2
1 No yeno kaŋuya kama uyarenowó, dokoro, newonde surumí pitu ko yunowano, peka. Ŋuro piyimiŋanowó. 2 Asa ye newonde surumí yunowano tiníqo, dani kato neneŋo newondene riní niŋgu-niŋgu teyote ŋu watí yoweya? Uni ŋuko no komo newonde surumí yunanowó ŋu naŋge. Ŋu piyimi. 3 Ŋande ye iŋoteno, ko yeno uyarewano quno ŋuno yendo nori niŋgu-niŋgu naŋge tewano, newonde surumí kama tewano. Ŋu murí ŋuro tero sokome komo nakayáŋoro rewe yeno uyaró. No ŋande iŋoteno, ko no o karo niŋgu-niŋgu tewano tiníqo, ye soso o ŋuro ŋuya niŋgu-niŋgu tewaŋgo. 4 Hamó, sasaro parámi tero newondene quhurí horé tiní yeŋo tendoro sokome ŋu nakayáŋanowó. Sokome ŋuko ye newonde surumí yunowero quro kini. Kini, ŋande ye iŋanowó, ko sokome ŋu weyoro nondo date yeŋo hamó-hamó iŋoro newonde meté parámi yunoyoteno ŋuro iŋoyi tondaŋeweya.* Norendo do sokome karo yaró nore itaka kama iŋoyoteto. Iŋo-iŋo kumimbo ŋande ye iŋoyoteŋgo, ko sokome ŋuko 1 Korin, kumimboko 1 Korin enesó, sokome ŋuro yaró ŋu itaka nore kama towoyoteto.
Uni otete piyimi taró ŋuro quhuríŋo ŋu rotoyi
5 Asa uni kato newonde surumí riní tunoqaró tiníqo, newonde surumí no naŋge kama nunaró. Kini, enendo ye soso peka newonde surumí yunaró, quko ŋuro parámi yewero piyimiŋoteno. 6 Yeŋo huru-huruyemo ye qambu qundo rondaŋero topé piyimi inaŋgurí. Ŋu mepémo. 7 Asa ko quhuríŋo re rotoya newondí rukisoyi qembe. Yate newonde quhurí parámi horé ŋundo uni ŋu riní umbuweya koro. 8 Ŋunde ŋuroko no ŋande yimiroteno, meté newonde meté pitu ko inoyi qembe. 9 Hamó, komo sokome nakayáŋanowó ŋuko ye towo yerewero quro naŋge, asa no mandene soso howero teyowaŋgope, ma kini? 10 Yendo uni karo quhuríŋo re rototeŋgo tiníqo, no ŋuya quhurí ŋu re rototeno. Nondo quhurí ka re rototeno tiníqo, Kristo† “Kristo” ŋuko Yesu naŋge, asa Anutuko rokóŋoní mahero wiri yerete uni parámi horé tunoqaró ŋu. koro toŋímo yeŋomboro o ŋu re rototeno. 11 Nondo ŋunde tewano ŋuko Monimbuko nore kaná yerero taka yereweya koro. Dokoro eneŋo iŋo-iŋoyó ŋuro iŋomukoteto.
Mande kondé keta quro kho uni
12 Asa no Tiroas yendémo ŋuno‡ “Tiroas yendé” ŋuko Esia mirako windi tapémo yoní Masedonia mira windi andusina yora. Kristo ŋuro miti mande§ “miti mande” ŋuko Anutuko Kristo asáŋoní khumoro quhurínanimboro kimo tiní Anutu koya newonde kanata tewero ŋuro mande meté mu naŋge. yesowowero mahenowó, ko Uni Parámimbo neneŋo mako kosoní kho ŋu tanowó. 13 Quko neneŋo newondene muko ime kama yoraró. Dokoro nondo topone Taitus ŋu kama qenenowó. Ŋunde ŋuroko Tiroas yorotoro Masedonia mirako ŋuno mahenowó.
14 Quko Anutu yuŋgunaŋoyoteno, dokoro noreko Kristo quroyómo yoteto, ko naru rokóŋoro Anutuko nore kusi-kusi uni qembe noriní howe uyareyoteto.** Ŋu naruko ŋuno Rom koro kuma unindo uni wini meyowomboya kuma tero taka yerero kusi yerero siyi Rom yendémo ŋuwore uyareŋgurí. Uyariqo, Rom unipareto qenero niŋgu-niŋgu tero anutuye yuŋguna yerero o nuŋgurí meté mu qayi risá nuŋgurí mu oró. Asa Polko ŋuro tapara mande qu ka yaró. Ŋunde tero mandenanimbo Anutu koro murí ŋu, risá nuŋgurí qembe riní mirane-mirane toŋiní unipareto iŋoyi tondaŋeyote. 15 Hamó, noreko uni rambaruru takayoteŋgo quya piyo teyoteŋgo quya keweroyemo Kristo koro risá nuŋgurí mu qembe Anutuko oyote. 16 Asa uni kumi ŋuro risá ŋuko kindo khumowero koro risá qu. Quko uni meyowo ŋuro nuŋgurí ŋuko yoto-yoto koro risá qu. Dani kato kho kiraró ŋunde qu mepémo teweya? 17 Hamó, uni kumimbo noko koro situwiye siyowero quro Anutu koro mandí ŋu yesowoyoteŋgo. Quko noreko ŋunde kini. Kini, norendo hamó tero Anutuko asá yerewí uni qembe Kristo quroyómo Anutu koro toŋímo mande yeyoteto.
*2:4: Norendo do sokome karo yaró nore itaka kama iŋoyoteto. Iŋo-iŋo kumimbo ŋande ye iŋoyoteŋgo, ko sokome ŋuko 1 Korin, kumimboko 1 Korin enesó, sokome ŋuro yaró ŋu itaka nore kama towoyoteto.
†2:10: “Kristo” ŋuko Yesu naŋge, asa Anutuko rokóŋoní mahero wiri yerete uni parámi horé tunoqaró ŋu.
‡2:12: “Tiroas yendé” ŋuko Esia mirako windi tapémo yoní Masedonia mira windi andusina yora.
§2:12: “miti mande” ŋuko Anutuko Kristo asáŋoní khumoro quhurínanimboro kimo tiní Anutu koya newonde kanata tewero ŋuro mande meté mu naŋge.
**2:14: Ŋu naruko ŋuno Rom koro kuma unindo uni wini meyowomboya kuma tero taka yerero kusi yerero siyi Rom yendémo ŋuwore uyareŋgurí. Uyariqo, Rom unipareto qenero niŋgu-niŋgu tero anutuye yuŋguna yerero o nuŋgurí meté mu qayi risá nuŋgurí mu oró. Asa Polko ŋuro tapara mande qu ka yaró.