1 Nanonamendi na ingoda yei ge sari sago aera teta na Iesu gebe ari embobo tumonda ari babojira ainda yei sae etena awodo aera. Na ingoda yei ge sena awa teta memei memeinya da sarago ena ainda be awa ingoda ari berari awa embo Asisi Kotopu bae mi arago ewa. 2 Nanemi ingoda yei emi iteno indisewa. Edo na ingoda yei indari nenei itae doturisena ainda be awa ingo ari berari teta kinapeina emi beda mi arago etewo gido doturisena. Edo ingo awodo isewa awa ingo indari nenei badi awa sia aera. 3 Edo boroko daedo ingo sia ae ra ainda be awa ingo teta embo God gae mi atarago ewa awasedo. Ingo jo da dumo mina ara ewa edo ge mina baga ewa amimi isaga ira awa ingo ingoda jo da dipapa bebegae awa ambo ambo ise teta busu berari da embobo mi atima era da awodo atewa awasedo. 4 Da awodo ingoda teda embo da mi na Paul ambo ambo edo ena sirirari embo nei mina Apollos ambo ambo edo ena sadira. Edo ingo awodo sise re ingo wasiri re teta embo God gae amimi arago adewa.

5 Edo Paul mo averi edo Apollos mo averi? Nango re God da agipo embobo ingo atopatoro ingo gebe edo ewa awara. Edo God da agipo embobo dada awa God mi ungo buro ro orase itido ira awa edo era. 6 Edo nanemi ve goveteno edo Apollos mi sasaka isira te amone ta God mi etiri ve awa eririsira. 7 Edo embo amemi ve gousiri edo embo amemi umo isiri ungo awa embo nembogamo aera te God awa nembodiba ra ainda be awa unemi etiri ri ve awa eririsira. 8 Edo embo be govira ainde embo umo ira ainde awa ungo awa gari ewoga ewoga ae ra awarate God mi embo dada ungo buro ro era awodo tetegedo mina itadira. 9 Ingo awa teta God da buro inge edo nango God ga da buro da buro era.

10 Edo daedo ingo awa teta mando nango mi God awa embo itari inge ra. God uso kando mi setiri na awa atopatetiri mando itari gari jiwae embo isena. Edo jiro gari unemi naso yei ititisira amimi na tutuvi derido etena. Awarate God da agipo embo nei amimi tutuvi ainda mando ira. Awarate embo amemi mando ira awa gido gogo edo are. 11 Awarate God mi Iesu Keriso awawa teta tutuvi tuturo da itari inge isira. Edo embo mi tutuvi nei awa mana deradera. 12 Edo embo nenei mando edo era awa ri okain mi edo iji ribori deradira awarate embo nenei awa edo gogo edo ae mando ituka bebegae mi edo burigi atae adira. 13 Awarate Keriso bugadira iji ainde awa embo ainda buro mo ewamei ta ko embo ainda buro mo biae ri awawa embo mi gadera. Edo iji ainde God da kasari awawa teta riawo inge adira. Edo God da kasari mi embo mi embo ainda buro mo ewa ta biae ri awa isaga adera. Edo embo dada da buro awa riawo da mambari embo mi ewa ta biae ri awa gadera. 14 Edo riawo mi embo amimi ro tutuvi ainda tamo da itido mando isiri awa ewae adira awa umo mina badira. 15 Awarate riawo mi embo ainda buro awa ewadira awa embo awa mina mana badira.

16 Ingo gosewa ingo awa God da mando edo God da Asisi awa ingoda teda atima ira. 17 Awasedo embo amemi God da mando usibesi adira embo awa God mi usibesi adira. Ko God da mando awa kotopu edo ingo embomei ingo awa God da mando ra.

18 Embo dada ungo ungosuka gandubeore. Edo embo ave ingoda teda amimi jiro gari jiwae be embo busu da atima era ainda awa budo umo jiro gari embo awodo kotadira awa umo jiro gari embo be arase sedo re dowo umo jiro biae embo awodo are. 19 Ko embo busu da atima era amimi ungoda jiro gari mi ro gido era awa God mi sedo ira awa jiro biae ari ra. Edo ge eiawa jiwari mi sira,

20 Edo jiwari nei mi sedo ira,

21 Awasedo embo da amemi embo mi ro era awa embo jariga ge seure. 22 Awarate eiawa kotewo rora berari awa ingoda topo ra. Paul de Apollos de Peter de awa ingoda topo ra. Edo busu berari de wasiri de betari de edo ro matu isira edo amboda adira berari eiawa ingoda topo ra. 23 Edo ingo awa Keriso da topo ra. Edo Keriso awawa God da topo ra.