3
Kumponing Bakaang Maraka-anta Tamung Noruꞌampima Domaang mooꞌmariarupeuꞌ
Aming nkoaravai naning Juꞌkoong deemparako? Dopaꞌ totoꞌke arekeeꞌ, pakuvuai? Eeꞌ, mooꞌ pankaing amutemuriiꞌ otong. Tutuntoma eeꞌ: Juꞌnupoong-koo Kumponinge kinkompuuꞌ bakaang karakara. Kinkompuioꞌ niiꞌninge masikaꞌantavaavaꞌ tee kara. Enang arekeeꞌ, teinge masikaꞌantavai meumpaavaruko Kumponinge koontoꞌ masikaꞌ bampuuꞌnaꞌ nkovuai? Aiꞌ teeꞌ napoꞌ teing-pinaꞌ nariꞌ meuntepaꞌaravai? A, teeꞌ deeaꞌ, bakei! Kumponing tee masikaꞌpari otoaing, bane nantoong ookara tosiariko. Daari Meekunge eeꞌ minkuvui otoinaꞌ,
“Dakaang kara masikung deemparaaꞌnaang tenang daꞌ kareko, eeꞌnoko tuutunantaako boong deempeeꞌnaang.” (Kena 51:4; 62:9)
Niiꞌninge biiꞌka matauarima tee, daang eeꞌ minkuaamaung, “Niiꞌka meuntepaꞌmarimaung-koo Kumponing-koo orakaꞌ otoaꞌ, aiꞌ niiꞌ oreng oomaarima nantoonge Kumponing bireꞌarioꞌ aaꞌnaꞌ tampara ooaako teie niiꞌ kiimata-koo makosi deeaꞌ.” A, tee aaꞌ teeꞌ deeaꞌ, bakei! Ookara nantoong Kumponinge kansiꞌnupoong simpeꞌuriaing kiimatavurima.
Niiꞌnooꞌ naninge aaꞌmupeuꞌ, “Ioꞌ noruꞌeai: Nkaang tosiroꞌke Kumponing pankaing-antavumaung tasiꞌanta-koo Kumponing bakei masikung. Teeꞌkoo ning booꞌkoo miruꞌmuaukaꞌ. Aming-koo potemerimaunge orakaꞌ nko-koo? Tee tee teeꞌ nkomariko kapooꞌ tampara basiarapeuꞌ.” Nka tee teing nantoong temuriiꞌ kara minkuaamaing teing booꞌkoo miruꞌniiꞌnuka teꞌ minkuniiꞌnaꞌ. Niiꞌ Karistooꞌnavitu kara teeꞌ oroꞌ minkuampiaing. Tamung niiꞌninge teeꞌ tuumpimaarimaung.
Ookara Nantoong Bakei Duaꞌarira Tompinisinuka
Enang arekeeꞌ, niiꞌ ee Juꞌnupoong Juꞌdeeaing-koo deu basinuka? Bakei koontoꞌ makotuaꞌ. Ninge tee, tero naurampiring niiꞌ Juꞌnupoong eeꞌnoko Juꞌdeeaing ookara nariꞌ oꞌnoring orakaꞌnkoi naroꞌka kuung deemuri otong. 10 Teeꞌ daariari otoinaꞌ Daari Meekung-koo,
“Naning tampara otoaꞌ, narung duukung otoaꞌ bakei.
11 Narung noruꞌpoꞌnung otoaꞌ Kumponing besiꞌumaung.
12 Ookara damaꞌdu-aape bereꞌariring, orooꞌke nariꞌ beroing. Narung naninge tampaꞌ nkovuaꞌ. Narung duukung otoaꞌ bakei. (Kena 14:1-3; 53:1-3; Norukasiꞌ 7:20)
13 Kara orara biikaang karang-eta tavoꞌaramaung davoru-koong kaꞌmiꞌ kuvi dakoꞌdoma-eta tavoꞌaramanaꞌ. Biikaang meneng tositosi-nko. Biikaang kara boruꞌketaing dopa-pinaꞌ beruuꞌketa tavoꞌarakooꞌ. (Kena 5:9; 104:3)
14 “Biikaang karang barakosiꞌke maantoꞌ naari-anta ninka. (Kena 10:7)
15 Teing dupisiꞌ namuꞌke nkonanka.
16 ‘Taung tooreere navung siompaamaing nantoong orakaꞌ deeꞌantavaarima.
17 ‘Eeꞌnoko mooa-koonavung taung noruꞌaavaꞌ. (Aisaiaꞌ 59:7-8)
18 “Kumponing noruꞌaavarukooꞌ, avoreaavaꞌ.” (Kena 36:1)
19 Teeꞌkoo Kumponinge baruꞌnooꞌ kiimatavuriaing Juꞌnupoong deempariko aiꞌ teing teing makosinuka Kumponing bakaang boto meung-koo, teka meumpaavaꞌ teinge, oreng aarumo orakaꞌnko nkoaama. Niiꞌnung teing-koo aaꞌmaioꞌaravaukaꞌnung. Eeꞌnoko teing naing deeaꞌ, ookara kansiꞌnupoong tee kareaavaukaꞌnung tuumpivuriko Kumponinge. 20 Naning otoaꞌ Kumponing bakaang boto siompuma koontoꞌ tamparavaing, aiꞌ boto tee nantoong ookara oreng tasiꞌanta-koo miruꞌniiꞌ.
Teing Kumponing Masikaꞌantavaamaing Naing Miring Koontoꞌnuka Tang-koong
21 Nka tee enang niiꞌnavung siraꞌparing nantoong koontoꞌnuka deemparipeuꞌnavung Kumponing-ankoi, botoi deeaꞌ. Tevung tevung tero teie botoi eeꞌnoko nakaro-nupoonge nariꞌ minkuauꞌnavung. 22 Eeꞌnoko tee tevung enang siraꞌparinavung eeꞌ oroꞌnavung: Teing Jiisuuꞌ Karistooꞌ masikaꞌantavaamaing Kumponinge koontoꞌnuka tampuriaing, ookara teeꞌ nariꞌ. Tankatankaang otoaꞌ. 23 Aming-koo, ookara nariꞌ orakaꞌ nkoarima kaariꞌarikooꞌ Kumponing bakaang meenasi kong-koo. 24 Nka tee enang niiꞌ ookara naroꞌka koontoꞌnuka tammurining tamung bautaꞌmurima, Jiisuuꞌ Karistooꞌke niikaang kiimata nkavura mooꞌmurioꞌ bakaang erenge. 25 Kumponinge Jiisuuꞌ botovuuꞌ teeꞌ nko-koo ookara-koo dutakanooꞌke tee masikaꞌ antavampiko tee ninka naroong-antamuriiꞌnaang, eeꞌnoko napoꞌ nau-antamuriiꞌnaang tee Kumponing tee aarumo koontoꞌkoo okoraꞌ, aiꞌ tero-nupoonge orakaꞌnko nkoaako tee miiꞌkui tamung doonko oovurikoꞌ kiimatavuriaꞌ Karistooꞌke meroꞌ kompuaing noruꞌuitaaꞌ. 26 Eeꞌnoko niiꞌke enanupoonge tasiꞌpampiiꞌnaang piavoing Kumponing tee aarumo koontoꞌkoo okoraꞌ eeꞌnoko nantoong koontoꞌnuka deeng-anta teing nantoong Jiisuuꞌ masikaꞌantavaavaining.
27 Enang ee niiꞌ daangamaripeuꞌ? Makotuaꞌ. Aming-koo makotuaꞌ? Tee aaꞌ tamung masikaꞌantavampiko koontoꞌnuka tammuruꞌ, tampara nko-nko-koo deeaꞌ. 28 Niiꞌke tee aaꞌpampimaung: Kumponinge naning koontoꞌ tampuma tee bakaang masikaꞌanta oovura teeꞌ tampuaing, bane Moosesi bakaang boto noruꞌuaꞌ. 29 Kumponing ee Juꞌnupoong naing biikaang, eeꞌnoko Juꞌdeeaing ninka nariꞌ deeaꞌ, ee? A, ookara biikaang, aiꞌ tee tee Kumponing narung masikung. 30 Eeꞌnoko tee narung masikung deemparitaaꞌ navunge taunavunge ookamurira koontoꞌnuka tampuriaing teing domampuripeuꞌnung-pinaꞌ masikaꞌantavaako dopaꞌ totoꞌniiꞌnuka eeꞌnoko totoꞌpariaing nariꞌ. 31 Enang ee masikaꞌanta-koo minkuampima boto duaꞌampimang? Otoaꞌ. Boto tee arooꞌampiri minkuampiring.