Yeisu Wasane Dodohobine
Metiu
wana Luluweli
Lihu Dedei
Metiu iye Yeisu wana topadavae hotiya, hidane hotiya hedi te Livai. Veto Metiu wana kaiwo te i howohowo takis bobode heidiye, habeto Yeisu i luwom ge i gon heine (9:9). Hana hao sohode Metiu i ginawi buk ga ya Judiya bobodeidiye kaiwadiye.
Metiu wana buk heine i patoheide te Yeisu iye topapalapu lahine, iye bosowaine i palapuid bobode Helak wana bagalogugui kaiwane. Wana papalapu topadine ta paidi sapta 5 hana had 7, sapta 10, sapta 13, sapta 18 ge sapta 24 hana had 25.
Sohode hedi, Metiu i patoheide Yeisu iye Mesaiya gane Lihu Tuwoi Toyaune hana profet si nga habe i eluwom. I payoumate profet wedi lihu i tabwa tolosuwok Yeisu he wana ginawi hei. Ide “Mesaiya” iye palinge Hibru ideine, lasene he palinge Grik iye te “Keriso.” “Mesaiya” hana sapu te “gane si ligin enunu he pwatane.” Tolomo gane hebe si ligin enunu he pwatane iye hasehase tolomoine. Iyete Metiu i patoheide Yeisu iye Mesaiya. Agegene Judiya si nuwotu tage hebe Mesaiya i luwom, bwen wana bagalogugui bwele i pamidi he panayawi ge bwele i mipakokove Judiya hedi siviye-yan. Yeisu he wana sauge hei Roum bobodeidiye si logugui-yan Judiya habadiye.
Judiya taine si degoru Yeisu heine, bwen si boleu ge si tagakoros-yan. Metiu sapta 21 hana had 27 i lihuyan sahe i youmate wik ga yake ge habe Yeisu si tagakoros-yan. Sapta 28 i waseyan Yeisu wana suwoyuk hedi.
Metiu wana buk i pwamwao te Yeisu i patileid wana topadavae si waseyan hidane wabene bwabwaligane heidiye gen si tabwa wana topadavae (28:19-20).
Yeisu wana Youmate
1
(Sapta 1—2)
Yeisu hana Tubu Lihuine
(Luk 3:23-38)
1 Yeisu Keriso hana tubu lihuine sohode ti ya. Yeisu Keriso iye Deivid tubutubuine, Deivid iye Eibraham tubutubuine.
2 Eibraham natune Aisak,
Aisak natune Jeikob,
Jeikob he-nanatune Juda ge he-hauhavane,
3 Juda he-nanatune Peres ge Jera, tinadiye Tama,
Peres natune Hesron,
Hesron natune Ram,
4 Ram natune Aminadab,
Aminadab natune Nason,
Nason natune Salmon,
5 Salmon natune Bowasa, tinane iye Reihab,
Bowasa natune Obeda, tinane iye Rut,
Obeda natune Jesi,
6 Jesi natune Kin Deivid.
Deivid natune Solomon, tinane gane iye veto Uraiya poniyene,
7 Solomon natune Rehobowam,
Rehobowam natune Abaija,
Abaija natune Asa,
8 Asa natune Jehosefet,
Jehosefet natune Jehoram,
Jehoram natune Usaiya,
9 Usaiya natune Jotem,
Jotem natune Ahas,
Ahas natune Hesekaiya,
10 Hesekaiya natune Manasa,
Manasa natune Eimon,
Eimon natune Josaiya,
11 Josaiya he-nanatune Jehoyasin ge he-hauhavane,
saugeine Babilon si luwom si yawanid Juda ge si yomoteiid Babilon.
12 Si yawanid Juda ge si yomoteiid Babilon he muine:
Jehoyasin natune Seyaltiyel,
Seyaltiyel natune Serababel,
13 Serababel natune Abiud,
Abiud natune Elayakim,
Elayakim natune Eiso,
14 Eiso natune Jeidok,
Jeidok natune Akim,
Akim natune Eliud,
15 Eliud natune Eliyesa,
Eliyesa natune Meitan,
Meitan natune Jeikob,
16 ge Jeikob natune Josep, Meri mwaniyene.
Meri i hab Yeisu, iye ta nga Mesaiya.
17 Iye te heine Eibraham hana had Deivid ta paidi sai ge sai wedi hohoyowate potin (14), Deivid hana had sauge gane si yomoteiid Juda Babilon sai ge sai wedi hohoyowate potin (14), ge sauge ga yake hana had Mesaiya i youmate sai ge sai wedi hohoyowate potin (14).
Yeisu Keriso wana Youmate
(Luk 2:1-7)
18 Yeisu Keriso wana youmate sohode ti ya. Tinane Meri bwaine ge Josep si kaukauwaroru. Taine habe si dehaduwe, si paidi Meri hobak i matabuwon Yayaluwo Gagabubine wana gaisi heine. 19 Josep wana page i dohob ge taine nuwane i depamwadine-yan Meri boda he matadiye, iloke i nuwotu tage wedi kaukauwaroru i elake sumo. 20 I nunuwotu sohode ti yo, habe he wana heneluluwo Guyau wana anelose i youmate heine ge i nga, “Josep, Deivid tubune, tab u ematok u howo Meri poniyem, kaiwane wana matabuwon i luwom Yayaluwo Gagabubine heine. 21 Bwele i hab natune tolomo, ge hidane u tin Yeisu,*Ide “Yeisu” hana sapu i gan iye te “Guyau topamwad.” kaiwane bwele i pwamwadid wana bobode he wedi gegi.”
22 I youmate sohode ti yo, iloke Guyau wana lihu gane profet hotiya i payoumate i tabwa tolosuwok, 23 i nga, “Hehoi tan i delotolomo benan habe i matabuwon ge i hab natune tolomo, iloke hidane si tin Imanuwel.” Imanuwel hana sapu te “Helak iye bwaide.”
24 Sauge Josep i hene suwoyuk, bwen i hadaenge Meri sohode Guyau wana anelose wana lihu heine. 25 Agegene taine bwaine si dehene toyao hana had i hab natune tolomo. Bwen Josep i tin memai hidane Yeisu.