinung aanarooꞌke purerenuko ooantuꞌ, tee doorenang tampara otoi otoꞌ kompui daankivuuꞌnaang kansiꞌkoo otoromaing-koo aaꞌning-koo: ookara dopaꞌ amutemuriiꞌ, muuꞌnanka, kara amutemuriiꞌ eeꞌnoko ookara nantoong kansiꞌnupoong. 7 Teke aaꞌnaꞌ bokuma aaꞌpuuꞌ, “Kumponing-koo amaiaaꞌroriai eeꞌnoko meenasie meeꞌnaꞌoi otoꞌ deeng-antaveriai, aiꞌ batei teie nantoong bireꞌkoong dueꞌumaang. Eeꞌnoko tee-koo dootuuꞌdariai aing aaꞌning ookara nkovuruꞌnung-koo: paning eeꞌnoko kansiꞌ, pirung eeꞌnoko ntong okiꞌnarekaꞌ.”

8 Teketa kenaanka-nung koosinunge napoꞌ siompui pouꞌ aaꞌpuma, “Duaꞌaring, duaꞌaring Babiloniꞌnamono, osi pankamono, nantoong ookara kansiꞌkoo-nupoong teruꞌ oraruꞌ uaininaruꞌ nai-antavuruꞌnamono. Tee uaini tee bakaang orara aarumo kaukauro nko-koong.”

9 Teketa napoꞌ beenaumo-nung koosinunge siompuresi damaꞌke poma bokuma aaꞌpuuꞌ, “Baa tee naning tee biiko-koo dootuuꞌaravaing, eeꞌnoko napoꞌ tee-koong bakaang baka-oo-koo, tee toraꞌpuaing, eeꞌnoko napoꞌ tee tee-koong mooꞌdoꞌanta nkavuaing bakaang oing-koo niiꞌnooꞌ bireng-koo. 10 Tee tee Kumponing bakaang uaini naivuaing, tee uaini tee Kumponing bakaang iira toraꞌanta-koong, ntong ninka bereꞌniiꞌ deeaꞌ, tamung teeꞌ otoko purintoꞌ kooꞌniiꞌ tee-koo iira-koong kaapu-koo teie toraꞌanta-koong-koo. Eeꞌnoko tee tee sisikeeravomatoaing tee-koo ntaꞌ kauoori piiko-koong-koo teing-koo koosinunanka meekupoong-koo uroꞌkanooꞌka eeꞌnoko tee napoꞌ Kampia. 11 Eeꞌnoko tee ii teing kiimatanuka taivuriaing-koong tee deto teeꞌ nariꞌ kutekuteivui tuuvui otomatoaing uaa otoaꞌ, doong kante, muung eeꞌnoko doong, teeꞌ nariꞌ. Teing eeꞌning tee-koo biiko-koo eeꞌnoko tee bakaang baka-oo-koo dootuuꞌarimaing eeꞌnoko napoꞌ baata teing bakaang miring-koo mooꞌdoꞌanta nkavauꞌning. 12 Enang tee noruꞌeriaing diiꞌke Kumponing bakaning meekupoonge, kapooꞌ arikananka diiꞌ paararurima tavoꞌkuko tee diiꞌ purintariri miiꞌkiri otoriaing, Kumponing bakaang boto siomperi eeꞌnoko Jiisuuꞌ masikaꞌantaveri.” 13 Teketa napoꞌ narung aurong paning-eta karoko taaravantuꞌ, aaꞌpuko, “Aung kara daarieai, ‘Enang-eta deto tee teing booꞌnuka Ovoring bakaning otoroitaaꞌ booꞌpariruꞌning teing biraankeariaining.’ ” Eeꞌnoko Tanuaang Meekunge makuꞌuma aaꞌpumaung, “Eeꞌ, bakei masikung. Uaavoroainaꞌ teing-eta biikaning iriꞌoꞌnanka. Ookarai aarumoi tampenge nkoauꞌninge tee teing meenaꞌpariri otoroaing.”

14 Teketa napoꞌ ooama ning-koo uroꞌkanooꞌka kamoꞌ kakaara ooantuꞌ, eeꞌnoko tee-koo kamoꞌkoo daue naning narung naning-naumpui baꞌnanui otoko boreꞌkoo baakopo kooro-koong kuruniiꞌ eeꞌnoko birenge narung naipeꞌ irintoꞌ kaiꞌniiꞌ uiteꞌ napuꞌ kompui. 15 Teketa narung koosinunge dootuuꞌnava pankava-ita siarara bokuma tee kamoꞌkoo baꞌnanui otokoꞌnung aaꞌpuuꞌ, “Teie dakaang naipeꞌke nkavera ookara sinananka napuraꞌema kaveai, aiꞌ batei kavuꞌkoong enang makotuing. Ookara sinananka kansiꞌkoong enang petaaꞌoroing.” 16 Teketa tee teie kamoꞌkoo baꞌnanui otokoꞌnunge tee bakaang naipeꞌ kansiꞌkoo toong-antavura namuꞌke ookara sinananka kansiꞌkoonanka kavuruꞌ. 17 Teketa napoꞌ niiꞌnung koosinung dootuuꞌnava pankava paning-koonava-ita siaruꞌ, teie napoꞌ naipeꞌnariꞌ irintoꞌnariꞌ kompui. 18 Eeꞌnoko napoꞌ niiꞌnung koosinung teke boonturoma-ita, ntaꞌ tarevumanooꞌketa pouꞌ. Pora tee naipeꞌ irintoꞌ kompui otokoꞌnung bokuma aaꞌpuuꞌ, “Teie dakaange naipeꞌke ookara uaini-koong sinananka kansiꞌkoong napuraꞌerima kaverira oosieriai, aiꞌ tee sinananka tee enang neetovuring.” 19 Teketa teie koosinunge tee bakaang naipeꞌ kansiꞌkoo toong-antavura ookara uaini-koong sinananka kavurima oosivuruꞌ uaini miiꞌdoma pankaing-koo doonko duaꞌurima Kumponinge iiravoi kankosiꞌuriainooꞌ. 20 Eeꞌnoko osia damaꞌdua teka miiꞌdomaa doonko kankosiꞌuruꞌ, eeꞌnoko ereng taapoꞌ tuuvuuꞌ teketa uainimiiꞌdoma-ita doua-pinaꞌ aaꞌnaꞌ. Eeꞌnoko naninge tankimpuko ukaamauꞌkoo basiarapeuꞌnaꞌ basiaruꞌ. Eeꞌnoko naning nanuma doong ˜keꞌmunta-taae nanura basiarapeuꞌnaꞌ basiaruꞌ.