Jondi pepa timeŋ youkuk
Yodakale Mede
Jondi pepa timeŋ i youkuk gineŋ iŋoŋ adi nemek mebi lufomdok youkuk. Timeŋ adi kayoŋbop yehitubulodaune Baŋ Bepaŋ eŋ mihiŋiŋ Jesu Kilisto dut welekubugoŋ tiŋa hatidok. Tiŋa undugoŋ mambip diniŋ mebopdi yalaŋ yeniŋkamandaaŋ yanagilune Bepaŋ mu bikabuneŋdok youyemguk.
Mambip diniŋ mebop heki adi indiŋ yoiŋ. Nemenemek kwetfoloŋ iŋoŋ ikiiŋ hogohogok adi momohi hinek mooŋ. Kaŋ Jesu adi Bepaŋ mihiŋiŋ, unduŋ doktiŋa me hinek mintaaŋ metam indi tiyam unduŋ nemenemek kwetfoloŋ diniŋ dut tuwot mu wooŋ kadiwek. Adi indiŋ yoiŋ. Me nediyeŋ Bepaŋ dut momooŋ hinek hatibe kaŋ nemenemek kwetfoloŋ diniŋ wendok mu nadiluwaak. Unduŋ doktiŋa titiŋ momohi undihi yehikeledok mu nadiyaneeŋ. Unduŋ doktiŋa kayoŋbopdi mede undihidok magi kametnadi mu taneeŋdok Jondi wendok maaŋ yolak. Tiŋa indiŋ yolak. Jesu adi me hinek mintaguk, kaŋ metamdi Jesu nadisukilitimiŋgiŋ. Undugoŋ welehikdi Bepaŋ kahile hinek tiŋa metam noli maaŋ welehikdi yabukahile hinek tiyaneeŋ.
1
Jesu adi mede kabup hakukdi miŋgoŋ mintadakaleguk
1 Koomkwaha tububihit gineŋ tububihila hatitalabuguk, kaŋ magitnikdi nadigumun eŋ daunikdi kagumun, tiŋa didimeniŋgoŋ hinek kaŋ kohonikdi wehemikumun, u mede hatihatinit uŋakoŋ. 2 Hatihati u miŋgoŋ mintadakaleguk kaŋ indi kagumun, doktiŋa wendegoŋ yohautayam. Tiŋa indi adi hatihati dapmandapmaŋnit mokit wendok-ku yobihila haniyam oŋ. Adi koom Baŋdut hatiguk ala miŋgilaŋgoŋ mintadakaleune kagumun. 3 Indi nemek kagumun be nadigumun uŋakoŋ hidi maaŋ haniyam. Unduŋ tinene welekubugoŋ mintanimbune kubugoŋ hatidok yoŋa haniyam. Unduŋ tiŋa indi Baŋ eŋ Mihiŋiŋ Jesu Kilisto adut welekubugoŋ tiyam. 4 Kaŋ indi nadifodi tuwot hinek tinimbek yoŋa pepa i youhamam.
Bepaŋ adi hauta
5 Indi Jesu Kilistodi mede ninimbune nadigumun uŋakoŋ indibo hidi haniyam. Mede u indiŋ, Bepaŋ adi hauta. Adi’walaŋkade mambip-kabe nemu hatak. 6 Ale indi mambip gineŋ hatiŋila Bepaŋdut welekubugoŋ tam, unduŋ yonene medenik u yalaŋ tibekneŋ. Tiŋa undugoŋ mede biyagoŋ u mu kame hatiyam tilak. 7 Ne hauta gineŋ hatilak undugoŋ indi maaŋ hauta gineŋ hatiyaneem, wendok indi Bepaŋ’walaŋ metamŋiyedut welekubugoŋ kedem tiyaneem. Kaŋ Bepaŋ Mihiŋiŋ Jesu Kilisto’walaŋ naŋgatŋiŋdi kadakaniŋnik hogohogok youtelune walanda tiyaneem. 8 Indi kadakaniŋnik moŋ, unduŋ yoŋa adi welenik tikamanda timiyam, kaŋ mede biyagoŋ wendi welenik gineŋ mu hatak. 9 Iŋgoŋ indi kadakaniŋnik yobihitnene Bepaŋ ne yoguk unduŋ, titiŋ didimeniŋ tiŋa kadakaniŋ hogohogok indi foloŋ hatak u tumolokulaŋa nihiyoutewalanda tilak. 10 “Nu kadakaniŋ nemu tugut”, unduŋ nobuniŋ yoŋa kaŋ woŋ adi “Bepaŋ adi yalaŋ-me” unduŋ niyam tilak. Wendoktiŋa Bepaŋ’walaŋ mededi welenik gineŋ mu hatak.